Xalq bankining xalqona xizmatlari
Xalq banki o'z nomi bilan xalqimizning barcha qatlamdagi odamlari uchun doimiy ravishda xizmat ko'rsatib keladigan asosiy bank hisoblanadi. Ya'ni, diyorimizda dunyoga kelgan chaqaloqqa davlat tomonidan beriladigan suyunchi puli to'lanishidan boshlab, fuqarolar va bank o'rtasidagi hamkorlik boshlanadi. Undan keyingi o'n to'rt yoshgacha to'lanadigan nafaqa, stipendiyalar hamda keksalik nafaqalari deysizmi, barcha-barchasi Xalq banki tomonidan amalga oshiriladi.
Shunday ekan, Xalq banki tizimida olib borilayotgan ishlar borasida xalqimizga doimiy ravishda axborot berib borish o'rinlidir. Shu sababli kuni kecha Axborot va ommaviy kommunikatsiyalar agentligida “Xalq banki faoliyati ochiqligini ta'minlash bo'yicha amalga oshirilgan ishlar sarhisobi” mavzusiga bag'ishlangan matbuot anjumani o'tkazildi.
Tadbirda 2021 yil mobaynida moliya muassasasi faoliyatining ochiqligi va shaffofligini ta'minlash hamda axborot olish erkinligini yanada soddalashtirish orqali jamoatchilik nazoratini kuchaytirish borasida amalga oshirilgan ishlar va ularning natijalari hakida so'z yuritildi.
Anjuman avvalida Aksiyadorlik tijorat Xalq banki Boshqaruvi raisining birinchi o'rinbosari Zafar Azimov bank faoliyatida olib borilayotgan yangilik va o'zgartirishlar haqida batafsil ma'lumot berdi:
– Xalqqa yanada yaqin va xalqchil bo'lishni ta'minlash maqsadida o'tgan davr mobaynida bankning tashkiliy tuzilmasi tubdan takomillashtirildi. Xususan, Axborot xizmati faoliyati ham butunlay yangilanib, uning o'rniga Bank brendi va Axborot xizmati faoliyati tashkil etildi. Ayni vaqtda Xalq banki faoliyatiga doir barcha ma'lumotlar bankning www.xb.uz rasmiy veb-saytida e'lon qilinmoqda. Qolaversa, moliya muassasasining ochiq va shaffofligini ta'minlash maqsadida 2021 yilda Axborot xizmati tomonidan yangi @xbpress_bot telegram boti ham ishga tushirilib, aholi va mijozlarning taklif va e'tirozlarini o'z vaqtida aniqlash hamda unga samarali yechim topish imkoniyati yaratildi. Buning natijasida 2021 yil mobaynida aholidan kelgan murojaatlarning hech biri e'tibordan chetda qolmadi. Aniqroq aytadigan bo'lsak, 2021 yilning yakuniga ko'ra, Xalq banki Boshqaruviga jami 32 913 ta murojaat kelib tushgan bo'lib, uning 98,3 foizi jismoniy, 1,7 foizi yuridik shaxslar tomonidan yo'llangan. Ularning 36,4 foizi to'liq va ijobiy qanoatlantirilgan bo'lsa, 63,6 foiziga tegishli huquqiy maslahat va ma'lumotlar berildi. Buni qarangki, yuqoridagi o'zgartirish va yangiliklar natijasida joriy yil yanvar-fevral oylarida jismoniy va yuridik shaxslardan kelib tushgan jami murojaatlar soni o'tgan yilning mos davriga nisbatan 2 barobarga kamaydi, – deydi bank Boshqaruvi raisining birinchi o'rinbosari Zafar Azimov.
Hammamizga ma'lumki, banklarga bo'ladigan asosiy murojaatlar kredit olish masalasi bo'yicha kelib tushadi. Shu bois, Xalq banki tomonidan kredit olish jarayonida turli muammolarning yuzaga kelishining oldini olish maqsadida qanday ishlar olib borilayotgani bilan qiziqdik.
Z.Azimov tomonidan esa 2021 yil davomida 150,2 ming nafar fuqaroga qariyb 3,2 trillion so'mlik kredit mablag'lari ajratilgani, 1 martdan boshlab bo'lsa, Xalq bankidan elektronlashtirilgan tartibda imtiyozli kreditlarni “oilakredit.uz” platformasi orqali olish imkoniyati yaratilib, kreditlash jarayoni yanada soddalashtirilgani, bu orqali moliya muassasasida imtiyozli kredit olish uchun taqdim etiladigan hujjatlar elektron ravishda harakatlanayotgani, Xalq bankida korrupsiyaga qarshi murosasiz kurashishni yanada oshirish maqsadida bankning Ichki nazorat va komplaens tizimi ham qayta tashkil etilib, har bir filialda 1 tadan Ichki nazorat va komplaens menejeri faoliyati yo'lga qo'yilgani ma'lum qilindi.
