“Hech qanday “trevoga” muvozanatimni buza olmagan…”

Keksalar duosiga hech e'tibor berganmisiz? Avvalo, yurtga tinchlik, insonlar orasiga mehr-oqibat, farzandlar kelajagiga komillik tilashadi. Asrlar osha og'izdan og'izga o'tib kelayotgan bunday hikmatli duolar zamirida urush va ocharchilik ko'rgan bobo-yu buvilarimiz nidosi mujassamdek. Shukrki, tinch zamonda yashayapmiz. Uning ortida qanchadan qancha insonlarning sa'y-harakatlari, harbiy xizmatchilarning bedor tunlari, keksalarimiz duolari yotibdi.

Podpolkovnik Farhod Egamyorov ham yurt posboni bo'lishdek sharafli kasbga ota-onasining qiziqishi va duolari sabab kirib kelgan. Mana, salkam 20 yillik faoliyati mobaynida bir qancha xalqaro natijalarni zabt etgan Farhodjon bugungi kunda davlatimizning nufuzli unvonlaridan biri – “Mardlik” ordeniga loyiq ko'rildi. Andijon viloyatining Marhamat tumanida tug'ilib voyaga yetgan qahramonimizning hayoti va faoliyatiga to'xtalmoqni joiz bildik.

Sharafli kasbga ilk qadam

– Maktabda o'qib yurgan kezlarim harbiy libosda yurgan akalarimizga havas qilganman. O'shanda men ham xuddi ulardek bo'lishni tasavvur qila olmasdim. Chunki hamma ham bunday sharafga loyiq emasdek tuyulaverardi. Vaqt o'tib, mendagi ikkilanishlar otamning qat'iyati sabab yo'qqa chiqdi. O'zimga bo'lgan ishonch ortgandi. O'z oldimga “Men, albatta harbiy bo'laman!” degan maqsadni qo'ydim. 2006-yili Chirchiq oliy tank qo'mondonlik-muhandislik bilim yurti kursantiga aylanganimda mendan ko'ra ko'proq ota-onam xursand bo'lgan edi. 2010-yili bilim yurtining havo-desant qo'shinlarining taktik qo'mondonligi fakultetini a'lo baholarga tugatib, Jizzax viloyatidagi harbiy qismlardan biriga guruh komandiri o'rinbosari vazifasida xizmatni boshladim.

Armiya – bir jamoa

– Kichik ofitserlik davrimda O'zbekiston Respublikasi Qurolli Kuchlari hamda Mudofaa vazirligi miqyosida bo'lib o'tgan musobaqalarda qatnashdim. Bu ishtiroklar faoliyatim davomida katta tajriba to'plashimga asos bo'lib xizmat qildi. Ayniqsa, jamoaviy musobaqalar bizni birdamlikda harakat qilishimiz uchun katta turtki bo'ldi. Erishilgan yutuqlar ham, yo'l qo'yilgan kamchiliklar ham jamoaniki.

Xalqaro musobaqadagi shijoat

– Yurtimiz harbiylari 2019-yildan buyon Xalqaro armiya o'yinlarida ishtirok etib kelmoqda. Muvaffaqiyatlarimiz ulkan. Men erishilgan natijalardan ko'ra, boshqa davlatlarning bizga nisbatan munosabati o'zgarganiga urg'u bermoqchiman. 2019-yili Xalqaro armiya o'yinlari doirasida Rossiya Federatsiyasida bo'lgan nufuzli musobaqada “Taktik o'qchi” yo'nalishida bronza medalni qo'lga kiritdik. O'shanda Rossiyaning “Zvezda” telekanali muxbirlari musobaqa ishtirokchilaridan intervyu olar ekan, bizga kelganda, “Sizlarning harbiy kiyim rusumlaringiz xalqaro maydondagi musobaqalar talabiga mos emas, uzr”, deyishgandi. Bu holat jamoamizning ruhiyatiga salbiy ta'sir etgan.

