Aholi uchun zamonaviy qulayliklar

Mamlakatimizda plastik kartalar orqali naqd pulsiz to'lovlarni amalga oshirish aholi uchun qulay bo'lib qoldi. “Asaka” bank ham o'z mijozlariga yengillik yaratish maqsadida plastik kartalardan foydalanishda tez va oson usullarni joriy etmoqda.

Yaqinda bank muassasasida “Plastik kartalarga xizmat ko'rsatish, ularning turlari va afzalliklari” mavzuida matbuot anjumani bo'lib o'tdi.

Bugunga kelib, bank muomalaga chiqargan plastik kartalar soni 2.0 mln. donani tashkil etadi, o'rnatilgan terminallar soni esa 12 mingtadan oshdi. To'lovlar tizimini rivojlantirishda jami 2,5 ming dona “Xumo” terminallari o'rnatilib, 51 ming dona “Xumo” to'lov kartalari muomalaga chiqarildi. 2019 yilning sentyabri­dan boshlab ushbu kartalarga overdraft kreditlarini ajratish joriy qilindi.

— Bankimizning barcha filiallarida tunu-kun ishlaydigan 20 ta — 24/7 shoxobchalar va turli mehmonxonalarda 189 ta bankomat hamda infokioskalar mijozlarga xizmat ko'rsatib kelmoqda, — dedi bank boshqaruvi raisi o'rinbosari Boboxon Abdullayev. — Joriy yilning 31 dekabriga qadar 24/7 shoxobchalarining sonini 40 taga, bankomat va infokioskalarni esa 266 taga yetkazish rejalashtirilgan. Mijozlarga qulaylik yaratish va masofaviy xizmatlar ko'lamini kengaytirish maqsadida bankimiz tomonidan “Asaka mobile” mobil ilovasi joriy qilingan. Ushbu ilova orqali kartadan kartaga pul o'tkazish, onlayn omonat ochish, onlayn konversiya amaliyotini o'tkazish, kreditlarni so'ndirish, kommunal, byudjet, soliq, internet va boshqa xizmatlar bo'yicha to'lovlarni o'tkazish imkoniyati mavjud.

Respublikamizda turizmni rivojlantirish va turistlarga qulay shart-sharoitlar yaratish maqsadida “Asaka” bank tijorat banklar o'rtasida birinchilardan bo'lib “Master Card”, “Union Pay” va “UzCard” to'lov tizimlariga bankomat yoki terminalda xizmat ko'rsatish amaliyotini joriy qildi. Bankomatlar “HUMO” hamda “VISA” kartalariga xizmat ko'rsatadi.

Nargiza Bobomurodova,

“Hurriyat” muxbiri.

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

thirteen − 1 =