Katta ishonch va g'amxo'rlik ifodasi
Inson qadri, uning huquq va erkinliklari eng oliy qadriyat sanalgan Yangi O'zbekistonda Davlatimiz rahbari tomonidan ilk kunlardanoq alohida ahamiyat qaratib kelinayotgan muhim masalalardan biri, bu — yurtda tinchlik-osoyishtalik va fuqarolar xavfsizligini ta'minlashdir.
Mamlakatimizda 25 oktyabr — Ichki ishlar organlari xodimlari kuni sifatida belgilangan.
Bu sana Vatanni sevgan, uning tinchligi, barqaror taraqqiyoti va farovonligi yo'lida xizmat qilayotgan har bir yurtdoshimiz uchun ham birday qadrli bayram, aslida.
Kasb bayrami munosabati bilan Davlatimiz rahbarining xodimlar hamda faxriylarga yo'llagan bayram tabrigi hamda bir guruh hamkasblarimizning yuksak davlat mukofotlari bilan taqdirlanganligi butun tizimga berilgan baho, bildirilgan katta ishonch va g'amxo'rlik ifodasi bo'lib, har bir xodim zimmasiga ulkan mas'uliyat ham yuklaydi, albatta.
Tabrikda Prezidentimiz soha xodimlarining faoliyatiga yuksak baho berib, “Ushbu qutlug' ayyomda, avvalo, Vatan oldidagi muqaddas qasamyodingizga doimo sodiq qolib, yurtimiz tinchligi va xalqimiz farovonligi yo'lida o'z zimmangizdagi g'oyat muhim vazifalarni yuksak mas'uliyat bilan ado etib kelayotganingizni alohida ta'kidlashni istardim”, deya e'tirof etdi.
Darhaqiqat, bugun tizimda faoliyat samaradorligini oshirish, jamoat tartibini saqlash, fuqarolar huquqlari, erkinliklari va qonuniy manfaatlarini ishonchli himoya qilishni ta'minlashda xodimlarning mas'uliyatini kuchaytirish borasidagi chora-tadbirlar izchillik bilan olib borilmoqda.
So'nggi 9 yil ichida Prezidentimizning bevosita rahbarligi bilan ichki ishlar organlari tubdan isloh qilindi. Bugungi kunda ichki ishlar organlari xalq manfaatlariga xizmat qiluvchi xalqchil tuzilmaga aylanib bormoqda.
Shaxsiy tarkibning asosiy qismi bevosita hududlarda, mahallalarning o'zida xizmat o'tamoqda.
Joylarda barcha huquq-tartibot idoralari va jamoatchilik, xususan, “mahalla yettiligi”ning o'zaro hamjihatlikda faoliyat yuritayotganligi bu boradagi sa'y-harakatlarda asosiy omil bo'lmoqda.
So'nggi yillarda jinoyatchilikka qarshi kurashish, mahallalarda xavfsiz muhitni yaratish, jinoyat va huquqbuzarliklarning oldini olish borasidagi yondashuv tubdan o'zgardi.
Ayniqsa, O'zbekiston Respublikasi Prezidentining “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo'yicha chora-tadbirlar to'g'risida”gi Qarori huquqni muhofaza qilish organlari faoliyatida dasturilamal bo'lib xizmat qilmoqda.
Ushbu hujjatda har bir mahallada huquqbuzarliklarning barvaqt oldini olish barcha rahbarlar uchun ustuvor vazifa etib belgilandi. O'tgan yilgi tahlillarga ko'ra, kriminogen vaziyat og'ir deb topilgan 1 235 ta mahalla tuman-shahar rahbarlariga nomma-nom biriktirildi.
Qaror doirasida Farg'ona, Andijon, Namangan, Samarqand va Toshkent viloyatlarida 419 ta mahallani o'z ichiga olgan 84 ta “Mahalla huquq-tartibot maskani” faoliyati yo'lga qo'yildi.
Bundan ko'zlangan maqsad ushbu maskanlarda xodimlarning xizmat samaradorligini oshirish, tezkorligini ta'minlab, fuqarolarning murojaatlari bilan ishlash tizimini takomillashtirishdan iborat.
Prezidentimiz tabriklarida ushbu yo'nalishdagi vazifalar izchillik bilan olib borilayotganligi qayd etilib, yil davomida jami mahallalarning yarmidan ko'pida jinoyat sodir etilmagani, yoshlar, ayollar va ishsizlar o'rtasidagi jinoyatchilikning keskin kamayishiga erishilgani ta'kidlangan.
Chindan ham turli sohaviy xizmatlar xodimlari tomonidan amalga oshirilgan tadbirlar natijasida joriy yilning o'tgan 9 oyida oldini olish lozim bo'lgan jinoyatlar soni o'tgan yilning mos davriga nisbatan 9 foizga kamaydi. Qotillik, o'g'rilik, talonchilik, bosqinchilik, firibgarlik, bezorilik jinoyatlari, yo'l-transport hodisalari sezilarli darajada qisqardi.
