Ilm egallash siri

Odamlar ko'p narsani o'zlari tasavvur qilgan holatda tushunadilar. Ya'ni mohiyatni anglamay turib nimagadir tezroq, osonroq erishgilari keladi. Yoppasiga diplomli bo'lishga intilish ham shuning bir ko'rinishi. Lekin ilmli bo'lish uchun xohishning o'zi yetarli emas.

Ilm — mashaqqat, tinimsiz o'rganish va o'zingizni qiynab, kerak bo'lsa, yerga urib, bilmaganlaringizni so'rash, muhimi, to'xtamaslikdir. Mana shu mashaqqatni boshdan kechiribgina chinakam bilimlilarni, ilmga intilayotganlarni qadrlashni, e'zozlashni, shu bilan birga, xokisorlikniyam o'rganasiz.

Mohiyat shundaki, xuddi tasavvuringizdagidek ilmli, ziyoli degan darajaga erishish uchun universitet diplomini olish yoki faqat chiroyli kiyinishning o'zi yetarli emas. Aksincha, chinakam ziyolilik o'zingizni (hatto diplomsiz ham!) ilm bilan qay darajada tarbiyalay olganingizda, ko'pchilik orasida o'zingizni qay darajada chiroyli tuta bilishingizda aks etadi.

Muhabbat ShARIPOVA.