Munavvar ko'ngil

Akademik

Qalandar ABDURAHMONOVga

Ilmu intizom yo'li tarjimai holimda,

Hayotim mohiyati javobu savolimda,

Ochilmagan eshiklar kaliti bor olimda,

Manzilim ilmu hikmat, qalandarman, qalandar.

Angladim, Xudoyimning odil hukmi bor doim,

Goh toshday botar kunlar, goh o'tar bir muloyim,

Ma'rifat suvlarida qorilgan ekan loyim,

Pok ilm zoe bo'lmas, muzaffarman, muzaffar.

Men gulga ko'ngul qo'ydim, lek gulni yulganim yo'q,

Gulday yashnab yashadim, guldayin so'lganim yo'q,

Ishq yo'lida ko'p kuydim, ammo kul bo'lganim yo'q,

Tangridan in'om-taqdir, samandarman, samandar.

Men iqtisod fanida bu kun ustodman, ustod,

Mehr berdim, mehrni qilmadim hech iqtisod,

Shu xalq farovon bo'lsin, shu Vatan bo'lsin obod,

Toki tanda jonim bor, elparvarman, elparvar.

Ilm — payg'ambarlar yo'li mashaqqatdir, mehnatdir,

Ignada quduq qazib suv chiqarmoq rohatdir,

Har bir inson hayoti bilganga nasihatdir,

Ilm tufayli ko'ngli munavvarman, munavvar.

G'ayrat MAJID