Ilmiy salohiyat va tibbiy taraqqiyot
Andijon davlat tibbiyot institutidagi zamonaviy ta'lim tizimi haqida
Mamlakatimizda barcha sohalar qatori sog'liqni saqlash tizimi ham izchil rivojlanib, zamonaviy talablar asosida yangilanib bormoqda. Yangi O'zbekiston taraqqiyotida aholining salomatligini mustahkamlash, tibbiy xizmat sifatini oshirish hamda malakali kadrlar tayyorlash eng muhim vazifalardan biri sifatida qaralmoqda.
Ana shunday ulkan va mas'uliyatli jarayonda Andijon davlat tibbiyot instituti o'zining boy tajribasi, ilmiy salohiyati va zamonaviy ta'lim tizimi bilan alohida o'rin tutadi. O'tgan yetmish yil davomida institut nafaqat respublikamiz, balki xalqaro miqyosda ham minglab malakali shifokorlar va tibbiyot mutaxassislarini tayyorlab, sog'liqni saqlash tizimi rivojiga munosib hissa qo'shib kelmoqda.
2025 yilda institutimizning 70 yillik yubileyi keng nishonlandi. Ushbu sana nafaqat tarixiy sana, balki institut jamoasi erishgan yutuqlarni sarhisob qilish va kelajak istiqbollarini belgilash uchun ham muhim bosqich bo'ldi.
Bugungi kunda institutda 12 ming nafardan ortiq mahalliy va xorijiy talabalar tahsil olmoqda. Ularga 953 nafar professor-o'qituvchi saboq bermoqda. Ularning orasida 66 nafar fan doktori va 279 nafar fan nomzodi faoliyat yuritadi.
Ilmiy faoliyat ham izchil rivojlanmoqda. Xususan, 2025 yil davomida institutda 8 ta “DSc” va 44 ta “PhD” dissertatsiyalari muvaffaqiyatli himoya qilindi. Bu esa institutda ilmiy izlanishlar, innovatsion tadqiqotlar va yangi ilmiy maktablar shakllanib borayotganini yaqqol ko'rsatadi.
Ta'lim jarayonida esa nazariya va amaliyot uyg'unligiga alohida e'tibor qaratilmoqda. Institutda o'quv mashg'ulotlari 50 foiz nazariy va 50 foiz amaliy asosda tashkil etilgan. Talabalar klinik bazalarda real tibbiy jarayonlarda ishtirok etib, o'z bilim va ko'nikmalarini mustahkamlab bormoqda.
Bugungi kunda institut 115 ta xorijiy tibbiyot universitetlari, ilmiy markazlar va klinikalar bilan hamkorlik aloqalarini yo'lga qo'ygan. Bu hamkorliklar ilmiy tajriba almashish, akademik mobillik va zamonaviy tibbiyot texnologiyalarini o'rganishda muhim ahamiyat kasb etmoqda.
2025 yilda 57 nafar professor-o'qituvchi Rossiya Federatsiyasi, Janubiy Koreya, Turkiya, Belarus, Ozarbayjon, Qirg'iziston, Qozog'iston va Xitoyning yetakchi tibbiyot muassasalarida malaka oshirib qaytdi.
Shuningdek, akademik mobillik dasturlari doirasida o'qituvchilarimiz Qozog'iston, Ozarbayjon va Rossiya davlatlarining nufuzli oliy ta'lim muassasalari bilan tajriba almashdilar. Xorijiy mutaxassislar esa institutimizga tashrif buyurib, talabalar uchun mahorat darslari va ma'ruzalar o'tkazib kelmoqda.
O'tgan yil institut tarixida yana bir muhim yutuq bilan muhrlandi. Institutning bir qator magistratura yo'nalishlari “The Eurasian Centre for Accreditation and Quality Assurance in Higher Education and Health Care” (ECAQA) (Oliy ta'lim va sog'liqni saqlash sohasida akkreditatsiya va sifatni ta'minlash bo'yicha Yevroosiyo markazi) tomonidan xalqaro akkreditatsiyadan muvaffaqiyatli o'tkazildi.
Jumladan, akusherlik va ginekologiya, tibbiy radiologiya, kardiologiya, umumiy onkologiya hamda umumiy xirurgiya yo'nalishlari xalqaro standartlarga mosligi tasdiqlandi.
