“Yaxshilarni yo'qlab baxt kelaversin”
Mahmud TOIR,
O'zbekiston xalq shoiri
BAXT
Ota eshik ochar yangi orzuga,
Ona beshik ochar yangi orzuga,
Illo, ko'z tegmasin bunday tuyg'uga,
Yaxshilarni yo'qlab baxt kelaversin.
Farzandlar quvonchning qanoti bo'lsin,
Otalar duosin bayoti bo'lsin,
Izdagi eng go'zal hayoti bo'lsin,
Yaxshilarni yo'qlab baxt kelaversin.
Oila osmonining toza havosi,
Yuzlarda balqigan baxtning bahosi,
Xush esar xushxabar sarrin sabosi,
Yaxshilarni yo'qlab baxt kelaversin.
Tinchlik tilagida yayrasin dillar,
Baxtin ko'z-ko'z qilsin elatlar, ellar,
Qo'llarga yarashsin eng go'zal gullar,
Yaxshilarni yo'qlab baxt kelaversin.
Yangi O'zbekiston – yangi baxt bilan,
Milliardlar safida yangi ahd bilan,
Baxtga yarashadi muqaddas Vatan,
Yaxshilarni yo'qlab baxt kelaversin.
22.02.2023 y.
KO'NGIL SO'ZI
Ko'ngildan to'kilgan so'zni sog'indim,
Ko'ngilni ko'rsatgan ko'zni sog'indim,
Nopokni ko'rmagan tuzni sog'indim,
Buningdek sog'inchga siz ham zormisiz,
Sog'inganlar ichra siz ham bormisiz?
Nodonu nojinsni g'ubori bo'lgay,
Ozoda xayolni ifori bo'lgay,
Qish kelsa ortida bahori bo'lgay,
Kelar bahorlarga siz ham zormisiz,
Sog'inganlar ichra siz ham bormisiz?
Maysa ham bo'yini terakka bo'ylar,
Xush ko'rgan o'zini kerakka bo'ylar,
Tilini topsangiz qarg'alar kuylar,
Kuylovchi dillarga siz ham zormisiz,
Sog'inganlar ichra siz ham bormisiz?
Odamning odami nolasi borlar,
Xudoga yig'lasa jolasi borlar,
Boshlarining oppoq tolasi borlar,
Oppoq duolarga siz ham zormisiz,
Sog'inganlar ichra siz ham bormisiz?
Qo'l tashlang, qaytmasin, shoirning shashti,
Iloho omin deng, niyatim yaxshi,
Bu so'zlar o'kinchmas, ko'nglimning naqshi,
Ko'ngli go'zallarga siz ham zormisiz,
Sog'inganlar ichra siz ham bormisiz?
24.02.2023 y.
DA'VAT
Bola do'stmiz, omon bo'l, omon,
Hech jig'ingga tegmoqchimasman.
O'jarliging o'zingga yomon,
Supurgi bo'l demoqchimasman.
O'shal zotning keng soyasida,
Rizqing osha yog'li tuz bilan.
Odamiylik himoyasida,
Lekin yasha yorug' yuz bilan.
27.02.2023 y.
SOG'INCh SADOSI
Bahor – boshingdagi balqigan oydir,
Bahor – qoshingdagi qalqigan soydir,
Bahor – bu olamga mangu chiroydir,
Seni sog'ingandek sog'indim uni.
Majnuntol zulfingdan ibrat olganmi,
Qaldirg'och mehringdan himmat olganmi,
Uning go'zalligi senga qolganmi,
Seni sog'ingandek sog'indim uni.
Lolalar yurakda o't yoqar sendek,
Maysalar muloyim xush boqar sendek,
Sog'ingan bormikin sizlarni mendek,
Seni sog'ingandek sog'indim uni.
Irmoqlar irg'ishlar kulgungga o'xshab,
Shabnamlar titraydi tuyg'ungga o'xshab,
Yotibman yo'lingga jonimni to'shab,
Seni sog'ingandek sog'indim uni.
Bahorni bag'rida olam entikar,
Meningdek oshiqlar har dam eshitar.
Aytgin, kim yo'lingga mendek ko'z tutar,
Seni sog'ingandek sog'indim uni.
24.02.2023 y.
HAQIQAT HUKMI
To'g'ri inson tanobin tortmoq,
Kimlar uchun oddiy xayoldir.
Bilmaydiki, haqiqat sirtmoq,
Haqiqatning hukmi haloldir.
Kunlar o'tar, o'tadi oylar,
Yillarni ham oqizar soylar,
Ketmas betga chapilgan loylar,
Haqiqatning hukmi haloldir.
Balki darddan dili chok-chokdir,
Lek to'g'rining iymoni pokdir,
O'z qalbiga o'zi chiroqdir,
Haqiqatning hukmi haloldir.
Tilin tishlab ba'zan jafoga,
Kim muhtojmas ayting, vafoga,
Ojiz qolsa solar Xudoga,
Haqiqatning hukmi haloldir.
22.02.2023 y.
O'ZINGDAN UYaL
Tosh bilan tillashsang toshdan andoza,
O'zin shovqinidan uyalmaydi soy.
Shoirlarning doim tilagi toza,
O'zingdan uyalish iymonga chiroy.
Nasihat hech kimga navo bo'lmagay,
Yomon so'z dardingga davo bo'lmagay,
Ba'zan tabibdan ham sado bo'lmagay,
O'zingdan uyalish iymonga chiroy.
Tegramda hech qachon ko'z yo'q demagin,
Ortimdan otilar so'z yo'q demagin.
Dengiz ham tanirmish o'zin kemasin,
O'zingdan uyalish iymonga chiroy.
