ATB “Mikrokreditbank”: Kelgusi rejalar yanada yuksak

Kuni kecha Milliy matbuot markazida ATB “Mikrokreditbank” tomonidan o'tgan yilda amalga oshirilgan ishlar va istiqboldagi rejalar yuzasidan matbuot anjumani bo'lib o'tdi.

Unda ATB “Mikrokreditbank” Boshqaruvi a'zosi, departament direktori Alisher Mustafayev, bankning transformatsiya ofisi direktori o'rinbosari Husniddin Madumarov hamda Davlat dasturlari va hukumat qarorlari bilan ishlash departamenti direktori G'olib Sanoyevlar qatnashib, bugungi kunda moliya muassasasi tomonidan amalga oshirilayotgan ishlar haqida jurnalistlarga batafsil ma'lumot berdi.

Jumladan, Alisher Mustafayev bank tomonidan o'tgan yilda amalga oshirilgan ishlar to'g'risida shunday dedi: “Bugungi kunda bankning 71 ta filiali, 90 ta bank xizmatlari markazi, 24 ta mini-banki, 120 ta o'z-o'ziga xizmat ko'rsatish ofisi, 150 ta maxsus kassalari faoliyat yuritib, 250 mingga yaqin yuridik shaxsga, 1 250 mingdan ortiq jismoniy shaxsga xizmat ko'rsatmoqda.

2021 yilda bank aktivlari 31 foizga, kredit portfeli 27 foizga, depozitlar qoldig'i 31 foizga, shundan aholi omonatlari qoldig'i 29 foizga o'sdi.

O'tgan yilda barcha moliyalashtirish manbalari hisobidan jami 5,9 trln. so'mlik kreditlar ajratilib, 95 mingga yaqin aholi bandligi ta'minlandi. Xususan: oilaviy tadbirkorlikni rivojlantirish dasturiga asosan, 72 715 ta aholi va tadbirkorlik sub'yektiga 2 048 mlrd. so'mlik kreditlar ajratildi va 81 mingdan ziyod yangi ish o'rni yaratildi.

Ma'lumki, Prezidentimizning Oliy Majlisga Murojaatnomasida alohida ta'kidlanganidek, yoshlarni tadbirkorlikka jalb qilish va ularni ish bilan ta'minlash borasida bank o'z oldiga aniq vazifalarni belgilab olgan. Ushbu vazifa ijrosini ta'minlash maqsadida, bank tomonidan ijtimoiy dasturlar doi­rasida ajratilgan imtiyozli kreditlardan 1 270 mlrd. so'mlik (yoki 62 foizi) qismi 45 mingga yaqin yoshlarning o'z biznesini tashkil etishi uchun yo'naltirildi va buning natijasida 49 mingga yaqin yoshlar bandligi ta'minlandi. Ushbu kreditlarning asosiy qismi tegishli sertifikatga ega bo'lgan yoshlarga ajratildi.

Shu bilan birga, hududlarda ochilgan “temir daftar”, “yoshlar daftari” va “ayollar daftari”ga kiritilgan 28 mingga yaqin aholining ehtiyojmand qatlami vakillariga 633 mlrd. so'mlik imtiyozli kreditlar ajratildi. Natijada, 2020 yilga nisbatan imtiyozli kreditlar hajmi 611 mlrd. so'mga yoki ikki barobarga, aholi bandligini ta'minlash ko'rsatkichi 27 mingtaga o'sdi.

Investitsion dasturlar doirasida esa 246 ta loyihaga 1 429 mlrd. so'm miqdorida kreditlar ajratilishi va loyihalarning ishga tushirilishi natijasida 4 732 ta yangi ish o'rinlari yaratildi. Xususan, ushbu yo'nalishda sanoat sohasida 3 089 ta, xizmat ko'rsatish sohasida 578 ta va qishloq xo'jaligi sohasida 1 065 ta aholining bandligi ta'minlandi.

Hududlarni iqtisodiy-ijtimoiy rivoj­lantirish dasturlari doirasida ajratilgan 1 946 mlrd. so'm miqdoridagi kreditlar hisobiga 1 254 ta yangi loyiha ishga tushirildi.

