Muallimlarga

Abdulla ORIPOV,

O'zbekiston Qahramoni, xalq shoiri

Nechog' baxtiyorman, ta'zimda shu tob

Sizning sha'ningizga bitmoqdaman bayt.

Ne odam bo'lardim, qo'limda kitob

Biror harf tanimay tursaydim loqayd.

Siz-ku “Alifbo”dan “Qomus”gacha to

Bari-barisini tanitgan ustoz.

Ilk bor Siz ko'rsatgan duraxshon Zuhro

Bukun she'rim ichra tashbihdir mumtoz.

Siz mo''jaz yurakda yoqolgan yog'du

Oqibat quyoshdek socha olur nur.

Buyuklar haqqiga qasamyod gap bu:

Sizdan boshlanadi asli Tafakkur.

Olamda ko'p erur muborak onlar,

Tabarruk zotlar ham garchand ko'p erur.

Sizgadir ilk rahmat, aziz insonlar,

Munis muallimlar, Sizga tashakkur!