Ko'ngillarga qurilgan rishta
Bekobod tumanida Sirdaryo ustidan ko'prik bunyod etildi
“… Ko'prik ochilishini eshitib kelayotgan yoshu-qariyalarning kayfiyati chog'. Ko'pni ko'rgan nuroniy kishilarning hokimning yoniga kelib, Prezidentimizning ana shunday savobli ishlarini olqishlab duo qilishayotganiga guvoh bo'ldik.
Ta'kidlash joizki, umumiy uzunligi ikki yuz metrga yaqin ushbu ko'prik qurilishi uchun 18 milliard so'mdan ziyod mablag' sarflangan. Olti kilometrlik yo'l qurilishi ishlariga esa 54 milliard so'm mablag' sarflash rejalashtirilgan…”
“Inson qo'li bilan yaratiladigan eng savobli ish bu ko'prik qurishdir”.
Bu hikmatona gapni suhbatlarning birida taniqli adib Xurshid Do'stmuhammad aytgan edi.
Bekobodda yangi mahobatli ko'prikning ochilishini eshitdim-u, beixtiyor ustoz yozuvchining yuqoridagi gaplari xayolimga keldi.
Toshkentdan Bekobodgacha yuz kilometrdan uzoqroq yo'l bosiladi. Lekin ana shu uzoq masofa ham zeriktirmaydi. Negaki, bugungi o'zgarishlar, yangilanishlar, bunyodkorliklarni yo'l bo'yi ko'rib hayratlanasiz. Shuncha ishlar amalga oshirilayotganiga, ko'zingiz ko'rib tursa-da, ishongingiz kelmaydi.
Darhaqiqat, jonajon O'zbekistonimiz ulkan qurilishlar mamlakatiga aylangan.
Ko'priklar haqida o'ylab borar ekanman, Qora dengizni O'rta Yer dengizi bilan bog'lab turuvchi Istanbuldagi Bosfor bo'g'ozining noyob manzillari, mahobatli ko'priklari ham ko'z o'ngimda namoyon bo'lgandek edi. Yana mashhur “Suyunchi” filmidagi hashar yo'li bilan Anzirat xola qurgan ko'prik xayolimdan o'tdi. Qirg'izistonning Aravonidagi Nurobod qishlog'imizni Andijonning Buloqboshisidagi Shirmonbuloq qishlog'i bilan bog'lab turuvchi Aravonsoydan o'tgan, bundan ellik yil avval sel olib, haliyam tiklanmagan ko'prik ham yodimga tushib ketdi. Ha, ko'prik odamzodga judayam qadri bilinadigan obidadir.
Peshinga yaqin Bekobod tumanining “Do'stlik” mahallasiga yetib bordik. Tuman hokimining axborot siyosati masalalari bo'yicha maslahatchisi Akram Mamadaliyev bilan o'sha manzilda uchrashdik. U “Do'stlik” va “Yangiovul” mahallalari hududlarini bog'lovchi Sirdaryo daryosi ustidan qurib bitkazilgan ko'prik va unga olib boruvchi yo'llar haqida batafsil so'zlab berdi.
Mahallalarni bog'lab turuvchi bu ko'prik qurilishi aslida sobiq ittifoq zamonida, aniqrog'i, 1989 yil oxirlarida boshlanib, 1991 yilga borib to'xtab qolgan ekan. Bekobodning “Do'stlik”, “Yangiovul” hamda “Ulug'bek” mahallalarini bog'lovchi olti kilometr uzunlikdagi avtomobil yo'li qurish ishlari esa 1985 yilda boshlangan bo'lsa-da, turli sabablarga ko'ra u ham tashlab qo'yilgan edi. Qariyb 36 yil mobaynida “Yangiovul” mahallasi aholisi tuman markaziga Bekobod shahri orqali qirq to'rt kilometr ortiqcha masofa bosib qatnagan. Ayniqsa, zudlik bilan tibbiy yordam zarur bo'lgan bemor kishilar tuman markazidagi kasalxonalarga yuraklarini hovuchlab yetib olishardi. Homilador ayollar, dardga chalingan yosh go'daklar, xullas, shoshilinch yordamga muhtoj insonlar ahvolini o'zingiz tasavvur qilavering!
Xullas kalom, oradan qirq yilga yaqin vaqt o'tib, Prezidentimizning 2025 yil 24 iyuldagi 228-sonli qarori hamda Vazirlar Mahkamasining 2025 yil 1 avgustdagi qarori bilan mazkur ko'prik qurilish ishlari qaytadan boshlandi.
