Oqoltinda ochiq osmon ostida
O'zbekiston Jurnalistlari ijodiy uyushmasi Sirdaryo viloyat bo'limi, Respublika Ma'naviyat va ma'rifat markazining viloyat bo'limi hamda viloyat xalq ta'limi boshqarmasi bilan hamkorlikda Oqoltin tumanida O'zbekiston Respublikasi Prezidentining 2021 yil 26 martdagi “Ma'naviy-ma'rifiy ishlar tizimini tubdan takomillashtirish chora-tadbirlari to'g'risida”gi qarori ijrosi asosida “Ijodiy targ'ibotchilar ishini qanday qilib yangi pog'onaga ko'tarish mumkin?” mavzusida tumandagi 13-sonli maktabda “Ochiq osmon ostida mahorat darslari” tadbiri tashkil etildi.
Unda O'zbekiston Jurnalistlari ijodiy uyushmasi viloyat bo'limi raisi Boyjigit Abdullayev, Respublika Ma'naviyat va ma'rifat markazi viloyat bo'limi rahbari Murodjon Hayitov, viloyat xalq ta'limi boshqarmasi vakillari, Guliston davlat universiteti professori Ravshanbek Mahmudov va umumta'lim maktablarida mehnat qilayotgan ijodiy-madaniy targ'ibotchilar ishtirok etishdi.
Dastlab, ushbu maktabda maktabning ijodiy-madaniy targ'ibotchisi Bahrom Boymurodov tashabbusi bilan tashkil etilgan O'zbekiston Badiiy Akademiyasi tasarrufidagi Sirdaryo ixtisoslashgan san'at maktab-internati Amaliy grafika va dizayn bo'limi o'qituvchisi Dildora Hamidova va shu guruh o'quvchilarining ijodiy ko'rgazmasi namoyish etildi.
Shundan so'ng, shu yilning aprel oyidan umumta'lim maktablarida joriy etilgan ijodiy-madaniy targ'ibotchilar shtati, shu asosda mehnat qilishayotgan targ'ibotchilarning vazifalari, ularning faoliyatlari tahlil qilindi, kerakli tavsiyalar berildi. O'zaro foydali fikr almashuv ruhida o'tgan tadbir ishtirokchilarga ma'qul bo'ldi.
G'ulom PRIMOV,
“Hurriyat” muxbiri