Bahona jinoyatni oqlamaydi
Insonda mas'uliyat hissi bo'lmasa, na yaqinlari, na qonun oldidagi burchini anglamas ekan. Farg'ona viloyati Quva tumanida yashovchi Musaffoxon Hojimatov oilasi bilan ajrashgan va farzandlari uchun ajratilgan 12 million so'm miqdoridagi alimentni to'lamay qochib yurgan. Yaqinlarning ta'qibidan qochib qutulish mumkindir, lekin sud qarorini bajarmay uzoq vaqt yurishning iloji yo'q.
Shu ma'noda, ijroni ta'minlash maqsadida, uning uyiga borgan majburiy ijro byurosi Quva tumani bo'limi xodimi O'.To'lqinjonovga M.Hojimatov qarshilik ko'rsatib, temir jism bilan unga tan jarohati yetkazgan.
U zo'ravonlikning oqibatida avvalgidan ham yomonroq vaziyatga tushdi. M.Hojimatov O'zbekiston Respublikasi JK 105-moddasi 2-qismi “v” bandi va 219-moddasi 2-qismi bilan aybdor deb topildi. Unga tegishli jinoyat ishi Tolmozor mahalla fuqarolar yig'ini binosi, ochiq sud majlisida ko'rib chiqildi. Sud unga 3 yilu 6 oy muddatga ozodlikni cheklash jazosini tayinladi va undan jabrlanuvchi O'.To'lqinjonov foydasiga 7922000 so'm miqdoridagi moddiy zararni undirish belgilandi.
Elyorjon Abduraimov ham Quva tumanida yashagan. Hali o'ttizga to'lmagan bu yigit uyidagi 180 m2 ekin maydoniga besh tup “nasha” o'simligini ekib, parvarishlab kelgan. Bu ishi qonunga xilof ekanini yaxshi bilgan, albatta. Lekin unga buyam kamlik qilgan shekilli, tumandagi “Guliston” MFY hududi ariq bo'yida o'sib chiqqan, yovvoyi holdagi “nasha” giyohvandlik o'simligini ham yulib olib kelgan va uyida quritib qo'ygan.
Quva tuman “Guliston” MFY tomonidan berilgan yozma xabarga ko'ra, joriy yil 5 oktyabr kuni tuman IIB xodimlari E.Abduraimovning hovlisidagi ekin maydonini ko'zdan kechirishganda, u ekib parvarishlayotgan besh tup “kannabis” o'simligi va xonadon ayvonidagi xas-xashaklar orasida saqlanayotgan, quritilgan holdagi giyohvandlik moddasi ashyoviy dalil tariqasida olingan.
Shu yil 19 noyabr kuni jinoyat ishlari bo'yicha Quva tuman sudi, sayyor sud majlisida ushbu ish ham ko'rib chiqildi.
Sudlanuvchi E. Abduraimov o'ziga e'lon qilingan ayblovga to'liq iqror bo'ldi. O'z qilmishiga bir qator vajlarni sabab qilib ko'rsatdi. “Otam vafot etgach, oilaviy qiyinchiliklarga uchrab, spirtli ichimliklar ichishga berilib qoldim”, deydi u. Uning aytishicha, alkogol sog'lig'ini og'irlashtirib qo'ygach, ikki yil avval ariq yoqalarida yovvoyi holda o'sadigan “nasha” giyohvandlik o'simligini ko'rib qoladi. Shundan so'ng ushbu modda uning ermagiga aylanadi va hovlisida o'zi uchun ekib parvarishlaydi. Afsuski, bu ermak unga qimmatga tushdi. Sud hukmi bilan uch yilu olti oylik ozodlikdan cheklash jazosi tayinlandi.
Hayotning past-balandiga duch kelmaslikdan hech kim kafolatlanmagan. Taqdir sinovlari, har xil tashvishlar har bir insonning boshida bo'lishi mumkin. O'zining irodasizligini turli bahonalar bilan oqlashi esa kap-katta yigitning ishi emas, albatta. Holbuki, Elyor kabi yo'l tutadiganlar bu illat bilan yaqinlariga, oilasiga nechog'li zarar yetkazayotganlarini anglashlari zarur edi. Qilmish-qidirmish deydilar. Jinoyatga jazo muqarrar. Endi hamma gap o'z qilmishiga yarasha jazoga tortilgan bu insonlar, qo'ygan qaltis qadamlaridan to'g'ri xulosa qiladilarmi? Kun kelib, ozodlikka chiqishgach, to'g'ri hayot kechiradilarmi? Hamma gap shunda.
Zafarjon Omonov,
jinoyat ishlari bo'yicha Quva tuman sudi raisi.