Yurtdoshlarimiz ongida odamlar banklarda qandaydir ishini bitirishi uchun baribir qaysidir bank xodimi bilan manfaatli kelishuv yo'lini tutishiga, korrupsiya yoki mahalliychilik qilishiga to'g'ri keladi degan tushuncha shakllanib qolgandi. Bu kabi holatlarning oldini olish, aniqlash bo'yicha qanday zamonaviy usullardan foydalanilayotgani ham barchaga qiziq. Bu bo'yicha esa bank brendi axborot xizmati rahbari Gulnoza Alimova quyidagicha axborot berdi:
– Mijozlarga xizmat ko'rsatish sifatini yanada yaxshilash hamda korrupsion holatlar aniqlanganda zudlik bilan bankning markaziy apparatiga xabar berishni ta'minlash maqsadida “Tezkor xabar” mobil ilovasi joriy etildi. O'tgan davr mobaynida mazkur ilova orqali kelib tushgan murojaatlar inson omilisiz avtomatik ravishda qabul qilinib, belgilangan tartibda ko'rib chiqildi hamda aniqlangan holatlar yuzasidan muayyan choralar ko'rildi. Shuningdek, 2021 yil mobaynida Xalq banki tomonidan 5 mln.ga yaqin (15 foiz) fuqarolarga har oyda 4 trln. so'mlik 12 turdagi pensiya, nafaqa va boshqa ijtimoiy to'lovlar amalga oshirilib, hozirda mazkur to'lovlarni to'lash mexanizmi yanada takomillashtirilmoqda. Xalq banki tomonidan fuqarolarga farzandi tug'ilganligi haqidagi guvohnomani rasmiylashtirish bilan avtomat tarzda bank kartasi orqali “suyunchi puli”ni olish tizimi ham joriy etildi. Natijada, bugungi kunga qadar 13 mingga yaqin fuqarolarga 6,8 mlrd. so'mdan ortiq nafaqa to'lovlari onlayn tarzda bank kartalariga o'tkazib berildi.
Matbuot anjumani davomida aholiga qo'shimcha qulayliklar yaratish maqsadida “Bank xizmatlari markazlari” soni 94 taga, “24/7-Elektron ofislar” soni 430 taga, Xalqaro pul o'tkazmalari shohobchalari soni 298 taga va valyuta ayirboshlash shohobchalarining umumiy soni 261 taga yetgani aytib o'tildi. Shuningdek, 1,5 mln. donadan ortiq bank kartalari muomalaga chiqarilib, ularning soni 5,6 mln. donaga yetkazildi. Amalga oshirilgan bunday ijobiy ishlar natijasida Xalq bankining jami aktivlari 511 mlrd. so'mga ortib, 26,9 trln. so'mni, shundan, kredit portfeli 804 mlrd. so'mga ortib, 19,6 trln. so'mni tashkil etdi. Jami jalb qilingan depozitlar qoldig'i 2 trln. so'mga ortib, 11,6 trln. so'mga yetdi. Bank ustav kapitali esa 3,2 trln. so'mga oshirilib, 7,4 trln. so'mga yetkazilgan.
2021 yil davomida Xalq banki tomonidan qishloq xo'jaligi, sanoat va xizmat ko'rsatish sohalaridagi loyihalarni amalga oshirish hamda jismoniy shaxslarning yashash sharoitini yaxshilash uchun jami 7,9 trln. so'mlik kredit mablag'lari ajratildi.
Shundan, hududlarga tashriflar davomida tasdiqlangan majlis bayonlariga, asosan, 800 ta loyihaga 940 mlrd. so'mlik kreditlar yo'naltirildi. Chorvachilik sohasini rivojlantirish uchun esa 592 ta loyihaga 793 mlrd. so'mlik kredit mablag'lari taqdim etildi. “Oilaviy tadbirkorlik”ni rivojlantirish dasturlari doirasida esa 150 mingdan ortiq fuqarolarga 3,2 trln. so'mlik imtiyozli kreditlar ajratilgan.
Xalq banki tomonidan tashkillangan ushbu matbuot anjumanida jurnalistlarning turli savollariga bank mutasaddilari tomonidan do'stona ruhda berilgan atroflicha javoblardan Xalq banki chindan ham xalqparvarlik tamoyillari asosida faoliyatlarini yanada yuqori bosqichga olib chiqish harakatida ekanligini bilish mumkin. Kelgusidagi rejalarni amalga oshirishda ham mazkur bankka omad va zafarlar tilab qolamiz. Negaki, Xalq banki faqat xalq uchun ishlashi kerak.
Kamoliddin RO'ZIMATOV.
Reklama huquqi asosida.