“Islom – ezgulik va tinchlik dini” xalqaro ilmiy-amaliy konferensiyasi ishtirokchilariga
Hurmatli anjuman qatnashchilari!
Qadrli do'stlar!
Avvalo, sizlarni azim Toshkent va qadimiy Xiva shaharlarida o'tkazilayotgan “Islom – ezgulik va tinchlik dini” mavzusidagi xalqaro konferensiyaning ochilishi bilan samimiy tabriklayman.
Biz dunyoning uzoq va yaqin davlatlaridan tashrif buyurgan siz, aziz mehmonlarni — nufuzli xalqaro islom tashkilotlari rahbarlari, taniqli olim va ulamolar, jamoat arboblari va tadqiqotchilarni tinchlik va totuvlik, do'stlik va hamjihatlik elchilari, deb bilamiz.
Sizlarning muqaddas islom dinining insonparvarlik mohiyatini ochib berish, jahon ilm-fani va sivilizatsiyasi rivojiga ulkan hissa qo'shgan buyuk allomalarimiz merosini o'rganish va keng targ'ib etish borasida olib borayotgan ibratli faoliyatingizni barchamiz yaxshi bilamiz va yuksak qadrlaymiz.
Ana shunday ezgu ishlaringiz uchun sizlarga o'z nomimdan, xalqimiz nomidan chuqur minnatdorlik bildiraman.
Bag'rikeng va mehmondo'st O'zbekiston diyoriga xush kelibsiz!
Aziz do'stlar!
Xabaringiz bor, bugungi anjumanimiz Birlashgan Millatlar Tashkiloti Bosh Assambleyasining 2023 yil 19 sentyabr kuni Nyu-York shahrida bo'lib o'tgan 78-sessiyasida O'zbekiston tomonidan ilgari surilgan tashabbus asosida o'tkazilmoqda.
Ushbu ezgu tashabbus xalqaro hamjamiyat va sizlar kabi ma'rifatparvar va oqil insonlar tarafidan qo'llab-quvvatlangani bizga mamnuniyat bag'ishlaydi.
Konferensiyamizning “Islom – ezgulik va tinchlik dini” deb nomlanishi ham albatta bejiz emas. Hammamiz yaxshi bilamizki, islom dini odamzod uchun tinchlik va omonlik dini sifatida yuborilgan buyuk ta'limotdir. Muqaddas Qur'oni karimning “Baqara” surasi, 208-oyatida: “Ey, iymon keltirganlar, yoppasiga tinchlik ishiga kirishingiz!” — deya da'vat qilingani ham fikrimizni tasdiqlaydi.
Ulug' vatandoshimiz Imom Termiziy hazratlari rivoyat qilgan: “Allohdan afv va tinchlik-omonlikni so'ranglar. Chunki biror kishiga iymondan keyin tinchlik-omonlikdan afzalroq ne'mat berilgani yo'q”, degan hadisi sharifda ham tinchlik va barqarorlikning insoniyat hayotida qanday beqiyos ahamiyatga ega ekani alohida ta'kidlangan.
Bugungi kunda Yangi O'zbekistonda islom dinining ezgu qadriyatlari, nomlari dunyoga mashhur mutafakkir olimu ulamolarimiz merosini asrab-avaylash, ularni ilmiy o'rganib, xalqimiz va jahon ahliga yetkazishga qaratilgan keng ko'lamli islohotlar amalga oshirilmoqda.
So'nggi yetti yilda mamlakatimizda Imom Buxoriy, Imom Termiziy, Imom Moturidiy xalqaro ilmiy-tadqiqot markazlari tashkil etilgani, ilmiy-ma'rifiy jihatdan g'oyat noyob bo'lgan Islom sivilizatsiyasi markazi faoliyati yo'lga qo'yilgani buning yorqin dalilidir.
Ayni vaqtda, Imom Buxoriyning “Sahihi Buxoriy”, “Tarix”, “Xalqu af'ol al-ibod”, Imom Termiziyning “Sunani Termiziy”, Imom Moturidiyning “Ta'vilot al-Qur'on”, “Tavhid”, Abu Muin Nasafiyning “Tabsiratul adilla”, Burhoniddin Marg'inoniyning “Hidoya” kabi islom dunyosida nodir sanalgan asarlari o'zbek tiliga tarjima qilinib, zamonaviy sharhlari tayyorlangani va bu kabi xayrli ishlar izchil davom etayotganini ta'kidlab o'tmoqchiman.
So'nggi yillarda jahonda kuzatilayotgan globallashuv jarayonlarining ijobiy jihatlari bilan birga, ayrim noxush holatlar, jumladan, islomofobiya ko'rinishlari musulmon jamiyatlarining tafakkur va turmush tarzi, madaniyati, urf-odat va qadriyatlariga ham ta'sir ko'rsatayotganiga hammamiz guvohmiz.
Shu ma'noda, mazkur konferensiyada yer yuzida tinchlik-osoyishtalikni mustahkamlash, mo'min-musulmonlar uchun manfaatli bo'lgan azaliy qadriyatlarni asrab-avaylash, globallashuv sharoitida islom dinini zamon bilan uyg'un va hamohang holda rivojlantirish, ma'naviy poklik va odob-axloqqa qarshi g'oyaviy tahdidlarning oldini olish, islomda ijtimoiy himoya masalalari kabi muhim mavzularning muhokama etilishi katta ahamiyat kasb etishi shubhasiz.
Ishonamanki, anjuman jarayonida bo'lib o'tadigan qizg'in muhokamalar, bildiriladigan g'oya va tashabbuslar muqaddas islom dinimizning asl ma'no-mazmunini, ezgulik va tinchlikka xizmat qiladigan olijanob g'oyalarini ochib berish va ommalashtirishda muhim qadam bo'ladi.
Xalqaro konferensiya doirasida mamlakatimizda mo'min-musulmonlar uchun yaratilgan sharoitlar, vijdon erkinligini ta'minlash, ulug' ajdodlarimizning tabarruk xotiralarini e'zozlash, ularning ilmiy-ma'rifiy merosi va nodir qo'lyozmalarni tadqiq va targ'ib etish yo'lida amalga oshirilayotgan ishlar bilan yaqindan tanishib, bu boradagi o'zaro hamkorligimizni yanada rivojlantirish bo'yicha yangi taklif va tavsiyalarni bayon etasizlar, degan umiddaman.
Sizlarni bugungi nufuzli anjumanning ochilishi bilan yana bir bor qutlar ekanman, Yaratgan Robbimizdan barchangizga sihat-salomatlik, ilmiy va ijodiy faoliyatingizga baraka tilab qolaman.
Shavkat MIRZIYOYEV,
O'zbekiston Respublikasi
Prezidenti