Prezidentimizning   “Parrandachilikni rivojlantirish va tarmoq ozuqa bazasini mus­tahkamlashga qaratilgan qo'shimcha chora–tadbirlar to'g'risida” 2021 yil 14 iyundagi PQ-5146-sonli qarori ijrosi yuzasidan 182 ta loyihaga 444,2 mlrd. so'm miqdorida kreditlar ajratildi. Ushbu loyihalarning ishga tushishi natijasida yiliga qo'shimcha 1 265 mln. dona tuxum va 74,4 ming tonna parranda go'shti, 180,5 ming tonna parranda ozuqasi yetishtirish quvvatlari yaratilishi kutilmoqda.

Shuningdek, o'tgan yil davomida 66 ta quyonchilik xo'jaliklariga 168,4 mlrd. so'm, 1 639 ta jismoniy shaxslarga o'z xonadonida quyonchilikni rivojlantirish maqsadi 40,5 mlrd.so'm uchun yo'naltirildi. Bugungi kunda mazkur sohaga ajratilgan jami kreditlar miqdorida 4 773 ta mijozda 453,6 mlrd.so'mni tashkil etmoqda.

Bundan tashqari, mijozlarga ko'rsatilayotgan xizmatlar sifatini oshirish maqsadida 15 ta yangi bank binolari qurildi, 31 ta binolar kapital va joriy ta'mirlandi. 25 ta yangi, zamonaviy ixcham bank xizmatlari markazlari faoliyati yo'lga qo'yildi. Vengriya davlatidan 300 ta yangi bankomat keltirilib, yurtimizning chekka hududlardagi 24/7- xizmat ko'rsatish ofislariga joylashtirildi.

Ta'kidlab o'tish joizki, onlayn xizmatlar ommalashuvini inobatga olgan holda bankning yangi mobil ilovasi ishlab chiqildi. Hozirda ilovada 20 dan ortiq yangi onlayn xizmatlar yo'lga qo'yildi. 300 mingdan ortiq foydalanuvchi omonat, kredit, pul o'tkazmalari, kommunal to'lovlar kabi xizmatlardan masofadan turib foydalanmoqda.

Shu bilan birga, kredit qarorlarini qabul qilish jarayonlarini avtomatlashtirish bo'yicha anderrayter tizimi joriy qilinib, 20 turdagi kredit mahsulotlarini ushbu tizim orqali ajratilmoqda. Ushbu tizim orqali 104 mingdan ortiq jismoniy shaxsga hamda 26 mingdan ortiq yuridik shaxsga modulli kreditlar ajratildi. Jismoniy shaxslarga “Overdraft”, “Iste'mol”, “Mikroqarz” kreditlarini ajratish jarayoni to'liq avtomatlashtirildi.

2022 yilda ham transformatsiya ishlari izchil davom ettiriladi, jumladan:

— Mehnat migrantlari uchun kredit olish, omonat ochish, xalqaro pul o'tkazmalarini amalga oshirish kabi xizmatlarni o'z ichiga olgan kompleks bank xizmatlari yaratiladi;

— elektron virtual kartalar taqdim etish funksiyalari joriy qilinadi;

— biznes jarayonlarni optimallashtirish orqali operatsion xarajatlar qisqartiriladi;

— bankning yangi korporativ sayti ishga tushirilib, aholi moliyaviy savodxonligini oshirish bo'yicha dasturlar taqdim etiladi;

— sohada xalqaro nufuzga ega kompaniyalar ishtirokida mikrokredit tashkilotini tashkil etish loyihasini amalga oshirish kabi qator tadbirlarni amalga oshirish rejalashtirilgan.

Shuningdek, tadbir davomida Yangi O'zbekistonning taraqqiyot strategiyasini “Inson qadrini ulug'lash va faol mahalla yili”da amalga oshirishga oid Davlat das­turi ijrosi yuzasidan Davlat dasturlari va hukumat qarorlari bilan ishlash departamenti direktori G'olib Sanoyev tadbir ishtirokchilari va jurnalistlarga to'liq ma'lumot berdi.

Matbuot anjumani davomida ATB “Mikrokreditbank” mas'ul xodimlari jurnalistlar tomonidan berilgan turli savollarga atroflicha javob qaytardi.

Hikmatullo QODIROV.

Reklama huquqi asosida.