Davlatimiz rahbarining tabrigida, shuningdek, xalqimiz osoyishtaligini ta'minlashga qaratilgan harakatlarni izchil davom ettirish, giyohvandlik bilan bog'liq jinoyatlarga qarshi kurash bo'yicha tezkor-profilaktik tadbirlarni kuchaytirish, ichki ishlar organlarida sun'iy intellekt va raqamli texnologiyalar imkoniyatlaridan keng foydalanish, aholini kiberjinoyatlarning tahdid va ta'siridan ishonchli himoya qilish kabi masalalar kelgusi faoliyatimizning ustuvor yo'nalishlari sifatida belgilab berildi.
Shu boisdan hozirda tizimda faoliyatni raqamlashtirish va “inson omilini” kamaytirish choralari ko'rilmoqda. Barcha hududlarda “Xavfsiz shahar” tizimining sun'iy intellekt asosida boshqariluvchi “Qalqon” nomli dasturiy platformasi ishga tushirildi. Unga 60 308 ta videokuzatuv kamerasi hamda vazirlik va idoralarning 37 dan ortiq ma'lumotlar bazalari integratsiya qilindi.
Shu o'rinda aytish kerakki, so'nggi yillarda xodimlarni ijtimoiy himoya qilish, ularning xizmat va turmush sharoitlarini yanada yaxshilash borasidagi ishlar tizimli olib borilayotganligi har bir xodimning kundalik hayotida o'z aksini topmoqda. Chunki oilasidan ko'ngli to'q, uyida halovat bo'lgan xodimning xizmat faoliyatida ham unum bo'lishi tabiiy, albatta.
Tizimda intellektual va professional bilim darajasi yuqori, ma'naviy-axloqiy sifatlari baland bo'lgan xodimlarni tarbiyalash masalasiga ham e'tibor berilmoqda. Albatta, xalq manfaatlari yo'lida xizmat qilayotgan har bir xodim, avvalo, o'zining bilimi, ma'naviyati va dunyoqarashi bilan ajralib turishi kerak. Ichki ishlar organlarida kadrlar salohiyatini oshirish, jumladan, zamonaviy fikrlaydigan, yangilikka intiluvchan va tashabbuskor xodimlarni yetishtirish muhim ahamiyat kasb etadi. Chunki Ichki ishlar organlari faoliyatining samaradorligi bevosita tizimda xizmat qilayotgan kadrlarning salohiyatiga bog'liq.
Ichki ishlar vazirligining barcha hududlardagi akademik litseylari hamda Nukus shahridagi Temurbeklar maktabida kelgusida yurt posboni bo'lishga ahd qilgan yangi avlod vakillari kamol topmoqda. Joriy yilda soha uchun professional kadrlarni tayyorlash tizimini takomillashtirish borasida bir qator ijobiy ishlar qilindi. Xususan, IIV Akademiyasi kunduzgi ta'lim shakli qabul kvotasi 900 kishiga oshirildi, keyingi o'quv yilidan 1100 nafarga yetadi.
O'z navbatida, xodimlarning ma'naviy dunyoqarashini rivojlantirish maqsadida “Vatanga va xalqqa sadoqat bilan xizmat qilish — oliy burchimiz!” degan g'oyani amaliyotga tatbiq etish bo'yicha kompleks chora-tadbirlar ham amalga oshirilmoqda.
Ichki ishlar organlarida o'tkazilayotgan “Ma'naviyat oyligi”, “Uch avlod uchrashuvlari”, “Faxriylar haftaligi” kabi tadbirlar, tarkibiy va hududiy ichki ishlar organlarida tashkil etilgan muzeylar, “Vatanparvarlik xonasi”, xotira burchaklari, avvalo, yosh xodimlarni vatanparvarlik ruhida tarbiyalash, soha faxriylarining kelgusi avlodlarga namuna bo'ladigan faoliyatini ommalashtirish, Vatanimiz mustaqilligi va el-yurtimiz osoyishtaligi yo'lida aziz jonlarini fido qilgan hamkasblarimiz xotirasini abadiylashtirishga, eng asosiysi, xodimlarda vatanparvarlik tuyg'ularini rivojlantirishga xizmat qilmoqda.
Bugun tizimda xizmat qilayotgan barcha xodimlarning bosh maqsadi — xalqimizning, Prezidentimizning bizga bildirgan yuksak ishonchini oqlashdan, faoliyatimiz orqali xalqimizning davlatdan rozi bo'lishiga erishishdan iborat.
Shunday ekan, ishonch bilan ayta olamizki, Yangi O'zbekistonda yangi ichki ishlar organlari tizimini shakllantirish jarayonida har birimiz xalq manfaatlari yo'lida fidoyilik va sadoqat bilan xizmat qilamiz.
Xurshidbek RO'ZIYEV,
Ichki ishlar vazirining
maslahatchisi,
podpolkovnik.