Bog'dagi boqibeg'amlik
O'zbekiston Ekologik partiyasi Markaziy Kengashi, partiyaning Toshkent shahar hamda Olmazor tuman tashkilotlari mas'ullari, Ekologiya va atrof-muhitni muhofaza qilish bo'yicha inspektorlar, Xalq deputatlari Shayxontohur tuman Kengashi deputatlari, hududda istiqomat qiluvchi aholi vakillari ishtirokida poytaxtimizning Abdulla Qodiriy nomidagi madaniyat va istirohat bog'ining bugungi kundagi holatini o'rganish maqsadida ekologik reyd o'tkazildi.
Reyd davomida mazkur bog'ning qarovsiz ahvoldaligi bu yerdagi aksariyat manzarali daraxt va o'simliklar o'z vaqtida sug'orilmagani oqibatida qurib qolgani, bu jarayon boshqa daraxt turlarida endi boshlanayotgani, yanada achinarlisi yaqin yillar davomida o'z ko'rki va chiroyi bilan insonlarni o'ziga jalb qilgan mazkur bog' bugunga kelib, yong'in kelib chiqishi mumkin bo'lgan chiqindixonaga aylangan.
Bog'dagi bunday holatning yanada achinarli tus olishiga yaqinda ushbu hududdagi avtomobillarni vaqtincha saqlash maydonida sodir bo'lgan yong'in ham sabab bo'lgan.
Ekologik reydning natijasi bo'yicha shu yerning o'zida mas'ullar ishtirokida bayonnoma rasmiylashtirildi.
Abdulla Qodiriy nomidagi madaniyat va istirohat bog'ining investorlarga taqsimlab berilgan qismlarida daraxtlarning qurib qolishi va chiqindilar bilan to'lib borayotgani bo'yicha rasmiy ogohlantirish xati va qonuniy tartibda chora ko'rilishini O'zbekiston Ekologik partiyasi qat'iy talab qiladi va nazoratga oladi.
Ekopartiya tomonidan shahardagi madaniyat va istirohat bog'larining holatini o'rganish bo'yicha maxsus reja tuzilib, ekologik reydlar boshqa manzillarda ham izchil davom ettiriladi.
Akbarjon Abduraimov,
O'zbekiston Ekologik partiyasi
Markaziy kengashi matbuot xizmati rahbari.