Haq so'zning qadri oshmoqda
Mamlakatimizda ko'tarinki ruhda nishonlangan Jahon matbuoti erkinligi kuni “Xalq so'zi” — “Narodnoe slovo” gazetalari tahririyati jamoasi uchun unutilmas onlarni tuhfa etdi, desak, mubolag'a emas.
Tahririyatimiz “Oltin qalam” XVI milliy mukofoti uchun xalqaro tanlovda bosma ommaviy axborot vositalari yo'nalishida birinchi o'ringa munosib ko'rilganidan behad quvondik. Ayni paytda bu e'tirofni barcha jabhada yangilanayotgan O'zbekistonning demokratik huquqiy davlat, kuchli fuqarolik jamiyati qurish yo'lida sobitqadamlik bilan dadil oldinga intilayotganining yana bir yaqqol ifodasi sifatida qabul qildik.
Darhaqiqat, bugun Prezidentimiz tomonidan jamiyatda ochiqlik va oshkoralikni ta'minlash, plyuralizm, hurfikrlilikka keng shart-sharoitlar yaratish borasida olib borilayotgan ko'lamdor oqilona siyosat media sohasiga ham tom ma'noda yangilanish nafasini olib kirdi.
Davlatimiz rahbari ta'biri bilan aytganda, ommaviy axborot vositalarini “to'rtinchi hokimiyat”ga aylantirish, davlat idoralarining jamiyat oldidagi hisobdorligini oshirish borasida sezilarli natijalarga erishilmoqda.
Bu boradagi eng muhim yutuq shuki — jamiyatimiz “yopiqlik muhiti”dan qutulib, yangi O'zbekiston poydevori aynan erkinlik va adolat tamoyillari asosida barpo etilmoqda.
Sohadagi ijobiy o'zgarishlarning in'ikosini kuni kecha “Chegarasiz reportyorlar” xalqaro nohukumat tashkiloti tomonidan e'lon qilingan So'z erkinligi indeksining 2022 yilgi reytingida O'zbekiston o'z ko'rsatkichlarini birdan 24 pozitsiyaga yaxshilab, 157-o'rindan 133-o'ringa ko'tarilgani misolida ko'rish mumkin.
Bugun “yopiq” mavzuning o'zi qolmagan. Har kim o'zi istagan ommaviy axborot vositasida, ijtimoiy tarmoqlarda erkin fikr bildirishi, taklif va mulohazalarini o'rtaga tashlashi mumkin. Qonundan chetga chiqilmasa, o'zganing huquqlari buzilmasa bo'lgani, barcha yo'llar ochiq.
Bunday ochiqlik, shaffoflik zamoni, o'z o'rnida, bir tomondan, media olamida o'zaro raqobatni kuchaytirsa, ikkinchi tomondan, ommaga so'z aytish mas'uliyatini yanada oshiryapti.
“Xalq so'zi” va “Narodnoe slovo” gazetalari jamoasi ana shunday mas'uliyatli davrda, faqat va faqat halol mehnat, tinimsiz izlanish, sog'lom raqobat tufayli o'z o'rniga ega bo'ladigan bir sharoitda zimmasidagi sharafli vazifani uddalashga baholiqudrat harakat qilmoqda. O'z qadriyatlariga sodiq qolgan holda sobitlik bilan olg'a intilmoqda.
Gazetalarimiz davlatimizning ichki va tashqi siyosatini, jamiyatning ijtimoiy-iqtisodiy, ma'naviy hayotini aks ettiruvchi ko'zguga aylangan. Sahifalardan o'rin olayotgan har bir materialda kun nafasi, hayot haqiqati ufurib turadi. Sodda qilib aytganda, haq so'zning, xalq tafakkurining minbariga aylangan.
