Tarixini bilmagan o'zligini unutadi
Shuhrat HAYITOV,
“O‘zbekiston tarixi” telekanali direktori:
— Bugungi televidenie kechagisidan farq qiladi. Bugun yangiliklar ko'zgusidan jur'at bilan gapirayotgan jurnalist shijoati o'zgacha, maqsad va muddaosi ayon, tili burro, qo'rquvi yo'q. Muammolarni ochiq aytish bor, rahbarlarga xalqni qiynayotgan masalalar yechimini so'rab mikrofon tutish bor, javobni randalash yo'q, vaziyatni boricha olib chiqish bor. Fidokorona mehnatning rag'batlantirilishi va e'tirof etilishi esa ijodkor ahliga yanada ulkan ishonch va qanot bag'ishlaydi. Shu ma'noda, bunday yuksak mukofot odamga juda katta mas'uliyat ham yuklaydi. O'ylaymanki, bu e'tirof bugun jurnalistlarga, qolaversa, ilm ahli, ziyolilarga bo'lgan e'tibordir.
Prezidentimiz tashabbusi bilan “O‘zbekiston tarixi” telekanalining tashkil etilgani esa chin ma'noda tarixiy voqea bo'ldi. Negaki, tarixini chuqur bilmagan xalqning milliy o'zligi ham haminqadar bo'ladi. Shu bois ajdodlar merosini tatbiq etish, og'zaki va yozma manbalarni yosh avlodlarga yetkazish, moziy haqiqatlarini namoyon qilish hamisha dolzarb vazifalardandir.
Telekanalimiz 2019 yilning 1 sentyabridan o'z faoliyatini boshladi. O'tgan qisqa vaqt mobaynida mavjud 5 ta: “O'zbekiston tarixi”, “Ilmiy-ommabop telefilmlar”, “Arxeologiya va muzeylar”, “Jahon tarixi va sivilizatsiyasi”, “Tezkor dublyaj” muharririyatlari tomonidan qator ko'rsatuvlar tayyorlanib, tomoshabinlar e'tiboriga havola etib kelinmoqda.
Xususan, 90 daqiqa mobaynida jonli tarzda efirga uzatiladigan “Tarixiy savol” tok-shousi, ko'rsatuvlar dasturidan muntazam o'rin olgan “Aslida qanday?..”, “Ibtido”, “Etno”, “Mavzu”, “Taqdimot” singari ko'rsatuvlarda yurtimizning ko'hna va boy tarixi, an'analari, ajdodlarimizning dunyo tamadduniga qo'shgan ilmiy, madaniy va ma'naviy hissalari, ularning hayot yo'li tarixiy voqea-hodisalar misolida keng ochib berilmoqda. Shuningdek, ushbu ko'rsatuvlar xalqimiz tarixiga taalluqli va umummilliy ahamiyatga ega bo'lgan muhim masalalar, muammolar bo'yicha ziyolilar, keng jamoatchilikni ochiq muhokamaga chorlamoqda. Boshqacha aytganda, telekanal tarixchi olimlar, tadqiqotchilar va yoshlarning chinakam minbariga – “munozara maydoni”ga aylanib ulgurdi.
Undan tashqari, buyuk vatandoshlarimiz — olimlar, mutafakkirlar va aziz-avliyolar, shoir va yozuvchilar, sarkardalar, davlat arboblarining bebaho merosini keng ko'lamda o'rganish va ommalashtirish maqsadida ularning hayot yo'li, qahramonligi va avlodlarga qoldirgan boy merosi haqida “Buyuk Temur”, “Buyuk yurt allomalari”, “Navoiy hayratlari”, “Sulola”, “Ochun” nomli ko'rsatuvlar tashkil qilindi hamda muntazam efirga berib borilmoqda.
Bundan tashqari, ayni damda ilmiy-ommabop shakldagi “O'zlikka yo'l” megaloyihasiga qo'l urildi. Unga butun mahalliy va xalqaro miqyosdagi olimlar jalb qilinmoqda.
Yurtimiz tarixini keng ommaga targ'ib etish, ichki va tashqi sayyohlik muhitini kengaytirish maqsadida “Bir o'lka tarixi”, “Bir eksponat tarixi”, “Sayohatnoma”, “Muborak maskanlar” kabi loyihalarning ko'rimlilik darajasini oshirish va ularni keng internet platformasiga yoyish masalalarida jadal ishlar yo'lga qo'yildi.
Yana bir gap. Bugungi kun tomoshabinining xalqchil, ixcham telemahsulotga bo'lgan talabidan kelib chiqib akademiklar, adabiyot va tarix ilmi darg'alarining qisqa, ammo o'tkir, zalvorli 3-4 daqiqalik fikrlarini o'z ichiga olgan “Gapning ochig'i…” loyihasi ko'pchilik teletomoshabinlarning e'tirofiga sazovor bo'ldi.
Yangilanayotgan O'zbekiston islohotlari ohangida bugun har bir ko'rsatuvda aytilayotgan mulohazalar xolis, haqqoniy va chuqur tahlillarga asoslangani holda keng jamoatchilikni fikrlashga undamoqda. Bu esa mamlakatimiz taraqqiyotida milliy teleradiokompaniyaning o'rni va rolini ko'rsatib bermoqda, desak xato bo'lmaydi. Shuningdek, bunday ijodiy jarayonlar, o'z navbatida, bugungi davr telejurnalistikasining o'ziga xosligi, taraqqiyoti va yuksalish jarayonlarini belgilashga xizmat qilmoqda.