Yangi O'zbekiston bunyodkori va faxr hissi

(Ozarbayjonga safar taassurotlari)

Faxr va g'urur tuyg'usi haqida ko'p gapirish mumkin. Vatan, Ona, Istiqlol, millat bayrog'i, Konstitutsiya, yurtimizni jahonga tanitayotgan bilimdon yoshlarimiz, mohir sportchilarimiz. Bularning bari bizga faxr-iftixor tuyg'usini beradi. Lekin Millat Sardori, Yurt Yetakchisi bilan faxrlanish hissi ham borki, bu tuyg'u Vatanini sevadigan, xalqini yaxshi ko'radigan har qanday odamga qandaydir o'zgacha ko'tarinkilik baxsh etib, motivatsiya-kuch-g'ayrat beradi, ilhomlantiradi, ko'ngillarni ravshanlashtirib yuboradi. Negaki, mamlakat rahbari, Yurt Sardori jamiki yutuqlarning, muvaffaqiyatlarning garovi, timsoli desak aslo xato bo'lmas. Shu ma'noda har qanday uyg'oq qalbli inson Yurtboshimizdan faxrlanishi, g'ururlanishi tabiiy bo'lsa kerak.

Mamlakatimizda Prezidentimiz Shavkat Mirziyoyev tashabbusi va rahbarligida shiddat bilan amalga oshirilayotgan keng ko'lamli islohotlar jarayonlarini, samaralarini o'z ko'zi bilan ko'rayotgan shu yurtning oddiy bir farzandi sifatida buni xorijda o'tgan katta bir tadbirda his qilish yanada hayajonli kechganini faxr bilan ayta olaman.

Ayni kechinmalar Boku shahridagi Ozarbayjon Milliy kutubxonasida O'zbekiston kasaba uyushmalari Federatsiyasi Kengashi raisi, taniqli siyosatshunos, senator Qudratilla Rafiqovning “Mening Prezidentim” va “Millatparvar” kitoblari asosida ozarbayjonlik ijodkor-tarjimonlar – yozuvchi va shoir, “O'zbek kelayotir tarix qa'ridan” she'ri bilan ham mashhur Akif Bag'irov hamda adabiyotshunos olim, tarjimon  Yashar Qosim tomonidan tayyorlagan “Shavkat Mirziyoyev fenomeni” kitobi taqdimotida ayniqsa, qalbimda jo'sh urdi.

Har jihatdan yuqori darajada o'tgan taqdimotda Ozarbayjon parlamenti vakillari, taniqli shoir va yozuvchilar, keng jamoatchilik hamda O'zbekiston Respublikasi Oliy Majlisi senati va yurtimiz delegatsiyasi a'zolari, ommaviy axborot vositalari vakillari ishtirok etdi.

Taqdimot boshlanishi avvalida bir qator ozarbayjonlik mashhur siyosatchi va ziyolilar bilan suhbatlashish imkoniga ega bo'ldik. Ular ushbu kitoblar taqdimotining Bokuda o'tkazilayotgani o'zbek-ozarbayjon xalqlarining bir-biriga yaqinligi, o'zaro do'stlik rishtalari mustahkamlanib borayotgandan dalolat ekanini alohida ta'kidladilar.

— Ozarbayjondagi “Tahsil” noshirlik uyi tomonidan chop etilgan “Shavkat Mirziyoyev fenomeni” kitobi  juda katta mas'uliyat bilan tarjima qilindi, bu jarayonda har bir so'z bo'yicha maslahatlashdik, fikr almashdik, – dedi taniqli ijodkor, tarjimon Yashar Qosim. — Bizga Qudratilla Rafiqovning kitoblarining tili va uslubi yoqdi. Tarjima jarayonida ana shu jihatlarni ushlash, saqlash, ozarbayjon tilida chiroyli jaranglaydigan so'zlarni topish va qo'llashga harakat qildik. Odamga ko'p narsa beradigan mazkur kitobni o'qib, Yangi O'zbekistonni yanada yaqinroq bilish, uning asoschisi shaxsiyati, Prezident Shavkat Mirziyoyevning Vatan va Millat istiqboli, shoni uchun amalga oshirayotgan ishlari haqida muhim ma'lumotlarga ega bo'lish mumkin. Kitobda jonli, hayotiy misollar, xalqona ibora va maqollar juda yuksak mahorat bilan qo'llanilgani e'tiborga molik.

Tarjimon sifatida o'zbek maqollarining ozarbayjon tilidagi muqobillarini qo'llashga intilar ekanman, xalqlarimizning yashash tarzi, fikrlashi va falsafasi ham naqadar mushtarakligini his etdim.

