Ипак опа

Муяссархон Тожибоева Фарғона туманидаги Новкент қишлоғида туғилган. Болалигиданоқ ҳар йил баҳорда боқиладиган ипак қурти парваришига қизиқиш, бу мўъжизакор юмушга меҳр унинг қалбига ўт солди. Мактабни битиргач, бу “чўғ” уни Наманган қишлоқ хўжалиги техникумига бошлаб келди. Техникумнинг ипакчилик йўналишини муваффақиятли тамомлаб, меҳнат фаолиятини Фарғонадаги “Пилла наслчилик” МЧЖда агрономликдан бошлади. 1991 йил Фарғона туман пиллачилик ширкатига бош агроном бўлиб ишга ўтди.

Қарийб қирқ йилдан буён туманда пиллачилик соҳасида фаолият юритиб келаётган Муяссархон опанинг меҳнатлари муносиб баҳоланиб, у мамлакатимиз мустақиллигининг 30 йиллиги арафасида “Ўзбекистон Рес­публикасида хизмат кўрсатган пиллакор” унвони билан тақдирланди.

– Бу юксак унвон зиммамга янада улкан масъулият юклаши табиий, – дейди пиллакор опа. – Президентимиз пиллачиликни ривожлантиришга катта эътибор қаратмоқда. Секин-ас­та бир йилда икки ҳатто уч марта ипак қурти парваришлаш йўлга қўйилмоқда. Қувонарлиси, пиллакорларимизга ўз вақтида ҳақ тўланяпти. Бу кейинги йилларда янада ғайрат билан меҳнат қилишимизга замин яратади, албатта.

Ҳозирги кунда 17 нафар агрономга бошчилик қилаётган Муяссархон Тожибоева туманда 91,7 гектар тут плантацияси ташкил этиш, уларга ўз вақтида агротехник ишлов бериш ҳаракатида. Бу йил 2837 та хонадонда ипак қурти парваришланиб, 161 тонна (бир мавсумда) “кумуш тола” етиштирилди.

– Аслида пиллачиликда йил-ўн икки ой тиним бўлмайди. Тут плантациялари парвариши, ипак қурти боқиш учун шарт-шароит яратиш, пиллачилик кластери билан ишлаш, ҳосилни йиғиб олиш ва бошқа юмушлар бир дам бўлсин, тин олишга йўл бермайди. Меҳнаткаш халқимиз бор бўлсин, – дейди опа. – Барча машаққатлар кумушдек товланган пиллани ҳовучингга олганингда унут бўлади. Айниқса, қизларимиз эгнида товланиб турган атласни кўрганда янада фахрланиб кетасан.

Фарғонада ипакчилик тармоғи йилдан-йил ривожланиб боряпти. Маҳсулотга талаб эса ошиб боряпти.

Дарвоқе, узоқ йиллардан буён соҳада меҳнат қилиб келаётгани учунми, мулойим, хушмуомалалик­лари боисми, Муяссархон опани ҳамкасблари “Ипак опа” деб чақиришади.

Шерзод ҚОРАБОЕВ