Rasul Hamzatovdan sovg'a olgan eldoshimiz
Abdiqul Mamatov sho'rolar zamonida — 1973-1975 yillarda yigitlik burchini Dog'istonda o'tagan. Ularning harbiy qismi turkiy dunyoning mashhur shoiri Rasul og'a Hamzatovning dachasi bilan yonma-yon joylashgan ekan. Kunlardan bir kuni askarlardan bir nechtasini mashhur shoir hasharga chaqiribdi.
Dachada ishlar saranjomlangach, Rasul og'a askarlarga ziyofat beribdi. Xayr-xo'shlashuv chog'ida Abdiqulni yoniga chaqirib, akulaning tishini sovg'a qilibdi.
— Sovg'ani ehtiyot qil, o'g'lim. O'g'irlatib qo'yma! — deya tayinlabdi.
Afsuski, shoir aytgani sodir bo'libdi. Sovg'ani kimdir “shimo” qilibdi. Abdiqul rosa afsuslanibdi.
Oradan ikki yil o'tgach, 1975 yilda Abdiqul bir tashkilotga xizmat mashinasi olib kelish uchun Rossiyaga borishiga to'g'ri kelibdi. Qaytishda Maxachqalaga, Rasul og'aning xonadoniga enibdi. Shoirning darvozasini taqillatib, Rasul og'ani so'roqlabdi. Oilasidagilar shoir safardaligini, ertaga qaytishini ma'lum qilibdi. Abdiqul xizmat qilgan qismiga borib, bir kecha mehmon bo'libdi. Ertasiga Rasul og'aning uyiga boribdi. Shoir uni tanibdi. Abdiqul bo'lgan voqeani so'zlab beribdi.
— Men hozir “Juravli” (“Turnalar”) qo'shig'ining taqdimotiga shoshilyapman. Senga yana bir sovg'a berayin! — deb ijodxonasini bezab turgan bug'u (olen) shoxini sovg'a qilibdi.
— Hozir bu sovg'a shaxsiy kutubxonamning eng nodir eksponatlaridan, — deydi faxrlanib Abdiqul birodarimiz.
— “Turnalar” qo'shig'iga yurtimizda, Chirchiq shahrida haykal o'rnatilgan, — dedim men.
— Yo'g'-e! Yaxshi aytdingiz. Bexabar ekanman. Albatta, “Turnalar” ziyoratiga boraman! — dedi Abdiqul Mamatov.
- Abdiqul Mamatov “Yorqin kelajak” nodavlat notijorat tashkilotining asoschisi. Yangier shahridagi kutubxonasi juda mashhur — xalqqa ochib qo'yilgan. Eldoshlarimiz ma'naviyatini yuksaltirishda ko'p va xo'p ishlar qilmoqda. Sirdaryoga kelgan xorijlik va mahalliy mehmonlar, albatta, u kishining xonadoniga bir qur qo'nib o'tadilar.
M.AHMAD
Suratda: Abdiqul Mamatov va kutubxona devoriga Rasul Hamzatov sovg'a qilgan bug'u shoxi mana shunday ilib qo'yilgan.