Taqdimotni Ozarbayjon Matbuot kengashi raisi Rashad Mejid olib bordi. Tadbirda Kavkaz musulmonlari idorasi raisi Ollohshukur Poshshozoda, Ozarbayjon Yozarlar birligi raisi Anor Rizoyev, O'zbekiston Respublikasining Ozarbayjondagi Favqulodda va muxtor elchisi Bahrom Ashrafxonov, O'zbekiston Oliy Majlisi Senati a'zolari Mahmud Toir, Husan Ermatov, taniqli adib Xurshid Do'stmuhammad, Ozarbayjon Milliy ilmlar akademiyasi prezidenti Isa Habibbeyli, ijodkor-tarjimonlar Akif Bag'irov hamda Yashar Qosim,  O'zbekiston Yozuvchilar uyushmasi raisi o'rinbosari G'ayrat Majid “Shavkat Mirziyoyev fenomeni” kitobi mazmun-mohiyati xususida o'z fikr-mulohazalarini bildirdi.

So'zga chiqqanlar keyingi yillarda O'zbekiston va Ozarbayjon munosabatlari ikki davlat yetakchilari Shavkat Mirziyoyev va Ilhom Aliyevning siyosiy irodasi tufayli yangi bosqichga ko'tarilganini alohida ta'kidladilar. Mahorat bilan ozarbayjon tiliga tarjima qilingan ushbu kitob ozarbayjonlik siyosatchi va ziyolilar, umuman, keng jamoatchilik tomonidan katta qiziqish bilan qarshi olingani e'tirof etildi. Yangi O'zbekiston bunyodkori islohotlariga bee'tibor bo'lmagan har bir inson uchun zarur ma'lumot va tahlillar ifodasi bo'lgan ushbu asarda davlatimiz rahbari boshchiligida yurtimizda amalga oshirilayotgan o'zgarish va yangilanishlar, aholiga yaratilayotgan qulaylik va imkoniyatlar, jumladan, iqtisodiy rivojlanish, infratuzilmani modernizatsiya qilish, ijtimoiy sohani yaxshilash, O'zbekistonning xalqaro maydondagi nufuzini mustahkamlash kabi masalalar yoritilgani qayd etildi.

Kitobda O'zbekiston o'z mavqeini xalqaro maydonda taboro mustahkamlayotgani, qo'shni mamlakatlar bilan yaqin qo'shnichilik siyosati va konstruktiv muloqot amalga oshirilayotgani olqishlanib, davlatimiz rahbarining liderlik faoliyati, unikal boshqaruv uslubiga alohida e'tibor qaratilgani aytildi.

Ozarbayjonlik olimlar, shoir va yozuvchilar, siyosiy va jamoat arboblarining shu kabi fikr-mulohaza va e'tiroflari Prezidentimiz Shavkat Mirziyoyev faoliyatiga nafaqat mamlakatimizda, balki xalqaro hamjamiyatda ham qiziqish katta ekanidan dalolat beradi.

Taqdimotda bir zum xayol surar ekanman, yildan-yilga chiroy ochib borayotgan shahar va tumanlarimizda, chekka qishloq va ovullarimizda aholiga yaratilayotgan qulayliklar, imkoniyat va imtiyozlar, odamlarning yaxshi yashashi, soha va tarmoqlar ravnaqi, tinchlik va farovonlikni, to'kinlikni  ta'minlash yo'lida ro'yobga chiqarilayotgan keng ko'lamli  ishlar, bunyodkorliklar ko'z oldimdan o'tdi. Qalbimni faxr-iftixor, shukronalik tuyg'ulari egalladi.

Tadbir yakunida “Shavkat Mirziyoyev fenomeni” kitobi tarjimonlari Akif Bag'irov hamda Yashar Qosimga O'zbekiston tomoni vakillarining sovg'alari tuhfa etildi. Ularga ikki davlat o'rtasidagi madaniy-ma'rifiy  aloqalarni mustahkamlashga qo'shgan hissalari uchun minnatdorlik bildirildi.

Taqdimot ishtirokchilari Ozarbayjon Milliy kutubxonasida tashkil etilgan O'zbekiston burchagidagi mavjud adabiyotlar bilan ham yaqindan tanishdilar.

* * *

Barcha sohada bo'lgani kabi jurnalistikada ham xalqaro hamkorlik, tajriba almashish muhim ahamiyat kasb etadi. Shundan kelib chiqqan holda Uyushmamiz tomonidan xorij davlatlari media tashkilotlari bilan aloqalarni yo'lga qo'yish va rivojlantirishga alohida e'tibor qaratilmoqda. Keyingi yillarda  O'zbekiston Jurnalistlar uyushmasi bir qator xorijiy yurtlardagi jurnalistlar tashkiloti, jumladan, Ozarbayjon Matbuot kengashi bilan hamkorlik memorandumi imzoladi. Ana shu memorandum ijrosi doirasida joriy yilning o'tgan davrida ozarbayjonlik media soha vakillarining O'zbekistonga, yurtimiz ommaviy axborot vositalari yetakchi va yosh jurnalistlarini ushbu mamlakatga ijodiy safarlari tashkil etildi.