Oradan shuncha yil o'tib, endi ochilayotgan ushbu yo'lning muhtashamligi va zamonaviyligini ko'rib, havasingiz keladi. Avtomobillar qatnov qismidagi yo'l tekis va ravon bunyod etilgan. To'rt va ikki tasmali yo'lning ikki tomonida esa piyodalar yo'lagi hamda veloyo'lak, har ikki tomonida yashil belbog' yaratilgan. Yo'l chetlaridagi zamonaviy simyog'ochlar yuqorisiga quyosh panelchalari o'rnatilgan. Endi bu qishloq qishloq emas, haqiqatda shahar qiyofasiga kirgan go'zal go'shaga aylanibdi, desak, aslo mubolag'a bo'lmaydi!
Akram Mamadaliyev ko'prik va yo'llarning qurilish boshlangungacha bo'lgan vaqtdagi xarob holati aks etgan suratlarni ko'rsatdi. O'zgarishlarga qarab turib, inson qo'li gul ekaniga ishonch hosil qilasan kishi.
Yangi qurilgan ko'prik yaqinida Bekobod tumani hokimi Zaynilobiddin Nizomiddinov bilan uchrashdik. “Tumandagi obodlik va farovonlik yo'lidagi keskin o'zgarishlarni odamlar sizning hokim bo'lib kelishingiz bilan bog'lashmoqda”, deb uni qutladik.
— Bekobod tumanidagi jamiki ijobiy o'zgarishlar muhtaram Prezidentimiz Shavkat Mirziyoyevning g'amxo'rliklari tufayli amalga oshmoqda, — dedi tuman rahbari Z.Nizomiddinov. — Bugun foydalanishga topshirilayotgan ko'prik va unga tutash yo'llar qurilishi ham shaxsan Prezidentimiz tashabbusi bilan ro'yobga chiqqanini yurtdoshlarimiz yaxshi bilishadi.
Albatta, tuman hokimi haq. Bo'lmasa, shuncha yildan buyon e'tiborsiz, boshlangan-u shundoq tashlangan bunday bunyodkorliklar Prezident yordamida amalga oshirilmasa, qanday qilib ro'yobga chiqishi mumkin? Axir bunday katta xarajat, strategik ahamiyatga ega bo'lgan qurilishlarni amalga oshirish oson emasligi kunday ravshandir.
Ko'prik ochilishini eshitib kelayotgan yoshu qariyalarning kayfiyati chog'. Ko'pni ko'rgan nuroniy kishilarning hokimning yoniga kelib, Prezidentimizning ana shunday savobli ishlarini olqishlab duo qilishayotganiga guvoh bo'ldik.
Ta'kidlash joizki, umumiy uzunligi ikki yuz metrga yaqin ushbu ko'prik qurilishi uchun 18 milliard so'mdan ziyod mablag' sarflangan. Olti kilometrlik yo'l qurilishi ishlariga esa 54 milliard so'm mablag' sarflash rejalashtirilgan.
Ishxonasi nomi yozilgan kepkadagi baland bo'yli, ovozidan rahbarlik nafasi sezilib turgan kishi “yo'lning o'rtasiga yangi chizilgan yo'l belgisini bosmay yuringlar” deb kimlargadir jon kuydirib tanbeh bermoqda. Matbuot kotibining tanishtirishicha, u qurilish ishlarini amalga oshirgan pudratchi tashkilot hisoblangan “O'zyo'lko'prik” klasteri davlat muassasasi rahbari Faxriddin Saloyev ekan.
— Qurilish ishlariga uch yuzga yaqin mutaxassislar, saksonga yaqin texnika vositalari jalb etildi, — dedi u. — Alohida jonbozlik ko'rsatgan yo'l ustasi Rustam Qurbonqulov, ish boshqaruvchi Muzaffar To'liyevlar nomi alohida e'tirof etilsa, o'rinli bo'lar edi.
Ha, mubolag'asiz, shunday xayrli ishlarni amalga oshirganlarni nafaqat biz jurnalistlar, butun Bekobod xalqi olqishlamoqda.
Ko'prik ochilish marosimiga bayramona liboslarda oqib kelayotganlarning hisobi ko'rinmaydi. Quvonchlari ichiga sig'may, u yoqdan bu yoqqa chopib yurgan bolalarga qarab, sevinching yuz chandon oshadi, bolalikka qaytging kelib qoladi.
