Qozog'iston va O'zbekiston rahbarlarining muntazam muloqoti haqida

Qozog'istonning yetakchi OAVlari O'zbekiston bilan ikki tomonlama munosabatlar rivojiga alohida e'tibor qaratmoqda

“Kazinform” xalqaro axborot agentligi kuni kecha ikki mamlakat o'rtasidagi hamkorlikni rivojlantirishga bag'ishlangan tahliliy maqolani e'lon qildi. Unda ikki davlat rahbarlarining muntazam muloqoti Qozog'iston-O'zbekiston munosabatlarini rivojlantirishda muhim ahamiyat kasb etayotgani ta'kidlandi.

“Mamlakatlarimiz o'rtasidagi ikki tomonlama hamkorlikning asosiy xalqaro-huquqiy hujjatlari 1998 yil 31 oktyabrda tuzilgan Qozog'iston va O'zbekiston o'rtasidagi Abadiy do'stlik to'g'risidagi shartnomadir. Shuningdek, 2013 yil iyun oyida Strategik sheriklik to'g'risidagi shartnoma, 2022 yil dekabrida esa Ittifoqchilik munosabatlari to'g'risidagi shartnoma imzolandi”, – deyiladi agentlik tarqatgan materialda.

Shuningdek, maqolada parlamentlararo va savdo-iqtisodiy aloqalarning bugungi holati chuqur tahlil qilingan. Ikki davlat o'rtasidagi o'zaro tovar ayirboshlash hajmi 2023 yil yakuniga ko'ra 4,4 milliard AQSh dollarini tashkil etdi, deb ta'kidlaydi nashr.

“Ayni paytda Qozog'iston va O'zbekiston inves­titsiyaviy hamkorlikni faol kengaytirmoqda. Xususan, o'tgan yil davomida ikki tomonlama investitsiyalar hajmi 86,2 million dollarni tashkil etdi, bu 2022 yilga nisbatan 14,3 foizga ko'pdir”, – deb qayd etgan manba.

Shuningdek, mamlakatlarimiz o'rtasida madaniy almashinuv va ilmiy sohadagi aloqalarni yanada jadallashtirish uchun katta salohiyat mavjudligiga urg'u berilgan. Xususan, Toshkent, Samarqand va Buxoro muzeylarida qozoq xalqi hayoti va madaniyatiga hayotiga oid 500 ga yaqin eksponat o'rin olgani ma'lum qilindi. Shu bilan birga, Qozog'istonda o'zbek tilida 10 dan ortiq ommaviy axborot vositalari chop etilayotgani va O'zbekistonda qozoq telekanallarini mamlakat aholisining qariyb 10 foizi tomosha qilishi ma'lum qilingan. Shuningdek, ikki davlat o'rtasida ochilgan yangi havo qatnovlariga e'tibor qaratilgan.

“Kazaxstanskaya pravda” umummilliy gazetasida ushbu mavzuda bosilgan salmoqli maqolada yozilishicha, ikki davlat o'rtasidagi ittifoqchilik munosabatlarini amaliy mazmun bilan to'ldirish zarur.

Nashrda ikki davlat rahbarlarining irodasi tufayli O'zbekiston va Qozog'iston o'rtasida yuqori darajadagi siyosiy ishonch shakllangani mamlakatlarimiz o'rtasidagi munosabatlar hech qanday siyosiy vaziyatga duch kelmasligi va izchil mustahkamlanib borishini kafolatlayotgani ta'kidlangan.

“Qozog'iston va O'zbekiston o'z oldiga tovar ayirboshlash hajmini 10 milliard dollarga yetkazishni maqsad qilib qo'ygan. Ushbu maqsadga erishish uchun tomonlar tovarlar tarkibini kengaytirish va savdo-iqtisodiy aloqalarni yanada rivojlantirishga to'siq bo'layotgan muammolarni tizimli ravishda bartaraf etish choralarini ko'rishga kelishib oldilar. Sanoat, energetika, transport-logistika, qishloq xo'jaligi sohalarida ham qo'shma loyihalar amalga oshirilmoqda”, – deyiladi maqolada.

