Taqvimdagi va yonimizdagi bayramlar
Yonimizda, qalbimizda, yurtimizda bayramlarning borligi qanday yaxshi. Biz bayramlar sabab taqvimlardagi va hayotimizdagi yarqiragan sanalarni yaxshi ko'ramiz. O'sha biz qadrlagan sanalardan biri – 27 iyun Matbuot va ommaviy axborot vositalari xodimlari kuni sanaladi.
Qalamning uchidan to'kilgan mayda-mayda so'zlardan tartiblangan maqola-yu reportajlar ortidan ro'zg'or tebratish hammaga emas. Zero, buning orqasida jasur so'z, hamma vaqt o'zimiz bilan birga yurgan vijdonimiz hamda umidvor ishonchlarimiz turadi. Bugun shu kasb egalari bayramidan o'zim ham xursand bo'lar ekanman, hayotning eng oppoq tomonini, turmushning parda ortidagi osoyishtaliklarini ko'rishni istayman.
Bugungi kunda O'zbekistondagi so'z erkinligi, axborot almashinuvi, jamiyatning atrofdagi voqea-hodisalarga o'z fikri va qarashi shakllanib borayotganligi xorijiy davlatlar vakillari tomonidan qayd etilayotganining bir qancha omillari bor.
Jumladan, O'zbekiston Respublikasi Prezidentining shaxsiy tashabbusi bilan aksariyat sohalar, xususan, ommaviy axborot vositalari faoliyatida ham e'tirofga loyiq qator yangiliklar joriy etilganini olsak, birgina “Ommaviy axborot vositalari mustaqilligini ta'minlash hamda davlat organlari va tashkilotlari axborot xizmatlari faoliyatini rivojlantirish bo'yicha qo'shimcha chora-tadbirlar to'g'risida”gi qarori ayni yo'nalishdi katta burilish yasadi, desak to'g'ri bo'ladi.
Mazkur hujjat bilan nafaqat jurnalistika, balki davlat va xo'jalik boshqaruvi organlari, mahalliy davlat hokimiyati organlarining OAV bilan hamkorlik va aholini xabardor qilish sohasidagi faoliyati yangi, yanada samaraliroq pog'onaga chiqdi. Davlat organlari va tashkilotlari axborot xizmatlari, matbuot markazlari, jamoatchilik bilan aloqalar bo'yicha xizmatlarining asosiy vazifalari aniq belgilab olindi. Mazkur soha rahbarlarining maqomi va nufuzi oshirildi. Aytish joizki, ish tartibi o'zgarishi mehnatdan qoniqish hissini paydo qildi.
Bundan tashqari, axborot siyosati sohasidagi vazifalarni amalga oshirishda O'zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi bilan amaliy hamkorlik yo'lga qo'yildi. Natijada jurnalistlar bilan izchil hamkorlik, tezkor ma'lumotlar tarqatish, normativ-huquqiy hujjatlar loyihalarini muhokama qilishda keng aholi qatlamlarining ishtirokini ta'minlash borasidagi ishlar to'liq yo'lga qo'yilib, o'zining ijobiy samarasini bermoqda. Shu orqali media makonda noxolis va noto'g'ri ma'lumotlar tarqalishi holatlari o'z vaqtida bartaraf etilyapti.
Imkoniyatdan foydalanib, davlat, jamiyat hamda zamonning o'zi oldimizga qo'yayotgan o'ta muhim va mas'uliyatli vazifalarni amalga oshirishda barcha ommaviy axborot vositalari vakillari, axborot siyosati sohasida ish yuritayotgan hamkasblarimizga sihat-salomatlik, kuch-g'ayrat hamda ulkan zafarlar tilayman.
Hayot Shamsiddinov,
O'zbekiston Respublikasi Bosh prokuraturasi
Matbuot kotibi.