Bizning kuchimiz – birlikda!
Kundalik hayotda qo'ni-qo'shnilar bilan ahil-inoq, do'stona turmush kechirish har jihatdan katta ahamiyatga ega. Yon-atrofdagi hamsoyalar bilan janjallashib yashash qayoqda-yu, ko'rishganda yuzlarda yoqimli tabassum bilan diydorlashish qaerda?! Bu boradagi munosabat, o'rtadagi muhit faqat xonadon sohiblariga emas, butun oila a'zolari — bola-chaqalar kayfiyatiga ham ta'sir qiladi.
Qo'shni mamlakatlar haqida gap ketganda ilgari vaziyat chindan ham salbiy edi: chegaralarga minalar qo'yilgan, yondosh respublikaga borish yo'llari yopilgan edi. Quda-andalar, qarindosh-urug'lar to'y yoki ta'ziya marosimlariga bora olishmasdi.
2017 yilda ahvol butunlay o'zgardi. O'zbekiston Respublikasi Prezidenti BMTning yuksak minbarida baralla e'lon qildi: Markaziy Osiyoni tinchlik, yaqin qo'shnichilik va sheriklik makoniga aylantiramiz.
Bu davlatimiz rahbarining qat'iy qarori edi. O'tgan sakkiz yil ichida Markaziy Osiyo davlat rahbarlarining olti marta Maslahat uchrashuvlari o'tkazildi. Ushbu anjumanning yettinchisi 2025 yil 17 noyabrda Toshkentda bo'lib o'tdi.
Shu davrda nimalarga erishildi? Prezidentimiz tarixiy kunda shunday javob qildi: Hududiy masalalarda savol qolmadi, chegara punktlari darvozani lang ochdi. Suv-energetika sohasida o'zaro manfaatli munosabatlar yo'lga qo'yildi, transport aloqalari qayta tiklandi, mamlakatlarimiz o'rtasida faol savdo-investitsiya va gumanitar aloqalar uchun qulay sharoit yaratildi. Hozir Markaziy Osiyo — bu barqaror o'sish va farovonlik uchun oldimizda yangi imkoniyatlar ochayotgan jadal taraqqiyot va samarali hamkorlik makonidir.
Markaziy Osiyo mintaqasi jahon iqtisodiyotiga faol integratsiyalashmoqda: investitsiyaviy jozibadorlik oshmoqda, uchinchi bozorlarga eksport imkoniyatlari kengaymoqda, tranzit salohiyati o'smoqda. Mintaqaning o'zida 2024 yilda o'zaro savdo hajmi 10,7 mlrd AQSh dollariga yetdi. Jalb qilingan investitsiyalar umumiy hajmi 17 foizga ko'paydi.
O'zbekiston, Tojikiston, Qirg'iziston, Qozog'iston, Turkmaniston hududida xavfsizlik va barqarorlikni ta'minlash masalalari, terrorizm va ekstremizm tahdidlari, transchegaraviy jinoyatchilikka qarshi kurashish borasida tizimli chora-tadbirlar ko'rilmoqda.
Hamjihatlik va umumiy taraqqiyot sari intilishning kuchayishi Markaziy Osiyoning xalqaro munosabatlar sub'yekti sifatidagi maqomini mustahkamlash va global miqyosdagi rolini oshirishga xizmat qilmoqda.
Toshkentda o'tkazilgan yettinchi Maslahat uchrashuviga qaytaylik. O'sha kuni Markaziy Osiyo davlatlari safiga Ozarbayjon Prezidenti ham qo'shildi. Axir yaxshi niyatli insonlar, ularning timsolida mamlakatlar ko'paygani juda yaxshi, albatta.
Bu anjumanda bugun mintaqamizning Yangi Markaziy Osiyo sifatidagi tarixiy uyg'onish davri boshlanayotgani ta'kidlandi.
Ma'lumki, hozir zamon qaltis, ertaga nima bo'lishini aytib bo'lmaydi. Ana shunday sharoitda o'zaro hamjihatligimiz va bir-birimizni qo'llab-quvvatlashimiz muhim ahamiyat kasb etadi.
Biz uchun hozirning o'zida mintaqamizni bundan 20-30 yildan keyin qanday ko'rishni xohlashimiz bo'yicha aniq tushunchaga ega bo'lishimiz muhim. Anjumanda so'z olgan Ozarbayjon Prezidenti Ilhom Aliyev O'zbekiston Prezidentining amalga oshirayotgan ishlariga to'xtalib, uni uzoqni ko'ra olish qobiliyatiga ega siyosatchi sifatida e'tirof etdi. Ilhom Aliyev, avvalo, Markaziy Osiyo davlat rahbarlarining yettinchi Maslahat uchrashuvida ishtirok etish taklifi uchun Shavkat Mirziyoyevga chuqur minnatdorlik bildirdi. O'zbekiston tomoniga an'anaviy mehmondo'stligi uchun tashakkur aytdi. “Birodarim Shavkat Miromonovichning dono rahbarligi ostida O'zbekiston rivojlanish va bunyodkorlik yo'lidan ishonchli tarzda bormoqda”, dedi u. “Prezidentning kundalik g'amxo'rligi tufayli O'zbekiston dunyoning yetakchi sport davlatlari qatoridan joy olgan. Yaqinda bo'lib o'tgan yozgi Olimpiada o'yinlari buni yaqqol ko'rsatdi. Shavkat Miromonovich nafaqat dono davlat arbobi, balki O'zbekiston — Ozarbayjon munosabatlarini rivojlantirishga katta hissa qo'shgan insondir” deya ta'kidladi u.
Maslahat uchrashuvida Markaziy Osiyo davlatlari rahbarlari so'zga chiqishdi. Ular Prezidentimiz har jihatdan yetakchi ekanligini, taklif etayotgan tashabbuslari yuksak bahoga sazovorligini aytishdi. Mintaqada Oqsoqollar kengashi tuzish taklif etildi. Bu fikr xalq diplomatiyasi sohasidagi qadriyat va an'analarimizga ega jamoat arboblaridan iborat kengash tuzilishini nazarda tutardi. Yaqin istiqbolda Umumiy investitsiya makoni to'g'risidagi deklaratsiyani qabul qilish muhim deb hisoblandi.
Mazkur uchrashuvdan qanday xulosa chiqarish mumkin? Prezidentimiz xulosani shunday ifodaladi: “Alohida ta'kidlamoqchiman: bizning kuchimiz — birlikda, muvaffaqiyat sari yo'limiz — do'stlik va hamkorlikda. Faqat hamjihat bo'lib, o'zaro hurmat, birdamlik va strategik yondashuvlarga tayanib, ezgu maqsadlarimizga erishishimiz mumkin”.
Asrlar davomida O'rta Osiyo davlatlari o'rtasida yopilmagan, minalashtirilmagan chegaralar Shavkat Mirziyoyev prezidentligi davriga kelibgina ochilganida millionlab yurtdoshlarimizgina emas, millionlab qo'shnilarimiz ham sevingani chin haqiqatdir. Kuni kecha ana shu yo'lda O'zbek-Turkman xalqlari uchun yana bir ezgu amaliy harakat, quvonchli voqea ro'y berdi: Xorazm bilan chegaradosh hududda ikki mamlakat tadbirkorlari barpo etgan jahon bozori ochildi!
Qarang, shunday qat'iyat bilan boshqalarni ortidan ergashtirish Prezidentimizga xos. Buni oddiy xalqimiz yaxshi bilishi va haqli ravishda faxrlanishi kerak!
Shuhrat JABBOROV,
O'zbekistonda xizmat ko'rsatgan jurnalist.