Xususan, Uyushmamizga joriy yilning 12 dekabr kuni kelgan Ozarbayjon Matbuot kengashi raisi Rashad Mejidning taklif xatiga asosan 15-19 dekabr kunlari mazkur mamlakatga navbatdagi ijodiy safar tashkil etildi.

Safar doirasida Ozarbayjon Yozarlar birligida ham bo'lindi. Turkiy dunyo adabiyotining taniqli namoyandalaridan biri bo'lgan  Anor muallim bilan uchrashib, mamlakatlarimiz hamkorlik aloqalari, xususan, o'zbek va Ozarbayjon adabiyoti, tarjimachilik bo'yicha suhbatlashish imkoniga ham ega bo'ldik. Qizg'in suhbat yakunida unga Uyushmamiz sovg'asini topshirildi.

Keyingi kun Boku shahridagi  Ozarbayjon Matbuot kengashi binosida O'zbekiston Jurnalistlar uyushmasi qoshidagi Yosh jurnalistlar kengashi tashabbusi bilan ozarbayjonlik yosh jurnalistlar ishtirokida muloqot tashkil etildi. Tadbirda taniqli jurnalist, mohir yozuvchi, O'zbekistonda xizmat ko'rsatgan madaniyat xodimi Xurshid Do'stmuhammad, O'zbekiston Respublikasi Oliy Majlis Senati a'zosi, “Adabiyot ziyosi” gazetasi bosh muharriri Mahmud Toir ham ishtirok etdi.

O'zaro muloqotda ikki mamlakat jurnalistikasining bugungi kuni, informatsion xurujlar sharoitida feyk xabarlar va dezinformatsiyaga qarshi kurashish masalalari xususida fikr almashildi. Ustoz ijodkorlar o'z tajribalari asosida yosh jurnalistlarga tavsiyalar berdi.

Mavzu yuzasidan muhokamalarda Ozarbayjon Matbuot kengashi boshqaruvi a'zosi Xajibey Haydarli, O'zbekiston Milliy axborot agentligi jurnalisti Aziza Alimova, Matbuot kengashi mas'ul kotibi Avaz Rustamov, “Islohotchi yoshlar” NTM rahbari Farid Shahbazli, “Mening yurtim” telekanali jurnalisti Muhammadamir Hayotzoda,  “Azxabar.com” veb-sayti rahbari Afseleddin Agalarov va boshqa qalamkashlar o'z taklif va tavsiyalari, fikrlari bilan o'rtoqlashdi.

Tadbirda ikki mamlakat media tuzilmalari, xususan, yosh jurnalistlari ishtirokida 2025 yilda amalga oshirilishi ko'zda tutilayotgan loyihalar va tadbirlar, hamkorlik aloqalarini yangi bosqichga olib chiqish bo'yicha ham fikr almashildi.

Uchrashuv so'ngida ishtirokchilar bunday formatdagi muloqotlar yosh jurnalistlar uchun mahorat sabog'i vazifasini bajarib, har tomonlama foydali bo'lishini qayd etishdi.

O'zbekiston Jurnalistlar uyushmasi va yurtimiz ommaviy axborot vositalari vakillari Ozarbayjonga safari davomida “Yeni Çağ” (“Yangi asr”) media-guruhi xususiy tahririyatida ham bo'lib, ushbu jamoa xodimlari uchun yaratilgan shart-sharoitlar, xususan, tahririyat media studiyasi texnik imkoniyatlari bilan yaqindan tanishdi. Uchrashuvda “Yeni Çağ” (“Yangi asr”) media-guruhi bilan O'zbekistondagi internet nashrlari o'rtasida hamkorlikni yo'lga qo'yish, yangi g'oya va tashabbuslar bo'yicha so'z yuritildi. Ma'lumot uchun, ushbu tahririyat Ozarbayjondagi faol nodavlat axborot resurslaridan biri hisoblanadi. Bu yerda yigirma nafarga yaqin ijodkor faoliyat olib boradi, materiallar bir necha tillarda tayyorlanadi.

Quvonchlisi, Ozarbayjonga safarimiz har jihatdan foydali, ayni kungi turk dunyosi va xalqaro media maydonidagi holat, sohadagi mavjud muammo va kamchiliklar, galdagi hamkorlik  bo'yicha muloqot va fikr almashishlarga boy bo'ldi. Ikki mamlakat jurnalistlarining o'quvi va malaka oshirish kurslarini tashkil etish bo'yicha muzokaralar olib borildi.

Xolmurod Salimov,

O'zbekiston Jurnalistlar uyushmasi raisi v.b.

Toshkent–Boku–Toshkent