“Umid” manzur bo'ldi
O'zbekiston davlat drama teatriga Baken Kidikeeva nomidagi Qirg'iz davlat Yosh tomoshabinlar va o'smirlar teatri jamoasi tashrif buyurdi.
Qardosh xalqning teatr ijodkorlari qirg'iz dramaturgi Kayrat Imanaliyevning “Umid” nomli monospektaklini poytaxtimiz tomosha san'ati ixlosmandlari e'tiboriga havola etdi.
Bir aktyor tomoshasi sifatida namoyish etilgan ushbu spektaklda mushtipar onaning urushga ketib qaytmagan farzandlari diydorini ko'rishdek orzu-armonlari g'oyat ta'sirchan, hayajonli, tabiiy tarzda ochib berilgan.
Yolg'iz qolgan ona ba'zan o'g'illarining bolaligini eslab shirin xotiralar qurshovida qolsa, gohi farzand sog'inchidan qalbi cheksiz iztirobga, ko'zlari yoshlarga to'ladi. Faqatgina farzandlarini yana bir bor ko'rishdek umid mushfiq onaga tasalli, yashash uchun kuch-quvvat beradi.
Mazkur spektakl rejissyor Ulanmirza Karipbayev tomonidan sahnalashtirilgan. Bosh rolni Qirg'iziston xalq artisti Nazira Mambetova ijro etgan. Tinch-osuda, xotirjam kunlar, sog'liq, omonlik, bag'ributunlikning qadriga yetishga chorlovchi ushbu spektakl o'zbek tomoshabinlariga g'oyat manzur bo'ldi.
N.Usmonova,
O'zA.