Bayram hazillari
“Tafakkur” jurnali Bosh muharriri — Erkin A'zamga
Donishmandlik qonida bor,
Qonidamas jonida bor.
Asarlarin dunyo o'qir,
O'qimagan bo'lar so'qir.
“Tafakkur”da tafakkur qil,
Biror sonin qoldirmagil.
Obuna bo'l o'z vaqtida,
Erish mushtariy baxtiga.
O'zbekiston Milliy teleradiokompaniyasi raisi — Alisher Xadjayevga
Sifatlari ozmas, to'p-to'p,
Yana kanallari ko'p.
“Yoshlar”zo'rmi, yo “1”chi,
Qani o'ylab bir ko'ring-chi?..
“Jahon adabiyoti” jurnali Bosh muharriri — Ahmadjon Meliboyevga
Ustoz erur yoshi katta,
Yozganlarin toshi katta.
Sho'xliklarin quvgani yo'q,
Unvonini “yuvgani” yo'q.
“Zarafshon” gazetasi Bosh muharriri, senator — Farmon Toshevga
Juda kamtar, kamsuqum,
Birov demas: “Amaldor”.
O'ylamaydi obunani,
“Hokim bor-ku, ne g'ami bor?!”
“XXI asr” gazetasi Bosh muharriri —Norqobil Jalilga
Yaxshilikni yaxshi ko'rar,
Ezgulikdan suyunadi.
Ijod desa xursand doim,
Muammo deb kuyinadi.
Tadbirkorlar qanotidir,
Gazeti-ku katta minbar.
“Go'sht ko'p yemang” deganlarga,
Murosa ham qilmas minba'd.
O'zA Bosh direktori — Abdusaid Ko'chimovga
Dars beradi hammaga,
Kerak bo'lsa ammaga.
O'zA o'zi shunday dargoh—
Tarqatadi hammaga.
“Guliston” jurnali Bosh muharriri — Mamatqul Hazratqulovga
Jiddiy odam o'zlari,
Ma'nolidir so'zlari.
Ilhom bo'ldi zo'r doya,
Yozdi qissa, hikoya!
O'zbekiston Jurnalistika va ommaviy kommunikatsiyalar universiteti rektori, Xalqaro Press-klub rahbari — Sherzodxon Qudratxo'jaga
Unga sifat bedorlik,
Hazil gapmi rektorlik.
Goh ulovda, goh oyoqda,
Goh u yoqda, goh bu yoqda.
Judayam ko'p safari,
Unga kerak “Ferrari”.
“Sharq yulduzi” va “Zvezda Vostoka” jurnallari Bosh muharriri —Sirojiddin Raufga
Shoirlarning zo'ridir,
Tahrirda ham benazir.
Huzuriga borsangiz,
Deydi: “Keling, xo'sh, taqsir”…
Hoji akamga gap yo'q,
Jurnalxonlar ko'ngli to'q.
O'tayotgan bu yilda,
“Podpiska”dan ko'ngli to'ldi,
Lekin hali bilmas sira,
Yangi yilda ne bo'ldi?
ATB “Qishloqqurilishbank” Boshqaruv raisining matbuot kotibi-Axborot siyosati masalalari bo'yicha maslahatchisi — Shuhrat Orifga
Deydi men shoirman, bankir emasman,
She'rni bilmaganni odam demasman.
Deydi pulni emas, yaxshi ko'raman gulni.
Sayrataman bulbulni, yomon ko'raman kulni.
Qaramaydi jononlar, nima qilay yoronlar?
O'zim ham bilmayman, nimalar dedim,
“Men odam emasman asli yor edim,”
Ko'ring, kitobimning nomi shul,
Lekin ziyon qilmas, bo'lsa pul.
“Nuroniy” gazetasi Bosh muharriri —Shuhrat Dehqonovga
Noiblikdan zerikdi u,
Ne qilsam deb o'ylab qoldi.
Yosh bo'lsa ham tinchlik istab,
“Nuroniy”ga o'tib oldi.
Rejasida ne borligin,
Birov bildi, birov yo'q.
Namanganlik bo'z bola-da,
Kelajakdan ko'ngli to'q!
“Yangi O'zbekiston” va “Pravda Vostoka” gazetalari Bosh muharriri — Salim Doniyorovga
Fe'li shunday: og'ir-bosiq,
Ustozlarin yaxshi ko'rar.
Ichmaydi ham, chekmaydi ham,
Bayramlarda “yuzta” urar.
“Pravda Vostoka” ko'hna juda,
“Yangi O'zbekiston” yap-yangida.
Ularga men boshman deydi,
Hali o'zim yoshman deydi.
“Qishloq hayoti” gazetasi Bosh muharriri — Chori Latipovga
O'zi qishloq odami,
Tuzuk edi qalami.
“Majburiy obuna” deyilgach,
Oshib ketdi alami…
“Ishonch” va “Ishonch-Doverie” gazetalari Bosh muharriri — Husan Ermatovga
Gazeti zo'r, o'zi ham zo'r,
“Doverie”dan chiqqan emas.
“Ishonch” bo'lsa, bari bo'lar,
“Obuna” deb bosh qotirmas.
“O'zbekiston adabiyoti va san'ati” gazetasi Bosh muharriri — Salim Ashurga
Salim aka – salim odam,
G'irrom qilmas, halim odam.
She'r ishqida yonar o'zi,
Gullardadir ikki ko'zi.
Ko'p joylarda ishladi u,
Dovonlarni oshib o'tdi.
“Adabiyot va san'at” debon,
Orzusiga mana yetdi.
“Ovozi tojik” gazetasi Bosh muharriri — Sherpo'lat Vakilovga
O'zbekchani “qotiradi”,
Yaqin ulfat , jo'radir.
Agar devor bo'lmasa,
Ko'chaniyam ko'radir.
“Inson va qonun” gazetasi Bosh muharriri— Qo'chqor Norqobilga
Afg'on mavzusi yopildi,
Guldur-gup.
Lekin tinmay yozadi,
Mavzu ko'p…
O'ylab ko'rsa yaxshi ko'rar,
Muharrirning zotini.
Chunki o'zi muharrir,
Muharrirdir xotini…
“Nurlы jol” gazetasi Bosh muharriri — G'ulomzakir Yusupovga
“Gazetam eng o'qishli” der,
Keriladi misli sher.
Lekin bitta “aybi” shulki,
Tinim bilmay to'kar ter.
“Kitob dunyosi” gazetasi Bosh muharriri — Xosiyat Rustamovaga
Bu chehrani dunyo bilar,
Muxlislar ham bilyapti.
Goh Turkiya, goho Xitoy,
Amirqodan kelyapti…
“Mahalla” gazetasi Bosh muharriri — Baxtiyor Abdusattorovga
Kimdan xafa, kimdan xursand,
Birovga sir aytmaydi.
Va'da bersa, o'sha gap-gap,
So'zidan hech qaytmaydi.
Vazirlikdan gina qilar,
O'pka qilar, kina qilar.
Obunaga moshin qo'yib,
Qolmasin-da faqat kuyib…
“Saodat” jurnali Bosh muharriri — Munavvarxon Usmonovaga
She'rlarini o'qisangiz,
Uzoqqa hech ketolmaysiz.
Orzu qilmang o'zaman deb,
Opaga hech yetolmaysiz.
Bayram hazillari
tahririyat ijodkorlari tomonidan
hashar usulida yozildi.