Yangi O'zbekistonsan – mangu O'zbekistonsan!
Xalqim, Xudoyim bergan baxtingga ko'z tegmasin,
Sha'nu shavkat, shiddatu shahdingga ko'z tegmasin.
Hozirgi zamon guvoh, davron oson kelganmas,
Bundayin omon-omon zamon oson kelganmas.
Olam yaratilmishki, huraveradi itlar –
Yuragi qurum bosgan, o'yi buzuq, irkitlar.
Yarim yo'lda qolsin deb chalmoq bo'lar nokaslar,
Rizqu nasibangga chang solmoq bo'lar nokaslar.
Vatan ozod qalblarda yashnagay, mangu so'lmas,
Jondan kechmoq mumkindir, Vatandan kechib bo'lmas.
Mijja qoqmay ko'zlarni asragandek mujgonlar,
Vatanni asrash kerak – bo'lmoq kerak posbonlar.
Har bir o'g'lon, har bir qiz askar bo'lmog'i shartdir,
Birlashgan, ming-ming tuman lashkar bo'lmog'i shartdir.
Xasdek beqadr bo'lar yurtidan ayrilganlar,
Xor bo'ladi oqibat haq yo'ldan toyrilganlar.
Xatardan qo'rqqan nochor quyonlarga o'xshama,
Hiylakor gazandaga, chayonlarga o'xshama.
Dunyo – o'rmon, tuzoq ko'p, sen qadim ko'kbo'ri bo'l,
Laychalarning holi voy, sen hushyor bo'l, zo'ri bo'l!
Dunyoga uchgan qulning sho'ri qisadi bir kun,
Laxta-laxta qon yutar, qonlar qusadi bir kun.
Haqiqat quyoshiga tortib bo'lmaydi parda,
Xudo degan kishiga haqiqatdir sarkarda.
Xalqim, ko'ksimni o'yar ming bir xayol, ming bir o'y,
Qozon-tovoq, to'y-hasham, oshni maqtashingni qo'y.
Beruniylardan ilmu irfonni o'rgan avval,
Imom Buxoriylardan iymonni o'rgan avval.
Xorazmiyni o'qigil, hisobingni yo'qotma,
Termiziy darsini top. Kitobingni yo'qotma.
Nasafiy bobolarga umri joning baxsh ayla,
Naqshbandiy pirimning tariqini naqsh ayla.
Vatanda ozod, erkin bo'lib yashamoq kerak,
Zafarli yutuqlarga to'lib yashamoq kerak.
Maqsad mushtarak bo'lsa – birdamlik, birlik bo'lgay,
Ozodlik boqiy bo'lgay, abadiy hurlik bo'lgay.
Shukur, ilmga chanqoq tolib farzandlaring bor,
Har sohada peshqadam, g'olib farzandlaring bor.
Bo'ylariga tumor bo'l, jahonga bo'ylar ular,
Millatni o'ylar ular, Vatanni o'ylar ular.
Olam minbarlarida xitobi bor o'zbekning,
G'irotlarga munosib shitobi bor o'zbekning.
Ko'nglida asrorini g'animlarga aytmagay,
Tanlagan o'z yo'li bor, yo'lidan hech qaytmagay.
Onajon, yurak so'zim, bug'doy so'zimni aytay,
Tig'day so'zimni aytay, tug'day so'zimni aytay.
Hazrat bobolarimdan meros toza iymonsan –
Yangi O'zbekistonsan – mangu O'zbekistonsan!
G'ayrat MAJID