Haqiqat va ezgulikka intilib…
Oramizda shunday odamlar borki, ular o'z zimmasidagi vazifani ado etishga nafaqat bilimi va salohiyati, balki qalb qo'ri-yu mehrini ham baxshida etadi. Kasbiga bo'lgan sadoqati va fidoyiligi tufayli el-yurt orasida obro'-e'tibor topadi.
Ana shunday insonlardan biri — mana 14 yildirki, “Jizzax haqiqati” va “Djizakskaya pravda” gazetalariga rahbarlik qilib kelayotgan Bahodir Nazarovdir.
Bahodir Nazarov jurnalistlik faoliyatini viloyatning bosh nashri — “Jizzax haqiqati” gazetasida boshladi. Muxbir, katta muxbir, bo'lim mudiri, bo'lim muharriri hamda mas'ul kotib vazifalarida fidoyilik bilan ishlab, qalami o'tkir va shijoatli jurnalist sifatida el-yurtga tanildi.
Viloyat hokimligida mas'ul vazifalarda — referent, bosh mutaxassis, viloyat hokimining yordamchisi lavozimlarida samarali faoliyat ko'rsatib, viloyatimizning ijtimoiy-iqtisodiy rivojlanishiga munosib hissa qo'shdi.
2012 yilda Bahodir Nazarovning hayotida yangi davr boshlandi. Tajribali mutaxassis “Jizzax haqiqati” — “Djizakskaya pravda” gazetalariga bosh muharrir etib tayinlandi. Ana shu kundan boshlab tahririyat uning ikkinchi uyiga aylandi, desak, mubolag'a bo'lmaydi. Bosh muharrirning tashabbuskorlik va tashkilotchilik qobiliyati aynan shu yillarda yanada yorqinroq namoyon bo'ldi. Bu davr mobaynida u vohada o'ziga xos jurnalistika maktabini yarata oldi. Gazetalarning mazmun-mundarijasi tubdan o'zgarib, dizayni yangilandi. Tahririyat ish jarayoniga axborot-kommunikatsiya texnologiyalari keng joriy etildi. Zamonaviy raqamli tahrir tizimi yo'lga qo'yilib, gazetalarning veb-sayti va Telegram kanali tashkil qilindi. Zamon bilan hamnafas holda ishlayotgan gazetalarning ijtimoiy tarmoqlardagi rasmiy veb-sayti — “jizzaxnews.uz” hamda Telegram kanali — “t.me/jizzaxnews_press” faoliyati yo'lga qo'yildi. Gazetalarning veb-sayti va ijtimoiy tarmoqlardagi sahifalari faollashtirilib, onlayn kontent tayyorlash hamda tezkor axborot tarqatish amaliyotiga o'tildi.
Tahririyat o'z studiyasiga ham ega bo'ldi. Unda turli videomateriallar, davra suhbatlari, dolzarb mavzularda intervyular hamda yurtimiz taraqqiyotiga munosib hissa qo'shayotgan vatandoshlarimiz haqida ko'rsatuvlar tasvirga olinib, Telegram kanalida namoyish etib borilmoqda. Shuningdek, tahririyat zamonaviy kompyuter texnikasi, foto va videouskunalar hamda mobil jurnalistika vositalari bilan ta'minlandi. Raqamli arxiv yaratildi va materiallar bazasi shakllantirildi.
Gazetalar sahifalarida ko'plab yangi ruknlar tashkil etilib, viloyatda amalga oshirilayotgan keng ko'lamli ishlar, yangilanish va o'zgarishlar, muammolar atroflicha yoritildi. Tahririyatdagi har bir xodim yangicha ishlab, kreativ fikrlay boshladi. Natijada gazetxonlar sevib mutolaa qiladigan publitsistik janrdagi va tanqidiy-tahliliy maqolalar ko'paydi.
Bugungi kunda yurtdoshlarimiz mazmundorligi va dolzarbligi oshgan, sifat jihatdan o'zgargan gazetalarni sevib mutolaa qilmoqdalar. Viloyat nashrlarining respublikadagi eng yetakchi gazetalar qatoridan o'rin egallashida, albatta, soha fidoyisining xizmatlari beqiyos.
Shu o'rinda B.Nazarovning tashabbuskorligi va tashkilotchiligini eslab o'tish joiz. Uzoq yillar davomida tahririyat joylashgan “Matbuot uyi” binosi ta'mirga muhtoj ahvolda edi. 2018 yilda bosh muharrirning sa'y-harakati bilan “Matbuot uyi” binosi to'liq ta'mirlanib, zamonaviy ko'rinishga ega bo'ldi. Tahririyat xodimlari keng va yorug' xonalarda, qulay ish sharoitlarida ishlay boshladilar. Xodimlarning ijtimoiy himoyasi kuchaytirildi, faxriylarni qo'llab-quvvatlash ishlari namunali yo'lga qo'yildi.
