O'zbekiston va Yevropa Ittifoqi munosabatlari Buyuk Britaniya OAV diqqat markazida
LONDON, 28 oktyabr. “Dunyo” AA. Britaniyaning “London Post” elektron nashrida “Toshkent–Bryussel: Yevropa bilan hamkorlikning yangi bosqichi” sarlavhali maqola e'lon qilindi, deb xabar berdi “Dunyo” AA muxbiri.
Ushbu maqolada ta'kidlanishicha, O'zbekistonning Yevropa hamjamiyatlari bilan aloqalari 1992 yil 15 aprelda O'zbekiston hukumati va Yevropa Ittifoqi komissiyasi o'rtasida o'zaro anglashuv memorandumi imzolanishi bilan boshlangan. Diplomatik munosabatlar 1994 yil 16 noyabrda o'rnatilgan, 1995 yilda esa Bryusselda O'zbekistonning elchixonasi ochilgan, u ham Yevropa Ittifoqidagi vakolatxona vazifasini bajaradi. 2011 yildan buyon Toshkentda Yevropa Ittifoqi delegatsiyasi faoliyat yuritib kelmoqda.
O'zbekiston Prezidenti Belgiya poytaxtida Yevropa Ittifoqi yetakchilari bilan muzokaralar o'tkazgani hamda unda ko'p qirrali munosabatlarni yanada rivojlantirish va kengaytirish masalalari ko'rib chiqilgani materialda alohida ta'kidlangan.
Bundan tashqari, Britaniya saytida Yevropa Ittifoqi bilan Kengaytirilgan sheriklik va hamkorlik to'g'risidagi bitimning imzolanishi O'zbekistonning Yevropa bilan o'zaro tushunish, ochiqlik va ishonchni mustahkamlashga qaratilgan izchil tashqi siyosatining mantiqiy davomi bo'lishi bildirilgan. Mazkur hujjat savdo va sarmoyadan tortib, fan, texnologiya, madaniyat va atrof-muhitni muhofaza qilishgacha bo'lgan keng ko'lamli sohalarni qamrab olishi ta'kidlangan.
Materialda o'tgan davr mobaynida Yevropa Kengashi Prezidenti O'zbekistonga uch marta – 2019, 2022 va 2025 yillarda, shuningdek, Yevropa Komissiyasi Prezidenti 2025 yilda tashrif buyurgani xalqaro hamkorlik aloqalarining tobora rivojlanib borayotganidan dalolat ekani qayd etilgan.
Manbada, shuningdek, O'zbekiston Prezidenti tashabbusi bilan 2025 yil 4 aprel kuni Samarqand shahrida “Markaziy Osiyo – Yevropa Ittifoqi”ning birinchi sammiti bo'lib o'tgani va unda Yevropa kengashi va Yevropa komissiyasi prezidentlari hamda Markaziy Osiyo davlat rahbarlari ishtirok etgani alohida urg'ulangan.
“London Post”da e'lon qilingan materialda iqtisodiy hamkorlik aloqalari haqida ham batafsil to'xtalib o'tilgan. Xususan, 2024 yilda O'zbekistonning Yevropa Ittifoqi bilan mahsulot ayirboshlash hajmi 6,4 milliard dollarni tashkil etib, 2025 yilning yanvaridan avgustigacha bu ko'rsatkich 4,5 milliard dollardan oshgani, Yevropa kompaniyalari bilan amalga oshirilgan loyihalar portfeli esa 30 milliard yevroga yetgani alohida e'tirof etildi.
Maqola yakunida: “O'zbekiston Prezidenti Shavkat Mirziyoyevning Bryusselga rasmiy tashrifi va Yevropa Ittifoqi bilan yangi, keng qamrovli aloqalarning o'rnatilishi o'zbek diplomatiyasi tarixida muhim voqea ekanligi aytildi. Bu qadam O'zbekistonning Yevropadagi mavqeini mustahkamlabgina qolmay, hamkorlikni yanada rivojlantirish, savdo-sotiqni kengaytirish, sarmoyalarni jalb etish, texnologiyalar, innovatsiyalar va g'oyalar almashish uchun kuchli turtki bo'lib xizmat qiladi”, – deyiladi.