Kimni tanqid qilsang, shu mukofot bersa…

Abror ZOHIDOV,

Eng yaxshi jurnalistik material uchun (internet-jurnalistika)

1-o'rin sohibi, “Kun.uz” muxbiri:

3 may – Jahon matbuoti erkinligi kunida jurnalistika sohasidagi “Oltin qalam” XV milliy mukofotining internet jurnalistikasi yo'nalishida faxrli 1-o'ringa munosib ko'rildim. O'zim to'g'rimda bahoni boshqalar berar, men jamoadoshlarim bo'lgan ikki ukalarimning ham bu anjumanda sovrindor bo'lganiga e'tibor qaratmoqchiman.

“Kun.uz”ning men kabi vakili bo'lgan Jamshid Niyozov tanlovning “Tashqi ishlar vazirligi faoliyatini eng yaxshi yoritgani uchun” nominatsiyasi bo'yicha g'olib bo'ldi. Qizig'i, Jamshid Niyozov pandemiya davrida xorijdagi yurtdoshlarimizni qaytarish bo'yicha Tashqi ishlar vazirligini muntazam tanqid qilib kelgandi.

Ikkinchi hamkasbim Ilyos Safarov esa tanlovning Vazirlar Mahkamasi huzuridagi O'zbek tilini rivojlantirish jamg'armasi tomonidan ta'sis etilgan “Davlat tilini rivojlantirishga qaratilgan eng yaxshi material uchun” nominatsiyasi bo'yicha g'olib deb topildi. Ilyosbek ukamiz ham o'zbek tilining rivoji bo'yicha tanqidiy materiallari bilan tanilgan jurnalistlardan.

Ya'ni, “Oltin qalam” tanqidni to'g'ri qabul qila olganlar va hatto rag'batlantira bilganlar tomonidan taqdim qilinishida chuqur ramziy ma'nolar ko'rmoqdaman. Bu ham ochiqlik siyosatining o'ziga xos qadami bo'la oladi.