Bugungi kunda Bahodir Nazarov yosh jurnalistlarni doimiy ravishda qo'llab-quvvatlab, ularga g'amxo'rlik qilib kelmoqda. Tahririyatda “Ustoz-shogird” an'anasi yo'lga qo'yilgan. Ustoz jurnalistlar yoshlarga ijodiy tajribasi va mahoratini o'rgatib kelmoqdalar. Shuningdek, tahririyat qoshida jurnalistika sohasiga qiziquvchi yoshlar uchun mahorat darslari va yosh ijodkorlar maktabi tashkil etilgan. Jizzax shahridagi Qozon federal universiteti filialining jurnalistika fakulteti hamda Hamid Olimjon va Zulfiya nomidagi ijod maktabi bilan hamkorlik yo'lga qo'yilgan. Nufuzli universitet filialining talabalari har yili tahririyatda amaliyot o'tashadi. Yosh ijodkorlar maktabi o'quvchilari bilan ijodiy uchrashuvlar va “Mahorat darslari” o'tkazib kelinmoqda. Bugungi kunda B.Nazarovning shogirdlari respublika nashrlari hamda axborot xizmatlarida muvaffaqiyatli faoliyat yuritmoqda.
Tahririyat so'nggi 5 yil davomida Oliy Majlis huzuridagi Fuqarolik jamiyati institutlarini qo'llab-quvvatlash jamoat fondi tomonidan e'lon qilingan tanlovlarda g'olib chiqib, 4 marta grant mablag'larini olishga muvaffaq bo'ldi. Shuningdek, B.Nazarov muallifligida “Jizzax haqiqati” va “Djizakskaya pravda” gazetalari chiqa boshlaganining 40 yilligiga “Qaynoq hayot solnomasi”, 50 yilligi munosabati bilan esa tahririyatda ishlab ketgan va hozirda faoliyat yuritayotgan ijodkorlar hayoti va faoliyatiga oid “Hayot bilan hamnafas” nomli kitoblar chop etildi.
B.Nazarov Xalq deputatlari viloyat kengashining deputati, Kengashning Korrupsiyaga qarshi kurashish va xavfsizlik masalalari bo'yicha doimiy komissiyasi raisi sifatida ham ko'plab xayrli ishlarni amalga oshirib kelmoqda. Uning deputatlik faoliyati bevosita saylovchilarning dardu tashvishlari bilan yashash, ularning muammolarini hal etish bilan bog'liq. O'tgan davrda deputat o'zi saylangan 23-Zafarobod tuman okrugi hududida keng ko'lamli ishlarni amalga oshirdi.
Zafarobod tumanidagi “Tinchlik” va “Cho'lliguliston” mahalla fuqarolar yig'inlarida “Obod xonadon – obod ko'cha – obod mahalla” dasturiga muvofiq ichki yo'llar to'liq rekonstruksiya qilindi. Zafarobod tumanini Paxtakor tumani bilan bog'lab turuvchi yo'l qayta ta'mirlandi. Deputatning sa'y-harakati bilan tumandagi “Birlik” va “Cho'lliguliston” mahalla fuqarolar yig'inlarida “Kambag'allikdan farovonlik sari” dasturi asosida lotoklar qurilib, aholi tomorqalari oqar suv bilan ta'minlandi. Bundan tashqari, deputatlik so'rovlari natijasida tumanda aholini gaz, elektr energiyasi va ichimlik suvi bilan ta'minlash, obodonlashtirish masalalari hal etildi. Ayni paytda u Zafarobod tumanini “Yangi O'zbekiston” qiyofasidagi hududga aylantirish bo'yicha kompleks ishlarni amalga oshirishda faol ishtirok etib kelmoqda.
Bahodir Nazarovning soha rivojiga qo'shgan hissasi davlatimiz tomonidan munosib taqdirlangan. Bugun uning ko'ksini O'zbekiston Respublikasi Mustaqilligining 10, 25 va 30 yilligi hamda “Ma'naviyat fidoyisi” ko'krak nishonlari bezab turibdi.
Bahodir Nazarov — oilaparvar inson. U turmush o'rtog'i Manzura Nazarova bilan uch nafar farzandni tarbiyalab voyaga yetkazdi. Farzandlari oliy ma'lumotli bo'lib, turli sohalarda samarali faoliyat ko'rsatib kelmoqdalar. Nevaralari esa ularning ardog'ida tarbiya topmoqda.
Shu yillar mobaynida u hayot yo'li yoshlarga ibrat bo'lgan ustoz jurnalist, el-yurt hurmatiga loyiq inson bo'lish baxtiga muyassar bo'ldi. Ustoz jurnalistga: “Ana shunday jo'shqin mehnatdan charchamang, har doim farzandlaringiz, nevaralaringiz, shogirdlaringiz va hamkasblaringiz qurshovida bo'ling”, — deymiz. El-yurt xizmati yo'lidagi serqirra faoliyatingizda omad yor bo'lsin! Yangi O'zbekistonimiz va uning jurnalistikasi uchun bundan buyon ham astoydil xizmat qilishga kamarbasta bo'lib yurishingizga tilakdoshmiz.
Vasil ILYoSOV,
“Jizzax haqiqati” gazetasi
bo'lim muharriri.