Shundan so'ng 2020-yili Qozog'iston Respublikasida bo'lib o'tgan Xalqaro armiya o'yinlarida boshqacha fondagi kiyimda qatnashdik. Unda ham “taktik o'qchi” yo'nalishida ishtirok etib, kumush medalni qo'lga kiritdik. Shunda hatto raqib jamoalar ham bir yil ichida yurtimiz armiyasida shuncha o'zgarishlar bo'lganidan hayratda ekanini yashirmagan. “Zvezda” telekanali muxbirlari birinchilardan bo'lib bizning jamoamiz vakillaridan intervyu olgan edi…

Janubiy Koreyadagi e'tirof

– Koreya Respublikasining Kongvando provinsiyasi Inje shahrida Xalqaro ilmiy-jangovar tayyorgarlik musobaqasi tashkil qilindi. Unda jami 13 ta jamoa, jumladan AQSh, Avstraliya, O'zbekiston va Kambodja davlatlaridan 500 dan ortiq harbiy xizmatchi ishtirok etdi. Musobaqa shartlari juda murakkab bo'lib, biz uchun joy ham, shartlar ham begona edi. Musobaqada har bir jamoa tasodifiy qur'a tashlash orqali bellashuvga kirishardi. Baholash jarayoni ishtirokchi guruhlar shartlarni to'liq bajargani, “omon qolish” darajasi, jangovar harakatlarning qoidalariga rioya qilingani, jangovar harakatlar taktik vaziyatga mos kelishi, har tomonlama tahlil natijalarini xabardor qilish orqali o'tkazildi.

Murakkab va mashaqqatli musobaqadagi ishtirokimiz a'lo darajada yakunlandi. Ketma-ket ikki (2023–2024) yil mobaynida peshqadamlikni qo'ldan bermadik. Bir jamoa bo'lib harakatlanganimiz, munosib raqiblarni ortda qoldirishimiz uchun muhim omil bo'lib xizmat qildi. Shu bilan birga, yakkalik tartibida bo'lib o'tgan eng ilg'or vzvod komandiri nominatsiyasida ham faxrli birinchi o'rinni qo'lga kiritdim. Taqdirlash marosimida so'zga chiqqan Koreya Respublikasi mudofaa vaziri “O'zbek askarlari O'zbekiston Prezidenti kabi shijoatli, jasur va energiyaga boy ekan”, deb ta'kidlagan edi. Shunda o'zimizga bo'lgan ishonchimiz yanada ortdi. O'zbekiston harbiy xizmatchisi ekanimizdan g'ururlandik. Biz orqali Qurolli Kuchlar Oliy Bosh Qo'mondonining nomi tilga olinganida ota-onasiga rahmat olib kelgan farzanddek xursand bo'ldik.

Onamni yig'latgan xushxabar

– Bir tadbirdan qaytayotganimizda telefonim jiringladi. Qarasam, birga o'qigan kursdoshim. Yashil tugmani bosdim va qulog'imga tutdim. Telefonning narigi tomonidan menga tabrik kela boshladi. Hayron bo'ldim.

“Mardik” ordeniga loyiq ko'rilibsan, tabriklayman! Hozirgina Prezident farmonini o'qidim. Unda sening ham isming bor ekan”. Kasbim taqozosi bilan bo'ladigan har qanday “trevoga” mening ichki muvozanatimni buza olmagan. Qanchalik sovuqqon bo'lmayin, kursdoshimning taqdirlanganim haqidagi “trevoga”si ichki hissiyotlarimni bir necha marotaba junbishga keltirdi. O'sha lahza yonimda onam ham bor edi. Birinchi bo'lib xushxabarni eshitgancha jimgina yig'lay boshladi.

Vatanni sevish, uni ko'z qorachig'idek asrash barchamizning burchimiz. Ammo o'z burchingni ado etsang-u, yurting seni mukofotlasa, bilmadim, bu holatni so'z bilan tasvirlab berolmayman. O'zbekistonda yashayotgan
37 milliondan ortiq inson taqdiri ishonchli qo'llarda ekaniga amin bo'ldim. Qilayotgan amallarimizning yaxshisi ham, yomoni ham javobsiz va e'tiborsiz qolmas ekan.

“Vatanparvar” muxbiri

Sherzod ShARIPOV yozib oldi.