Olam odam bilan olamligi bor,
Odam odam bilan odamligi bor.
O'zingdan gumondir, o'zingdan iqror,
O'zingdan uyalish iymonga chiroy.
O'z ko'ngling o'zingdan ginalar qilsin,
Aqlingni ahdingga zinalar qilsin,
Ham yana o'zingga ta'nalar qilsin,
O'zingdan uyalish iymonga chiroy.
25.02.2023 y.
FIDOLIK
Chiroq chashmasining mirobi asli,
Yonib kul bo'lguvchi jonbaxsh pilikdir.
Ko'ngilda yuz ochar falsafa fasli,
Ezgulik fidolik bilan tirikdir.
Rahmat yomg'irini osmon elaydi,
Baxtini beshikka ona belaydi.
Kim undek Vatanning umrin tilaydi,
Ezgulik fidolik bilan tirikdir.
Haqiqat Xudoning hukmidek go'zal,
Dunyoda ne topding joningdan afzal?
Sen aql axtarsang inson mufassal,
Ezgulik fidolik bilan tirikdir.
Oltinning mevasi – oltin qoziqlar,
Mehring sharbatidan kimdir oziqlar,
Taqdir – peshonangga tushgan chiziqlar,
Ezgulik fidolik bilan tirikdir.
Fidolik insonning mashaqqat yo'li,
Qadoqlar qaritgan duogo'y qo'li,
Yurakda yuz ochar ildizin guli,
Ezgulik fidolik bilan tirikdir!
26.02.2023 y.
UMID UMRI
Oshiqlarning ovozi o'ktam,
Baxt haqida bayot bor ekan.
Muhabbatga sohiblar ko'rkam,
Sog'inganda sabot bor ekan.
Sevib yasha, sevilib yasha,
Quchog'ingga qumrini bersin.
Baxting kelsin qo'sha va qo'sha,
Umidingni umrini bersin.
24.02.2023 y.
DIL TUG'YoNI
Bog'lar himmatini darig' tutmasa,
Tog'lar siyratini darig' tutmasa,
Inson hayratini darig' tutmasa,
Go'zallik bizlardan yiroq ketmasdi.
Insof – inson uchun ko'zgu bo'lolsa,
Muhabbat pokiza tuyg'u bo'lolsa,
Gunoh – kechirilmas qayg'u bo'lolsa,
Go'zallik bizlardan yiroq ketmasdi.
Tulpor tuyog'ida tosh yig'lamasa,
Begunoh ko'zlarda yosh yig'lamasa,
Nasiba uzilib osh yig'lamasa,
Go'zallik bizlardan yiroq ketmasdi.
Mehr zam-zamidan ichiblar yursak,
Qahr kechmishidan kechiblar yursak,
Rahmondan, Rahimdan cho'chiblar yursak,
Go'zallik bizlardan yiroq ketmasdi.
Dunyoda nima bor insondan go'zal,
Insonga berilgan iymondan go'zal.
Biz buni bilolsak agar mufassal,
Go'zallik bizlardan yiroq ketmasdi.
24.02.2023 y.
O'RGAN
Quloqqamas ko'zingga ishon,
Birovgamas o'zingga ishon,
Kimdir senga yuz yil so'ylasa,
Diling aytgan so'zingga ishon.
Oftob sendan uzoqda emas,
Ko'ngling seni tuzoqda emas,
Gar o'zingdan ortib yurolsang,
Mehr sendan firoqda emas.
To'kildingmi, to'lishni o'rgan,
Yig'lab turib, kulishni o'rgan,
Boyliklaring boqiy ko'rinsa,
O'lmay turib, o'lishni o'rgan.
22.02.2023 y.
AQL UVOG'I
Bahorning jamoli muzni eritar,
Maysa toshni yorsa ko'klam ko'rinur.
Boychechak bolalab qishni qaritar,
Ne borki, bu guldan ko'rkam ko'rinur?
Tunni nursiz ko'rsang titraydi vujud,
Aql chirog'ida olam ko'rinur.
Xudoni xushlasang, unutma, Mahmud,
Aql uvog'ida odam ko'rinur.
18.02.2023 y.
ShUKR ShARBATI
Shamolning shaklidan hikoyat qilma,
Qalampir qahridan shikoyat qilma.
Aql egasiga barchasi ayon,
Rahmonning rahmidan rivoyat qilma.
Qalbingni qatini ochib yursang bas,
Mehringni nurini sochib yursang bas.
Shukring sharbatini zam-zamdek ichib,
Shaytoni laindan qochib yursang bas.
24.02.2023 y.
HAQDAN SO'RAYMAN
Tiniq tuyg'ularning tarovatida,
Shukronam shaklining ibodatida,
Kalomi Qur'onning tilovatida,
Yurtim tinchligini Haqdan so'rayman.
Nabiram baxtiga beshik ochsin deb,
Avlodlar ahdiga eshik ochsin deb,
Allohim, o'zining nurin sochsin deb,
Yurtim tinchligini Haqdan so'rayman.
Ulug' ajdodlarning ruhi yor bo'lsin,
Elning azizligi barqaror bo'lsin,
Parvardigor o'zi madadkor bo'lsin,
Yurtim tinchligini Haqdan so'rayman.
Onalar yuzidan oftob tushmasin,
Bolalar qo'lidan kitob tushmasin,
O'g'lonlar dilidan shitob tushmasin,
Yurtim tinchligini Haqdan so'rayman.
Siz ham qo'lingizni oching, yurtdoshim,
Kaftimga tomyapti jiq-jiq ko'z yoshim,
Yolg'iz Alloh uchun egilgan boshim,
Yurtim tinchligini Haqdan so'rayman!
26.02.2023 y.