O'zbekistonlik 7-sinf o'quvchisi Italiyada o'tkazilgan xalqaro ingliz tili olimpiadasida uchinchi o'rinni qo'lga kiritdi
Joriy yilning 23-26 sentyabr kunlari Italiyaning Assizi shahrida “Global Hippo Association” tashkiloti tomonidan tashkil etilgan 12-Xalqaro ingliz tili fani olimpiadasining yakuniy bosqichi bo'lib o'tdi.
Mazkur tanlovning saralash bosqichlarida 63 ta davlatdan 88 ming nafardan ziyod o'quvchilar ingliz tili fani bo'yicha imtihonlarda ishtirok etdi. O'zbekistonda esa 4,5 ming nafar maktab o'quvchilari mazkur tanlovlarda qatnashdi.
O'zbekistondagi saralash bosqichlaridan muvaffaqiyatli o'tgan o'quvchilar joriy yil iyun oyida Istanbulda (Turkiya) o'tkazilgan Osiyo bosqichida o'z bilimlarini sinovdan o'tkazishdi. Unda Qoraqalpog'iston Respublikasi, Andijon, Buxoro, Surxondaryo, Xorazm viloyatlari va Toshkent shahridan 9 nafar maktab o'quvchilari o'z guruhlarida g'olib bo'lib, olimpiadaning yakuniy bosqichiga yo'llanma olgan edi.
Italiya Tashqi ishlar va xalqaro hamkorlik vazirligi shafeligida o'tkazilgan yakuniy bosqichda 250 nafar o'quvchi ingliz tilida o'z bilimlarini sinash uchun turli guruhlarga bo'lingan holda o'zaro bahslashdi.
Guruhlar o'rtasida kechgan murosasiz imtihonlarda surxondaryolik 7-sinf o'quvchisi Mirabror Rajabboyev “Hippo-2” guruhida xalqaro olimpiadaning faxrli 3-o'rin sohibiga aylandi.
Tashkilotchilar barcha ishtirokchilarni xalqaro ingliz tili sertifikati, medal va turli qimmatbaho sovg'alar bilan taqdirladi.
Ushbu xalqaro ingliz tili fani olimpiadasining 2025 yildagi Yevropa bosqichi Venetsiya shahrida, Osiyo bosqichi esa Samarqand shahrida va yakuniy bosqich Sitsiliya orolida bo'lib o'tishi ma'lum qilindi.
Shuningdek, O'zbekiston sharafini himoya qilgan o'quvchilar va ularning ustozlariga mamlakatimiz elchixonasi nomidan tashakkurnomalar taqdim etildi.
“Dunyo” AA,
Rim shahri.