Yozyovon Yangi O'zbekistonning obod go'shasiga aylanmoqda
Davlatimiz rahbari Shavkat Mirziyoyev shu yil 27-28 aprel kunlari Farg'ona viloyatiga qilgan safari davomida Qo'qon shahridagi Yangi O'zbekiston massividagi bunyodkorlik ishlari, Marg'ilon shahridagi Burhoniddin Marg'inoniy majmuasi, Quvasoy shahridagi sanoat korxonalari, Quva tumanidagi Karkidon suv ombori atrofidagi barpo qilingan dam olish maskanlari, qishloq xo'jaligida qo'shimcha qiymat hosil qilish bo'yicha loyihalar faoliyati bilan tanishdi. Ayniqsa, “Neftchi” jamoasi a'zolari, futbol akademiyasi tarbiyalanuvchilari bilan uchrashuvi tarixiy bo'ldi.
Prezidentimiz viloyat faollari bilan bo'lgan uchrashuvida Yozyovon tumaniga ham alohida e'tibor qaratib, tumanning sanoat, eksport va servis, qishloq xo'jaligida past o'rinlarda ekanligini ta'kidlab, bu yil tumanga tadbirkorlik infratuzilmasi uchun byudjetdan 30 milliard so'm berilayotgani, birinchi chorakda tumanda yana 5,5 milliard so'm qo'shimcha mablag' qolganini alohida ta'kidladi.
Shuni ta'kidlash joizki, Yozyovondagi o'zgarishlar va imkoniyatlar sun'iy intellekt yordamida o'rganilganda, vodiy markazida joylashgan, xomashyo resursi cheklangan mazkur tumanda asosiy e'tiborni logistikaga qaratish kerakligi ma'lum bo'ldi.
A-373 magistral yo'lining Yozyovondan o'tgan 35 kilometr qismidan kuniga 30 ming transport qatnaydi. Tumanda logistika markazlari va yirik omborlar ko'paysa, yo'l bo'yida mehmonxona, yoqilg'i shoxobchasi va ovqatlanish joylariga talab ikki karra oshadi.
Yig'ilishda so'zga chiqqan Yozyovon tumani hokimi Dilshodjon Djalilovga logistikani Yozyovonning “drayver”iga aylantirish orqali servis, sanoat va qishloq xo'jaligini ham rivojlantirish, tuman iqtisodiyotidagi aylanmani yana 1 trillion so'mga oshirish vazifasi topshirildi.
Prezident topshirig'i bo'yicha tumanda qator ishlar amalga oshirilmoqda. Jumladan, A-373 xalqaro yo'li bo'yida 24,7 gektar qishloq xo'jaligi yerlarining toifasi o'zgartirilib, ishlab chiqarish, servis xizmat ko'rsatish bo'yicha kichik sanoat zonasi tashkil etildi. Ayni paytda mazkur sanoat zonasiga xitoylik investorlarni jalb qilgan holda baliq va chorva yemi ishlab chiqaruvchi korxona, kabel, metallni qayta ishlash, elektrobus mashinalar zavodlari qurilishi boshlab yuborilgan.
Bu korxonalarning barchasi yil oxirigacha ishga tushiriladi va kamida mingta yangi ish o'rni yaratiladi. Bu yangi ish o'rinlari va boshqa resurslar hisobiga Yozyovon tumanini kambag'allikdan xoli hududga aylantirish rejalashtirilmoqda.
Prezidentimiz tomonidan Farg'ona, Yozyovon, Quva va O'zbekiston tumanlarida 7 ming 400 gektar paxta-g'alla maydonini qisqartirish taklifi qo'llab-quvvatlangani katta imkoniyatlar eshigini ochib beryapti.
Shundan bu yil Yozyovonda 1 ming 800 gektarda iste'mol va urug'lik uchun cho'l sharoitiga mos yuqori hosilli sholi plantatsiyalarini barpo etish muhimligi qayd etildi.
Yozyovonda sholichilik maktabini ishga tushirib, sinov tarzida 100 gektar ko'lning suv yuzasida kassetali usulda organik sholi yetishtirishni boshlash topshirildi.
Prezidentimizning bu topshiriqlari bo'yicha ham keng qamrovli ishlar boshlab yuborilgan.
Yozyovon tumanining tashkil topganiga 75 yil bo'lyapti. 70 yil tumanda ikki qavatdan yuqori uy qurilmagan. Mana, bugun yozyovonliklar shaharlardagidek 5-7 qavatli, zamonaviy uylarda yashashyapti.
Go'zal Farg'ona viloyatining ertasi yanada yorug', nurli bo'lajak. Shuningdek, Yozyovonga ham Prezidentimizning e'tibori tushdi. Zero, tumanga bugungiday e'tibor hech qachon bo'lmaganini ulug' yoshli nuroniylarimiz ham e'tirof etishmoqda. Kaminaning ko'p yillik (37 yil) jurnalistik faoliyatim ana shu tuman gazetasida o'tyapti. Bir paytlar “cho'l rayoni” deya atalgan Yozyovon bunyodkorlik, sanoatlashtirish bo'yicha shaharlardan qolmaydigan, ozod va obod, Yangi O'zbekiston qiyofasidagi tumanga aylanmoqda.
Bunday e'tibordan yozyovonliklarning ham quvonchi cheksiz. Axir Yurtboshimizning g'amxo'rligi, yuksak e'tibori tufayli Yozyovon Yangi O'zbekistonning eng ilg'or, eng obod go'shasiga aylanib bormoqda.
Azimjon XUDOYQULOV,
O'zbekiston Jurnalistlar
uyushmasi a'zosi.