Umr nizomi

Sirojiddin SAYYID,

O'zbekiston xalq shoiri

Professor

Nizomiddin Mahmudovga

Ilmu zahmatni bir vujudda ko'rdik,

Jismu jon atalmish hududda ko'rdik.

Olimlar payg'ambar vorislaridir,

Ilm ahlin bir umr sujudda ko'rdik.

Ajib holotlar bor til va dil aro,

Dilni qon — tilni gar sukutda ko'rdik.

Burgutda ko'rdik gar dil parvozini,

Tilning jilosini hudhudda ko'rdik.

O'rxunkeldilardan tingladik kalom,

Mavjlarin Ustyurt ham Surgutda ko'rdik.

Navoiydan oldik Chorkitoblarin,

Chorchinorlarini Urgutda ko'rdik.

Elimning kamtarin olimlari bor,

Umrini sabr ila subutda ko'rdik.

Bibi Ubaydadir asli Buvayda,

Nomlarin allayu surudda ko'rdik.

Igna bilan quduq qazguvchi zotlar,

Mehnatin shu elu, shu yurtda ko'rdik.

Umr yillarining har soniyasin

Ustoz chaqib turgan gurgutda ko'rdik.

Asli ikki asr yetmish beshdadir,

Ma'nisin bu kungi mavludda ko'rdik.

Ilmning nizomu intizomini

Domla Nizomiddin Mahmudda ko'rdik.

23.01.2026 yil.