Fidoyilik

Hamisha shunday bo'lgan: fidoyilar, xalqparvar, haqiqatgo'y va halol zotlarning qadr-qimmati, hurmat-e'tibori o'z uyi, qishlog'i, mahalla-ko'yida ko'pincha bilinmaydi. Tinmaydi chumoliday, hali u, hali bu odamning dardu tashvishi bilan chopib yuradi o'zini, oilasini unutib. Keyin bir qarasa, UMR o'tib ketgan bo'ladi va… ortiga qarasa, SAVOB degan daryoga u ham baholi qudrat o'z ulushini qo'shgani haqida odamlar, besh-begonalar samimiy so'zlarni ayta boshlaydi. Shunda…

Shu so'zlarni yozyapman-u beixtiyor xayolimga qariyb yarim asrlik qiyomatli do'stim, jigarim Ro'ziboy QO'LDOShEV tushdi! Uniyam taqdir siylagani yo'q, yarim umri kurashu talotumlarda o'tib ketdi. Radioda ishlab ming-minglab odamlar ko'nglidan munosib joy oldi. Televidenieda ham kam bo'lmadi: eng shov-shuvli, muammoli, xalqchil ko'rsatuvlar tayyorlab, millionlab muxlislar orttirdi.

Oltmishdan oshibam qo'lidan mikrofon tushgani yo'q, bir oy — 30 kunning 22 kuni safarda o'tayotgandir, balki. Qachon telefon qilsam, “Tirikmisan, jo'rajon, yo'ldaman, o'zim qo'ng'iroq qilaman”, deydi shosha-pisha.

Nega bu yorug' so'zlarni yozayotganim sababini angladingizmi? Ro'ziboy Qo'ldoshev qo'shni bovurlarimiz, Qozog'iston Respublikasida ta'sis etilgan ulug' bobomiz Ahmad Yassaviy nomidagi medal bilan taqdirlanibdi!

“Turkiy xalqlar tarixi, milliy qadriyatlari va madaniyatini muhim tadqiqotlari bilan o'rganib, xalqimizga o'rgatib kelayotgani uchun” degan e'tirofni o'qib… ko'zlarim yoshga to'ldi!

Muborak bo'lsin, bunday ehtirom va hurmat uchun qondoshlarimizga ming rahmat!

Norqobil JALIL,

O'zbekistonda xizmat

ko'rsatgan jurnalist.