Dunyoni lol qoldirgan o'zbek doirasi
O'zbek milliy madaniyati va san'atida doirachilik maktabining alohida o'rni bor. Shu munosabat bilan “O'zbekkonsert” davlat muassasasida o'zbek doira san'atining dunyoga tanilishida katta hissa qo'shgan san'atkor, O'zbekiston Respublikasida xizmat ko'rsatgan artist, doira zarbi ustasi Abbos Qosimov bilan uchrashuv bo'lib o'tdi.
O'z ijro yo'nalishiga ega san'atkor “teskari zarb” ijrochilik yo'lidan foydalanib, yurtimizda ilk bor karnay-surnay, nog'ora kabi milliy sozlarimizning imkoniyatlari naqadar kengligini butun dunyoga namoyish qildi. Mohir doirachi yig'ilganlarga chet eldagi faoliyati haqida so'zlab berdi.
Abbos Qosimov doirachilik san'atida sodda ijrochilik yo'lidan emas, murakkab yo'nalishni tanlagan holda doirachilikni xalq qalbiga singdira oldi. U professional ijrochi sifatida ham yuksak badiiy asarlar yaratgan. Tinimsiz izlanishlari, mashaqqatli mehnati, san'atga fidoyiligi, kuchli irodasi tufayli bugun nafaqat yurtimizda, balki dunyoning ko'plab mamlakatlarida o'zbek milliy san'ati, madaniyati dovrug'ini olamga taratmoqda. Bundan tashqari, u doira ijrochilik san'atida alohida maktab yaratgan ustoz sifatida xorijiy davlatlarda ham ko'plab shogirdlar yetishtira oldi.
— Bundan bir necha yil ilgari “Abbos” guruhini tashkil etib, yurtimizdagi turli darajadagi tadbirlar bilan bir qatorda, chet ellardan ham muxlislar orttirdik, — dedi Abbos Qosimov. — O'zbek doirachilik maktabi an'analarini salkam 15 yil xorijdagi muxlislarimizga taqdim etdik. Yoshlikdagi orzuimga qiyinchilik bilan erishgan bo'lsam-da, meni va guruhimni qo'llab-quvvatlaganlarga o'z minnatdorligimni bildiraman. Yaqinda muhtasham “Xalqlar do'stligi” san'at saroyida, yurtimiz tarixida ilk bor, doira va zarbli cholg'ular ishtirokida konsert dasturi taqdim etmoqchimiz.
“Zarb shou” deb nomlanadigan konsert dasturida nafaqat hamyurtlarimiz, balki AQSh, Tailand, Turkiya, Ozarbayjon va qo'shni davlatlardan ham mehmonlarning tashrifi ko'zda tutilgan. Konsert shou tarzda namoyish etilib, unda taniqli xonandalarning chiqishlari ham rejalashtirilgan.
Hikmatullo Xo'jaqulov.