Grant mablag'lari ezgulikka xizmat qilmoqda

O'zbekiston Respublikasi Prezidenti Shavkat Mirziyoyevning 2024 yil 26 avgustdagi “Fuqarolik jamiyati institutlarini davlat tomonidan qo'llab-quvvatlash tizimini yanada takomillashtirish chora-tadbirlari to'g'risida”gi Farmonida ijtimoiy foydali dasturlar samaradorligini oshirish uchun qo'shimcha shart-sharoitlar yaratishga alohida e'tibor qaratilgan.

Farmonda davlat va jamiyat hayotida fuqarolik jamiyati institutlari faolligini yanada oshirish hamda ijtimoiy-iqtisodiy, madaniy-ma'naviy va gumanitar sohalarni rivojlantirishda ularning salohiyatidan to'laqonli foydalanish, jamiyat manfaatlari va aholining haqiqiy ehtiyojlarini ko'zlagan, joylarda saqlanib qolayotgan dolzarb muammolarni hal etishga qaratilgan tashabbuslarni ro'yobga chiqarishga ko'maklashish fuqarolik jamiyati institutlarini davlat tomonidan qo'llab-quvvatlashning asosiy yo'nalishlari sifatida belgilangan edi. Shuningdek, davlat organlari va fuqarolik jamiyati institutlari o'rtasida o'zaro manfaatli ijtimoiy sheriklikni rivojlantirish, fuqarolik jamiyati institutlari tomonidan davlat va jamiyat hayotining barcha sohalarini rivojlantirishga ko'maklashish yo'lida ta'sirchan jamoatchilik nazorati olib borilishini rag'batlantirish ustuvor vazifalardan biri sifatida ko'rsatilgan. Shu bois ham Oliy Majlis huzuridagi fuqarolik jamiyati institutlarini qo'llab-quvvatlash jamoat fondi tomonidan e'lon qilinayotgan grant tanlovlarida aholi bandligini ta'minlash, sog'liqni saqlash, ta'lim va tarbiya, madaniyat, sport, sanitar-gigiena, sog'lom turmush tarzi, atrof-muhitni muhofaza qilish, korrupsiyaga qarshi kurash kabi muhim yo'nalishlar qamrab olinmoqda.

Farmon ijrosi bo'yicha Namangan viloyatida ham keng ko'lamli ishlar qilinyapti. Viloyat bo'yicha Jamoat fondi tomonidan e'lon qilingan 7 ta tanlovga 32 ta, hududiy bo'lim tomonidan e'lon qilingan 4 ta tanlovga esa 17 ta loyiha taqdim etilgan. Jami 49 ta loyihadan 12 tasi g'olib deb topildi.

Joriy yildagi grant tanlovida bitta loyiha 200 million so'mgacha moliyalashtirildi. Bu mahalliy tashabbuslar uchun yetarli iqtisodiy poydevor yaratadi. G'olib deb topilgan loyihalarni moliyalashtirish uchun jami 1 milliard 230 million so'm mablag' yo'naltirilgan. Bu mahalliy muammolarni joyida hal etishda muhim omildir.

— Grant sohiblarining loyihalari bilan tanishar ekanmiz, aksariyati olis qishloqlarda tibbiyot tizimini takomillashtirish, og'ir xastaliklardan ozor chekayotgan ehtiyojmand kishilarga moliyaviy ko'mak berishga yo'naltirilganini ko'rib, sog'liqni saqlash tizimida hal etilishi kutilayotgan muammolar to'planib qolganiga amin bo'lamiz, — deydi Oliy Majlis huzuridagi fuqarolik jamiyati institutlarini qo'llab-quvvatlash jamoat fondi viloyat bo'limi direktori Dilmurod Ne'matov. — Birgina O'zbekiston “Mahalla” xayriya jamoat fondi Namangan viloyati bo'limi hududlardagi olti nafar, shu jumladan, Kosonsoy tumanida istiqomat qiluvchi to'rt bemorning jarrohlik amaliyotlari o'tkazilishida yaqindan ko'maklashmoqda. Xususan, “Zamondosh” mahallasi, Yangi avlod ko'chasi, 48-uyda yashab kelayotgan Sojida Akramovaga suyak yemirilishi kasalligi bo'yicha davolash va endoprotez qo'yish jarrohlik amaliyoti o'tashida yordam berish ko'zda tutilgan edi. Bemor jarrohlik stoliga yotishi uchun zarur bo'lgan mablag'lar grant loyihasi doirasida ajratib berildi.

— Kasallik boshlanganda tushkunlikka tushib qoldim. Negaki operatsiya xarajatlari, unga kerak bo'ladigan endoprotez, qolaversa, muolaja uchun dori-darmon va shifoxona tibbiy xizmatini to'lashga pulimiz yetmasdi. Shuning uchun tuman hokimligiga yo'llagan murojaatim besamar ketmadi, “Mahalla” fondi xodimlari yo'qlab kelishdi. Tibbiy ko'rikdan o'tkazib, operatsiyaga zarur barcha choralarni ko'rishdi. Viloyat shifoxonasi travmatologiya bo'limida malakali jarrohlik amaliyotini boshdan kechirdim. Jamoat fondiga, loyiha ijrochilari hamda qo'li yengil shifokorlarga rahmat. Hozir o'zimni yengil his qilyapman, — deya faxr tuyg'ularini izhor etadi Sojida Akramova.