Akkreditatsiya 2026 yil 29 yanvardan 2031 yil 28 yanvargacha bo'lgan muddatga berildi.
Bundan tashqari, institut “World Federation for Medical Education” (WFME) (Butunjahon tibbiy ta'lim Federatsiyasi) tomonidan akkreditatsiyadan o'tgan tibbiyot oliy ta'lim muassasasi sifatida tan olindi. Akkreditatsiya natijalari “DEQAR” hamda “DAQAR” xalqaro sifat bazalariga joylashtirildi.
Bu yutuqlar institutda ta'lim sifati xalqaro standartlarga to'liq mos ekanini tasdiqlaydi.
Institut professor-o'qituvchilari viloyat aholisining salomatligini mustahkamlashda ham faol ishtirok etib kelmoqda.
Andijon viloyatining 17 ta shahar va tumanlariga institutning 34 ta klinik kafedralari biriktirildi. 132 nafar professor-o'qituvchi 160 ta birlamchi tibbiyot muassasalariga amaliy yordam ko'rsatish uchun mas'ul etib tayinlandi.
Yil davomida o'tkazilgan 114 marotaba chuqurlashtirilgan tibbiy ko'riklar natijasida 614 ming nafardan ortiq aholi tibbiy xizmat bilan qamrab olindi.
Shuningdek, 154 ta yuqori texnologik operatsiyalar muvaffaqiyatli amalga oshirildi. Bu esa hududlarda tibbiy xizmat sifati sezilarli darajada oshib borayotganini ko'rsatadi.
Institut talabalari ham respublika va xalqaro miqyosdagi ilmiy anjumanlar, olimpiadalar va tanlovlarda faol ishtirok etib, yuksak natijalarga erishmoqda.
Bir qator talabalar Prezident davlat stipendiyasi, Islom Karimov hamda Abu Ali ibn Sino nomidagi davlat stipendiyalariga sazovor bo'ldi. Shuningdek, talabalarimiz Qozog'iston, Rossiya va Slovakiya kabi davlatlarda o'tkazilgan xalqaro konferensiya va olimpiadalarda faxrli o'rinlarni qo'lga kiritdi. Bu yutuqlar yoshlarning ilm-fan va tibbiyotga bo'lgan qiziqishi ortib borayotganidan dalolat beradi.
Institutda ta'lim jarayoni bilan bir qatorda talabalar ma'naviy-ma'rifiy tarbiyasiga ham katta e'tibor qaratilmoqda.
Buyuk mutafakkir Zahiriddin Muhammad Bobur tavalludiga bag'ishlangan viloyat tadbirlarida institut talabalari faol qatnashib, teatr sahnalari va adabiy chiqishlar bilan tomoshabinlar e'tirofiga sazovor bo'ldi.
Shuningdek, institut talaba-yoshlaridan iborat jamoa “Yurtim qadriyatlari” ko'rik-tanlovining hududiy bosqichida g'oliblikni qo'lga kiritdi.
Tibbiyot sohasi vakillari, ayniqsa, atrof-muhit obodligiga ham befarq emas. Ular ona tabiatni asrab-avaylashda doimiy tarzda faollik ko'rsatib, turli xayrli aksiyalarda ishtirok etmoqda. Qolaversa, yaqinlashib kelayotgan Navro'z — umumxalq bayramiga ham tayyorgarliklar avj pallada davom etmoqda. Unda manzillar obod qilinib, rang-barang gullar va daraxt ko'chatlari ekilmoqda.
Shunday boy tarixga ega Andijon davlat tibbiyot instituti bugungi kunda nafaqat ta'lim maskani, balki ilm-fan, innovatsiya va tibbiyot taraqqiyotining muhim markaziga aylangan.
Kelgusida ham institut jamoasi zamonaviy ta'lim texnologiyalari, xalqaro hamkorlik va ilmiy izlanishlar asosida faoliyatini yanada rivojlantirib, yurtimiz uchun fidoyi, bilimli va malakali shifokorlar tayyorlash yo'lida xizmat qilishda davom etadi.
Madamin MADAZIMOV,
Andijon davlat tibbiyot
instituti rektori,
professor.