Soat ikkiga yaqinlashib qolganida viloyat hokimi hamrohligida faollar, nuroniylar va boshqa mehmonlar yangi bunyod etilgan “Do'stlik” mahalla markazi binosi yoniga yig'ildilar. Qadim-qadimdan ota-bobolarimizdan qolgan udum bor. To'y-tantanalar, xayrli ishlar boshlanishi, katta-katta inshootlar ochilishi oldidan Alloh yo'lida jonliq atab qurbonlik qilish odati mavjud. Shu kuni bekobodliklar ham ana shu savobli udumni amalga oshirishdi. Oqsoqol ulamo Qur'on oyatlaridan tilovat qildi. Yig'ilganlar yurtimiz tinchligi barqaror bo'lishi uchun, Yangi O'zbekistonning yangi ko'priklarini qurishdek savobli amallarda bosh-qosh bo'lib turgan Prezidentimiz haqqiga duo qildilar.
Zamonaviy shart-sharoitlar yaratilgan “Do'stlik” mahalla markazi karnay-surnaylar, doira-do'mbiralar sadosi ostida ochildi. Bino ichkarisidagi sharoitlar bilan tanishgach, mehmonlar yashil makon yaratish uchun keltirib qo'yilgan daraxt ko'chatlarini o'tqazishdi, yaxshi niyatlar qilishdi.
Toshkent viloyati hokimi, Oliy Majlis Senati a'zosi Zoir Mirzayev ko'prikni ochish oldidan so'zga chiqib, barcha yig'ilganlarni tabrikladi.
— Yangi O'zbekistonda har kuni bayram, — dedi u. — Hurmatli Prezidentimiz o'z nazoratiga olgani sharofati bilan bu ko'prik qurilishi juda qisqa muddatda qurib bitkazildi. Ko'chalarni qarang, qaysi shahardan kam? Bu yo'llar, bu ko'prik barchangizga muborak bo'lsin! Quruvchilarga ming rahmat!
O'zbekiston faxriylarining ijtimoiy faoliyatini qo'llab-quvvatlash “Nuroniy” jamg'armasi Toshkent viloyati bo'limi rahbari Abdusamad Nosirov, Sirdaryo ustida qurilgan ko'prikning narigi qirg'og'ida yashovchi Saribek Yangiboyevlar ham bunday ko'priklar, yo'llar qurilishi inson qadrini ulug'lash, ularning og'irini yengil qilish uchun yaratilganini ta'kidladilar. Tantanaga yig'ilganlar huzurida O'zbekiston Yozuvchilar uyushmasi a'zosi, bekobodlik taniqli shoir Ashurali Boymurod shu quvonchli sanaga bag'ishlab yozgan quyidagi she'rini o'qidi:
Sirning qoq ustiga qo'yilgan ko'prik,
Ko'ngilga qurilgan ulkan rishtadir.
Bu chindan jasorat, emasdir o'trik,
Balki, bu mo''jiza, balki tushdadir.
Bobolar azaldan ko'priklar qurgan,
Yaratmoq tiklagan elning qaddini.
Hatto jilovlagan, daryoni burgan,
Shodlikka ulagan xalqning dardini.
Farhodu Shirinlar uchrashar qayta,
Zamon yaqinlatdi olis manzilni.
Men esa, azizim, she'r ayta-ayta
Kashf etdim o'zimga otashin dilni.
Aslo tinim bilmas Yurtning Sarvari,
O'z xalqin duosin olib ishlaydi.
Har yerda kerakdir ko'ngil zargari,
Yurtni o'ylaganlar g'olib bo'ladi!
Muhabbat manzilin etgaymiz bunyod,
Shamol esaverar Shiringa qarab.
Farhodlar yurtida ko'ngil bo'ldi shod,
Baxtliman, turibman koringga yarab…
Ko'prik va yo'llar ochilishi xuddi bayram kabi tantanali kechdi. Minglab odamlarning quvonchi ichiga sig'may ketdi.
O'zbekiston ramzi bo'lgan bayrog'imiz Bekobod shamolida shunday jozibali hilpirab turibdiki, uning zavqini his qilish naqadar faraxbaxsh edi…
Dilmurod QIRG'IZBOYEV,
O'zbekiston Jurnalistlar
uyushmasi a'zosi.