Samiyusuf Qahharov ham Kosonsoyning “Gurmiron” mahallasida yashaydi. U viloyat Sog'liqni saqlash boshqarmasi tavsiyasiga asosan tibbiy ko'rikdan o'tkazilgach, Toshkent shahridagi “Medical Center Chinor” MChJda plastik jarrohlik amaliyoti uchun yotqizildi. Hozirgi kunda u oila bag'riga qaytgan.

Ulug'bek Majidov ham kosonsoylik. Namangan shahridagi “Andrologiya-N” MChJda urologiya jarrohlik amaliyoti o'tkazilgandan so'ng u ko'p yillardan buyon ozor berayotgan darddan batamom qutulgan.

— Farzandim tug'ma buyrak nuqsoni bilan tug'ilganligi uchun salomatligida muammolari bor edi. Voyaga yetgan sari tashvishimiz ham ortib bordi. Tibbiyot muassasalariga murojaat qildik, lekin jarrohlik amaliyoti zarurligi va moliyaviy muammolar sababli davolanishga imkoniyat bo'lmayotgan edi, — deydi uning onasi Xosiyatjon Azimova. — Sog'ayishiga sababchi bo'lgan Oliy Majlis huzuridagi fuqarolik jamiyati institutlarini qo'llab-quvvatlash jamoat fondiga, “Mahalla” xayriya jamoat fondi viloyat bo'limi, viloyat Sog'liqni saqlash boshqarmasi va Namangan shahridagi “Andrologiya-N” MChJga, ayniqsa, grant sohibiga katta rahmat aytaman.

Chortoq tumani “Oqterak” mahallasida ijtimoiy ko'makka muhtoj aholini sog'lomlashtirishga ko'maklashish” yo'nalishidagi loyihaga asosan bir qator ishlar qilindi. Usmon Nosir nomli ko'chaning 44-uyida yashab kelayotgan Abdumalik Sobirjonov 2021 yili avtohalokatga uchraganidan buyon to'shakka mixlanib qolgan ekan. Jarrohlik amaliyotidan so'ng qayta hayotga qaytgandek bo'ldi.

Jamoat fondining moliyaviy ko'magi asosida “Yangiqo'rg'on tumani, Qorapolvon mahallasidagi oilaviy shifokorlik punkti xizmat sifatini yaxshilashga ko'maklashish” nomli grant loyihasi ham muvaffaqiyatli bajarilgani e'tiborga molik. Qisqa vaqt mobaynida tibbiyot punkti zamonaviy tibbiy jihozlar bilan ta'minlandi. Natijada xizmat ko'rsatish madaniyati va qamrovi oshdi.

Viloyat “Qalb mehri” ayollar va ularning oilalarini ijtimoiy-huquqiy qo'llab-quvvatlash markazi “Yuksalish sari yuksalamiz” nomli loyiha ustida faol ishladi. Belgilangan davr mobaynida Davlatobod tumanidagi “Yuksalish”, “Tadbirkor”, “Elobod”, “Davlatobod”, “Umid” mahallalari hududiga zamonaviy maxsus chiqindi qutilari joylashtirildi. “Tadbirkor” mahallasidagi ko'p qavatli uylarda yashovchi aholi esa chiqindi tashlanadigan maxsus konteynerlar bilan ta'minlandi.

Nogironlar jamiyatining Yangiqo'rg'on tumani bo'linmasi loyihasida Salmon mahalla yoshlari uchun chet tillarini o'rganish va bo'sh vaqtlarini mazmunli tashkil etish imkonini yaratish maqsad qilingan edi. Uni ro'yobga chiqarish uchun hududdagi qarovsiz qolgan bino ta'mirlanib, zamonaviy ko'rinishga keltirildi. Yoshlar uchun shinam va zamonaviy bilim maskani vujudga kelganidan butun mahalla ahli minnatdor.

Uychi tumanidagi “Hurriyat”, “Beruniy”, “Bog'” mahallalarining infratuzilmasini yaxshilashga ko'maklashish” loyihasi doirasida tungi yoritish chiroqlari, nazorat kameralari, chiqindi qutilari va ko'chma svetofor o'rnatish ishlari amalga oshirildi. Buning uchun 30,2 million so'mlik 131 ta yoritish chirog'i, 47,3 million so'mlik 32 ta chiqindi qutisi o'rnatilgan. Qiymati 36,0 million so'mlik 30 ta kuzatuv kamerasi xarid qilib olindi. Bog' mahallasining “Savdogar”, “Ufq” ko'chalariga 11 ta yoritish chirog'i o'rnatildi.

Boyag'on mahallasi ham Uychi tumanida. Mahallaning infratuzilmasini yaxshilashga ko'maklashish bo'yicha loyiha doirasida tungi yoritish chiroqlari, nazorat kameralari, chiqindi qutilari va ko'chma svetofor o'rnatish ishlari amalga oshirildi. 34-maktab hududida o'quvchilar xavfsizligini ta'minlash maqsadida ko'chma svetofor hamda Amir Temur nomli ko'chaga 2 ta chiqindi qutisi, 2 dona kuzatuv kamerasi, 4 ta yoritish chirog'i o'rnatildi.

Prezident farmoniga ko'ra, Oliy Majlis huzuridagi fuqarolik jamiyati institutlarini qo'llab-quvvatlash jamoat fondi grantlar uchun ajratayotgan mablag'lar aholi turmush farovonligini yanada oshirishga to'siq bo'layotgan muammolarni hal etishga yo'naltirilmoqda. Bu esa minglab aholining og'irini yengil qilishda, ularning necha yillardan buyon azoblab kelayotgan dardlardan xalos bo'lishlarida muhim omildir.

Qosimjon AKBAROV,

O'zbekiston Jurnalistlar

uyushmasi a'zosi.