Vatan qadri
Biz chinakam baxtli insonlarmiz. Atrofga bir nazar tashlang: qaerda bor bunday jannat yurt? Allohga behad shukurlar bo'lsinki, yurtimiz tinch, qaerga qaramang, bunyodkorlik. Vatandoshlarimiz jahon sarhadlarini zabt etib, O'zbekiston degan nomni yuksaklarga ko'tarib, madhiyamizni butun dunyoga tanitmoqda. Bu hol bizda g'urur va iftixor tuyg'usini, Vatanga muhabbat hissini yanada oshiradi.
Bir vatandoshimiz tijorat yo'li bilan Birlashgan Arab Amirligiga boribdi. O'sha yerlik kishilardan biri undan so'rabdi:
— Sen qaerliksan? Oilang, bola-chaqang, hovli-joying bormi?
Yurtdoshimiz O'zbekistonni, o'zi tug'ilib o'sgan go'zal vodiyni, so'lim qishlog'ini, so'ng hovli-joyini ta'riflay ketibdi:
— Sakkiz sotixli hovlim, ikki o'g'lim, guldek bir qizim bor. Hovlimizning chekkasidan o'tgan ariqda qishin-yozin zilol suv oqadi. Imoratimizning atrofini uzumzorlarimiz bezab turadi. Bog'imizga gilos, olma, o'rik, anor ekib qo'yganman. Hovlimiz adog'idagi og'ilxonada bir sigirim, ikki buzog'im va to'rtta qo'yimiz ham bor.
— So'zlaringiz rostmi? Yolg'on gapirmayapsizmi? — debdi uni tinglayotganlardan biri. — Axir bu narsalar jannatdagina bo'ladi-ku!
Yurtdoshimiz bu gaplardan go'zal Vatanning qadrini o'shandagina yanada tiyranroq his qilibdi.
Xonbibi HIMMAT qizi,
jurnalist.