Nashrda, shuningdek, Qozog'iston va O'zbekiston o'rtasidagi munosabatlar kun tartibiga amalda barcha mumkin bo'lgan yo'nalishlar kiritilgani alohida urg'ulangan. Eng muhimi, barcha mavjud masalalar bo'yicha qarorlar o'zaro manfaat va barqaror rivoj­lanishni ta'minlash mezoni asosida qabul qilinadi.

Maqolada O'zbekiston Prezidenti huzuridagi Strategik va mintaqalararo tadqiqotlar instituti (SMTI) direktori Eldor Aripovning ushbu siyosiy muloqot institutsional asosga ega bo'lgani – Oliy davlatlararo kengash tuzilgani, tashrif davomida uning birinchi yig'ilishi bo'lib o'tishi haqidagi fikr­lari ham o'rin olgan.

“Qozog'iston va O'zbekiston eng muhim savdo sherik­laridir. O'zbekiston uchun Qozog'iston hamisha uchta yirik savdo-iqtisodiy sheriklardan biri bo'lib kelgan, shu bois tashrif natijasida savdo-iqtisodiy hamkorlikni yanada faollashtirish bo'yicha yangi kelishuvlarga erishiladi. Qo'shma investitsiyaviy loyihalarni amalga oshirish bo'­yicha ishlarga yangi sur'at bag'ishlaydi”, – deya SMTI direktori fikrlaridan iqtibos keltirilgan manbada.

Ushbu mamlakatdagi ommabop “24KZ” yangiliklar kanali esa, o'z navbatida, Qozog'iston Milliy muze­yida ochilgan o'zbek rassomlari asarlari ko'rgazmasi haqidagi xabarni o'z o'quvchilari o'rtasida tarqatdi.

Poytaxt Milliy muzeyiga O'zbekistonning 200 ga yaqin rangtasvir va xalq amaliy san'ati asarlari joylashtirildi, deb ma'lum qilgan kanal.

“O'zbekistonlik usta va rassomlarning uch avlodi ijodi keng jamoatchilikka taqdim etildi. Ko'rgazma keng ko'lamli janr va texnikalarni qamrab oladi: an'anaviy miniatyuradan tortib, zamonaviy san'atgacha. 8 avgustga qadar davom etadigan ko'rgazma qozog'istonliklarga O'zbekistonning madaniy va tarixiy an'analari bilan yaqindan tanishish imkonini taqdim etadi”, – deb yozgan yangilik­lar kanali.

“24KZ”, shuningdek, Qozog'iston poytaxti Ostona shahrida O'zbekiston kinosi kunlari boshlangani haqida xabar berdi. Tomoshabinlar uchun mashhur avtobiografik filmlar va zamonaviy kinolar tayyorlandi. Namoyishlar “Mega Silkway” kinosaroyida bo'lib o'tadi va unga kirish bepul.

“Qozog'istondagi O'zbekiston kinosi kunlari har yili o'tkaziladigan tadbirdir. Bunday madaniy tadbirlar ikki mamlakat hamkorligini har tomonlama rivojlantirmoqda. Masalan, Qozog'iston va O'zbekis­ton rejissyorlari hamkorlikda “Meros” va “Abay” filmlarini suratga olishgan. Kino ijodkorlari Markaziy Osiyodagi yirik festivallarda ham taj­riba almashadi. Kasbiy aloqalar ham kinematografiya sohasida hamkorlik memorandumi bilan mus­tahkamlangan”, – deyiladi maqolada.

Nashrda mamlakatlarimiz o'rtasidagi kino sohasidagi hamkorlik bu bilan cheklanib qolmasligi ta'kidlangan. Ijodiy g'oyalarni hayotga tatbiq etish bo'yicha oldinda ko'plab reja va g'oyalar turibdi, deb ma'lum qilingan materialda.

Maqola yakunida, “Ostonaliklar Qozog'istondagi O'zbekiston kinosi kunlari doirasida namoyish etiladigan “Yasha, xotin!” komediyasini bepul tomosha qilish imkoniyatiga ega”, – deb yozgan portal.

“Dunyo” AA