Ayniqsa, keyingi besh-olti yilda “Xalq so'zi” va “Narodnoe slovo”ning mazmun-mundarijasi butunlay o'zgarib, mamlakatimizda boshlangan tarixiy yangilanishlarning faol targ'ibotchisi sifatida maydonga chiqdi. Kreativ fikrlar, tanqidiy va tahliliy yondashuvlar bilan xalq orasiga yanada kengroq kirib bordi.
Parlament nashri sifatida “Deputat fikri” va “Senator minbari” kabi ruknlar orqali qonunchilik jarayonlarining muhim qirralarini, parlament a'zolarining pozitsiya va munosabatlarini qalamga olib kelmoqda. Masalan, nashrlarimiz orqali o'quvchilarimiz Oliy Majlis Qonunchilik palatasidagi o'qishlar paytida qonunlar qanday takomillashtirilayotganidan xabardor bo'lib borish, davlatimiz rahbari tomonidan imzolanganidan so'ng ularning so'nggi versiyasi bilan tanishish imkoniga ega.
“Xalq so'zi” va “Narodnoe slovo” — turli shov-shuvlar, oldi-qochdi materiallarni yorituvchi nashrlar emas. Balki insonlarni fikr-mulohazaga chorlaydigan, tafakkurini charxlaydigan, bilim va ma'naviyatini boyitishga hissa qo'shadigan gazetalardir.
Mushtariylarimiz “Mamlakatimizda iqtisodiy o'sishga qanday erishilmoqda?”, “Qanday omillar siyosiy va ijtimoiy barqarorlik kafolati bo'lib xizmat qilayotir?”, “Qisqa vaqt ichida ta'sirchan natijalarga erishishga nima imkon bermoqda?” kabi savollarga taniqli siyosatchilar, ziyolilar, turli sohalar olimlari, ekspert va mutaxassislarning javoblarini ayni shu nashrlardan o'qib, bilib bormoqda.
Prezidentimiz Shavkat Mirziyoyev qayd etganidek, oshkoralik va so'z erkinligi bu — davr talabi, bu — O'zbekistondagi islohotlarning talabi.
Ana shu haqqoniy talab tahririyatimizning barcha xodimlaridan nafaqat professional bilim va ko'nikmalarni, kuchli fuqarolik pozitsiyasini, balki bugunning nafasini his etib, yangicha ishlashga intilishni ham talab qiladi. Aksincha bo'lishi mumkin emas.
Bundan keyin ham mamlakatimizda yuz berayotgan keng ko'lamli o'zgarishlarni ob'yektiv yoritish bilan bir qatorda hukumat idoralari va jamoatchilik e'tiborini joylardagi dolzarb muammolarga jalb qilamiz va barcha darajadagi rahbarlarni ushbu muammolarni hal etishga undaymiz.
…“Xalq so'zi” va “Narodnoe slovo” gazetalari tahririyati jamoasi davr ruhi va talabidan kelib chiqib, ish uslubini o'zgartirib bormoqda. Gazetalar dizayni va sarlavhalarda kreativlik ko'zga tashlanmoqda. Tezkorlik bilan yangilanadigan veb-saytimiz, ijtimoiy tarmoqlar va messenjerlarimiz sahifalarida zamon ruhi o'z aksini topayotir.
Eng muhimi, har bir materialda mamlakatimizning milliy manfaatlari va voqea-hodisalarga ob'yektiv yondashuv ustuvordir.
Ammo bular hali yetarli emas. Faoliyatimizdan qoniqish hosil qilishga aslo haqqimiz yo'q. Aksincha, kelgusida mavzular qamrovini yanada kengaytirib, o'quvchilarimiz talab va istaklariga hamohang faoliyat ko'rsatishimiz zarur. Voqeliklarni yoritishda tezkorlikni oshirib, odamlarni tashvishga solayotgan o'tkir muammoyu kamchiliklarni yanada dadil qalamga olish galdagi ustuvor maqsadlarimizdan biri bo'lib qoladi.
O'tkir RAHMATOV,
“Xalq so'zi” – “Narodnoe slovo”
gazetalari Bosh muharriri