Yana bahor keldi…

Yana bahor keldi,

                       yana qalb yonar,

Yana gul pallasi,

                    yana ishq fasli,

Uzoqliklar sari

                    ko'ngil tolpinar.

Yana ichda jo'shar

               hislarning masti…

 

Ufqlar imlaydi,

                 ko'k ham, bulut ham,

Gunafsha ko'zida

                       yonar jonli his,

Daraxtlarga guldan

                 toj qo'ygan ko'klam,

Ishqim yupatsa-chi…

                    yo'q, mendan olis!

 

Ariqlarda lim-lim oqadi

                                     sho'x suv,

Yo'q, suv emas, oqar jonli,

                                   hur qo'shiq,

Bog'larni quchgan

                         bir oltin uyqu

Har yonda go'zallik,

                 har yon baxt to'liq.

 

                                             OYBEK

1929 yil, aprel

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

fourteen − 7 =