Chori xalil yo'lga tushdi
Inson nima uchun yashaydi? Bu mangu savolga javob berish uchun ko'pni ko'rgan donishmand yoki faylasuf bo'lish shartmi? Yozuvchi Qulman Ochilning “Sharq” nashriyot-matbaa aksiyadorlik kompaniyasi bosh tahririyati tomonidan chop etilgan “Xatar darbozasi” romani qahramoni Chori Xalil kabi tinib-tinchimagan jurnalist bo'lish kifoya qilar balki? Balki, o'zing mansub jamiyat, Vataning va oilang oldidagi burchingni anglab yetsang, javob o'z-o'zidan topilar?
“Xatar darbozasi” inson taqdiri haqida. Yurt kezishni, qo'shnisidan boshqa hech kim tanimaydigan odamlar haqida yozishni xush ko'radigan Chori Xalil boshidan kechirgan g'aroyib voqealarning aksariyatiga hayotda roman muallifi – O'zbekistonda xizmat ko'rsatgan jurnalist Qulman Ochilning o'zi guvoh bo'lgan. Kitobxonni hayratga solishga usta. Qahramonning boshiga tushgan og'ir savdolar, oshiq ko'ngilning muhabbat bobidagi iztirob va quvonchlari g'oyat samimiy, xalqona tilda, jozibali tasvirlangan roman zo'r maroq bilan o'qiladi. Mutolaadan esa, ulug'larimiz uqtirganlaridek, kim nimani izlasa, shuni topadi.
O'qing, toping va zavq oling: Chori Xalil yo'lga tushdi. Yurt kezishni yaxshi ko'rsa, nima qilsin!..
Azizbek SALIM