Taraqqiyot strategiyasi: Inson qadri uchun 100 ta maqsad
Prezidentimiz tomonidan mamlakatimizda inson qadr- qimmati, uning manfaatlari, huquq va erkinliklarini ta'minlash, tadbirkorlik va ishbilarmonlikni yanada rivojlantirish, ta'lim va tibbiy xizmat sifatini oshirish, qisqacha aytganda davlat va jamiyat hayotining barcha sohalarini yangi bosqichga olib chiqishni o'zida aks ettirgan “2022-2026 yillarga mo'ljallangan Yangi O'zbekistonning taraqqiyot strategiyasi to'g'risida”gi Farmon imzolandi.
Keyingi besh yilga mo'ljallangan mazkur Taraqqiyot strategiyasi jami 7 ta yo'nalish, 100 ta maqsaddan iborat.
Taraqqiyot strategiyasi loyihasi ommaviy axborot vositalari hamda ijtimoiy tarmoqlar orqali aholi va keng jamoatchilik muhokamasidan o'tkazildi. Ushbu jarayonda jami 17 mingdan ortiq taklif, 300 dan ortiq yangi tashabbus kelib tushgan. Viloyatimizning faol fuqarolari ham 2 mingga yaqin taklif va tavsiyalari bilan ishtirok etgan. Bu mamlakatimizda erkin fuqarolik jamiyatining rivojlanayotganligidan dalolatdir.
“Inson qadri uchun” tamoyili asosida xalq bilan ochiq muloqot natijalari hamohangligida tayyorlangan ushbu strategiyaning pirovard maqsadi barcha sohalarni rivojlantirish orqali xalqimizning farovonligini oshirish va kundalik hayotidagi muammolarni hal etishga qaratilgani bilan ahamiyatlidir.
Davlat boshqaruvi organlari faoliyatini “fuqaroga xizmat qilishga yo'naltirish” tamoyili asosida transformatsiya qilish orqali, davlat idoralari faoliyatining barcha yo'nalishlarini “Davlat – xalq xizmatchisi” tamoyili asosida fuqaroga to'g'ridan-to'g'ri xizmat ko'rsatishga yo'naltirilayotganligi ham aholi manfaatlarini o'ylab amalga oshirilayotgan islohotlarning yaqqol namunasidir. Albatta, strategiyani ishlab chiqib tasdiqlash bir tomon bo'lsa, uning ijrosini o'z vaqtida va sifatli ta'minlash ikkinchi muhim masala hisoblanadi.
Farmonning 25-bandida Adliya vazirligi, Hisob palatasi, “Taraqqiyot strategiyasi” markazi va “Yuksalish” umummilliy harakatiga Taraqqiyot strategiyasi va Davlat dasturlari amalga oshirilishining borishini tizimli monitoring qilish, uni sifatli va o'z vaqtida bajarish uchun qo'shimcha choralar ko'rib borish bo'yicha muhim vazifalar yuklatildi.
Shuningdek, ta'sirchan jamoatchilik nazoratini amalga oshirishning tashkiliy-huquqiy asoslarini takomillashtirgan holda, ayrim davlat funksiyalarini amalga oshirish jarayoniga jamoatchilik nazorati sub'yektlarini keng jalb qilish, davlat organlari faoliyatini o'rganishda ijtimoiy so'rovlar o'tkazish hamda aniqlangan kamchiliklarni ochiq muhokama qilish amaliyoti joriy etilmoqda. Faol jamoatchilik nazoratini yo'lga qo'yishda esa fuqarolik jamiyati institutlari va ommaviy axborot vositalari vakillari, jurnalistlarning mehnatidan samarali foydalanishga alohida e'tibor qaratilmoqda.
Bundan tashqari, Taraqqiyot strategiyasini amalga oshirish jarayonlariga xalqaro hamjamiyatni keng jalb qilish va ularni islohotlardan xabardor qilib borishga ham alohida e'tibor qaratilib, “Yuksalish” umummilliy harakati huzurida fuqarolik jamiyati institutlari vakillaridan iborat yillik muqobil hisobotlar tayyorlab boruvchi Mustaqil monitoring va baholash jamoatchilik guruhi tashkil etilmoqda. Shu bilan birga hududlarda nodavlat notijorat tashkilotlar, ommaviy axborot vositalari vakillari, ekspertlar va mahalla faollaridan iborat Taraqqiyot strategiyasini qo'llab-quvvatlash jamoatchilik guruhlari faoliyatini yo'lga qo'ygan holda tizimli ravishda jamoatchilik eshituvlarini o'tkazib borish amaliyoti joriy etilganligi ham mamlakat taraqqiyotining yangicha mexanizmlari yaratilayotganligining ifodasidir.
Xulosa qilib shuni aytish mumkinki, Yangi O'zbekistonning 2022-2026 yillarga mo'ljallangan taraqqiyot strategiyasi nafaqat mamlakatimizning kelgusi besh yillik taraqqiyotini, shu bilan birga, uning uzoq yillik rivojlanish strategiyasini belgilab beruvchi muhim hujjat hisoblanadi. Unda nazarda tutilgan maqsadlarning izchillik bilan hayotga tatbiq etilishi, Yangi O'zbekistonning har bir fuqarosi bugungi turmushidan mamnun bo'lib, yurt taraqqiyoti va rivojidan o'zida daxldorlik hissini tuyib yashashiga xizmat qiladi.
Davron ShODMONOV,
“Yuksalish” umummilliy harakati
Qashqadaryo viloyati hududiy bo'linmasi rahbari.
O'zA