Boshim uzra hilpiraydi Vatan bayrog'i
Irodasi mustahkam, shijoatli o'zbek o'g'lonlari Vatanimiz xizmatida sobit bo'ladilar. Ular buyuk sarkarda Amir Temurning ajdodlaridir. 14 yanvar — Vatan himoyachilari kuni arafasida armiya safida muddatli harbiy xizmatni o'tayotgan ana shunday yigitlardan biri, Andijondagi harbiy qismlarning birida o'z burchini o'tayotgan Oybek Hamroyev bilan suhbatlashdik.
— Harbiylik kiyimini egnimga ilganimda, daf'atan ko'nglimda faxr va g'urur tuyg'usini his etdim. Bosh kiyimimda Humo qushi ramzi qo'ndirilgan nishon, belimda kamar. Endi men harbiyman, er yigitman, Vatanimning, uning sarhadlarida yashayotgan yurtdoshlarimning, ota-onam, jajji singillarim, ukajonlarimning himoyachisiman, degan fikrlar boshimda g'ujg'on o'ynar, eslaganim sari kuchimga kuch qo'shilardi. Ayniqsa, harbiy orkestr o'qchi musiqachisi lavozimiga qabul qilishgach, bor tuyg'ularimni harbiy marshlarda ifodalash va bu bilan xizmatdoshlarimni g'ayratlantirishga kirishdim. Jangovar ruh har bir askar yigit qon-qoniga singib ketishi kerak. Bu his yigitlik burchini Vatan sarhadlarida o'tayotganlar uchun tanish. Men jangovar ruh qanaqa bo'lishini xizmatim davomida tayyorgarlik mashqlari davomida ustozlarimdan olayotgan ta'lim-tarbiya orqali his etdim, amalda ko'rdim ham.
Bolaligimda harbiy xizmatdan qaytgan akalarimga havas qilardim. Mana endi o'zim harbiyman. O'shanda havasim ortib, tanklarning rasmlarini chizardim. Otam: “Ulg'aysang kim bo'lasan?” desalar, “Albatta, Vatan himoyachisi bo'laman!” deb va'da berardim. Harbiy xizmatga chaqirilganimda esa va'dalarim esimga tushib, entikib ketdim. Mana, maqsadlarimdan biri amalga oshdi. Komandirlarim tomonidan ota-onamga, oilamga tashakkurnomalar, diplom, faxriy yorliqlar yuborilibdi. Otamdan: “Shunday o'g'lim borligidan faxrlanaman!” degan so'zlarni eshitganimda, boshim osmonga yetdi. Har bir erishgan g'alabam ota-onam va xalqimning cheksiz ishonchidir.
Yurtboshimiz tomonidan biz harbiylar uchun yaratilayotgan shart-sharoitlar kundan-kunga yangi imkoniyatlar eshigini ochmoqda. Juda ko'p matonatli do'stlar orttirdim. Bo'sh paytlarimizda davra suhbatlari, kitobxonlik, badiiy kechalar uyushtiriladi. Bizning kun tartibimiz juda qiziqarli, jangovar ruhda va mazmunga to'la o'tadi. Men Amir Temurdek buyuk sarkarda bobomizning davomchilari safidaligimdan faxrlanaman. Tengdoshlarimga qarata: “Sharafli Vatan himoyasiga hamisha shay turaylik! Ezgu maqsadlar yo'lida birlashaylik, aziz yoshlar!” degim keladi. Vatanimiz sarhadlarini ko'z qorachig'idek asraydigan, bilagi kuchga to'la, zabardast o'g'lonlar safi yanada kengaysin.
O'zJOKU harbiy jurnalistika
yo'nalishi 2-bosqich talabasi
Rushana RO'ZIBOYEVA
yozib oldi.