Xizmat qilgin shu xalq uchun!..

“Hurriyat” gazetasi ijodkorlari Sirdaryo viloyati Ichki ishlar boshqarmasi shaxsiy tarkibi bilan uchrashuv o'tkazdi

Ikki nafar kapitan harbiy unvoniga ega zobit ayvon oldidagi maydonda saf tortib turgan ichki ishlar xodimlari davrasiga kelib qo'shildi. Shu daqiqadan boshlab suhbat mavzusi o'z-o'zidan hududda tinchlik-osoyishtalik va fuqarolar xavfsizligini ta'minlash mavzusiga ko'chdi. Negadir ularning suhbatlari doimo fuqarolar huquqlari, erkinliklari va qonuniy manfaatlarini ishonchli himoya qilishga borib taqalaveradi.

Xullas kalom, kim nima haqida gap ochmasin: musibatli yoki shodlantiradigan voqealar to'g'risidami — barcha gap xizmat vazifasini qay yo'sinda uddalashdan boshlanib, shu mavzu asnosida poyoniga yetadi.

Darhaqiqat, kimnidir o'z xizmat vazifasini ado etayotganda ko'rsatgan jasorati, mardligi, xizmatdagi yelib-yugurishlar, jasurlik, g'am, quvonch, orzu-armonlar haqida og'izlaridan bol tomib gapiradilar. Har doim ham elimiz, yurtimiz tinch-osoyishta bo'lsin deb yaxshi umidlar bildiradilar. Negaki, hayotga, ado etayotgan vazifasiga bo'lgan ishonch, mehru muhabbatlari bora-bora qat'iy va mustahkam umidlarga aylanadi. Lekin ular hadeganda qalblarini to'ldirgan faxr-iftixor hislarini sezdirmaslikka harakat qiladilar.

Darhaqiqat, Sirdaryo viloyati Ichki ishlar bosh boshqarmasi va uning joylarda faoliyat yuritayotgan xodimlari el-ulusni xavotir bulutlari qoplamasligi uchun tunni tongga, tongni tunga ulab, chin ko'ngildan xizmat qilmoqdalar. Ta'bir joiz bo'lsa, ichki ishlar xodimlari salobatli va mahobatli tog'lardek mustahkam bo'lib turibdilar. “Yigit bo'lsang arslondek tug'ilgan, Xizmat qilgin hamisha shu xalq uchun” degan o'tli satrlarni qoraqalpoq shoiri Berdaq Qarg'aboy o'g'li shunday o'tyurak yigitlarga bag'ishlab yozib ketgandek go'yo. Sal avvalroq majoziy ma'noda ichki ishlar xodimlarini mustahkam qal'a dedikmi, demak, haqiqatan ham bu so'zda zig'ircha bo'lsa-da, mubolag'a yo'q.

Mard va jasur yigit, qizlar ayni damda ichki ishlar idoralarida xizmat qilishni o'zlari uchun sharaf deb bilmoqdalar. Shuning uchun ularning safi borgan sari salohiyatli yoshlar hisobiga to'ldirib borilmoqda. Negaki, tinchlik-osoyishtalik, xotirjamlik hukm surgan joyda ezgu ishlar hamisha bardavomdir. Odamlar bu hayotiy haqiqatni istiqlol yillarida Prezidentimiz Shavkat Mirziyoyev rahbarligida barcha jabhada amalga oshirilayotgan keng ko'lamli islohotlar, jumladan, hamjihatlik, bag'rikenglik, olijanoblik va mehr-oqibat kabi insoniy tuyg'ular har qachongidan yuksak cho'qqilarga ko'tarilib, aholi turmush farovonligini oshirish yo'lidagi beqiyos sa'y-harakatlar misolida yanada teranroq anglab yetmoqda. O'zini Vatanni himoya qilishga va ona yurt osoyishtaligiga bag'ishlash, mardlik va jasorat ko'rsatish chinakam insonlarga xos fazilatdir. Shu o'rinda yurt tinchligi-yu el osoyishtaligini ta'minlashdek sharafli burchni bajarayotganlar har qancha ehtiromga, e'zozu olqishga munosibdir.

Ma'lumki, yurtimizda inson qadri, uning huquq va erkinliklariga eng oliy qadriyat sifatida qaraladi. Shu ma'noda bugun ichki ishlar tizimida faoliyat samaradorligini oshirish, jamoat tartibini saqlash, fuqarolar huquqlari, erkinliklari va qonuniy manfaatlarini ishonchli himoya qilishni ta'minlashda xodimlarning mas'uliyatini kuchaytirish borasidagi chora-tadbirlar o'zining ijobiy natijalarini ko'rsatmoqda. Ahamiyatlisi, so'nggi to'qqiz yil mobaynida davlat rahbarining bevosita rahnamoligida ichki ishlar organlari xalq manfaatlariga xizmat qiluvchi xalqchil tizimga aylantirildi. Hozirgi kunda shaxsiy tarkibning asosiy qismi bevosita hududlarda, mahallalarning bevosita o'zida xizmat o'tayotganligining o'ziyoq tizimning oddiy odamlarga yaqinlashayotganini ko'rsatadi.

Shamol daraxtni yulqilaganda, o'tgan fasllar daraxtning lop etib yodiga tushar ekan. Ba'zida ana shu xotira shamoli bizni ham silkitadi.

Oddiy odamlarni mensimay, ularga qo'pol, ters munosabatda bo'lish, xizmat vakolatidan noqonuniy foydalanish, zarur yumush bilan ko'chaga chiqqan, ishga oshiqayotganlarni, he yo'q, be yo'q, avtobusga tiqib, zug'um, bosim o'tkazib, ularni ovora-yu sarson etish holatlarini yaxshi eslaymiz. U kunlarni eslamay bo'ladimi? To'g'ri, bunda hozirgi xodimlarning, agar ayrimlarning bo'lmasa, aybi yo'q. Nega deganda, bugungi xodimlar avvalgilaridan tubdan farq qiladi. Sababi ularning intellektual va bilim darajasi yuqori, ma'naviy-axloqiy sifatlari balanddir.

Yodda tutishimiz lozimki, biz tarixda ko'p ming yilliklarga borib taqaladigan, farzandlari dunyo tamaddunini yaratgan yurt vakillarimiz. Shunday ekan, jahonda bizning o'z o'rnimiz, o'z ovozimiz bor. Yurtboshimiz ta'biri bilan aytganda, “Biz hech kimdan kam emasmiz va hech qachon kam bo'lmaymiz”.

Joriy yilning oktyabr oyida “Hurriyat” gazetasi Ichki ishlar vazirligi bilan o'zaro ijodiy hamkorlik memorandumini imzolagan edi. Shunga ko'ra, gazeta va uning internet sahifalarida  bundan buyon Ichki ishlar vazirligi va uning barcha tizimlari faoliyati, yutuq va muammolari yanada kengroq yoritib boriladi. Gazeta ijodkorlarining Sirdaryo viloyati Ichki ishlar bosh boshqarmasida o'tkazgan uchrashuvi ham shu hamkorlik mevasidir.

Bilasiz, ilm, adabiyot va san'at, ommaviy axborot xodimlari bilan jonli muloqotlar jabhada faoliyat olib borayotgan xodimlar qalbida unutilmas taassurotlar qoldirib, ya'ni yangidan-yangi zafarlarga ilhomlantiradi. Nazarimda, O'zbekiston Respublikasi Prezidentining farmoni bilan 1996 yilda asos solingan, mamlakatda ilk bor erkin minbar sifatida mustaqil nashr maqomida faoliyatini boshlagan “Hurriyat” gazetasi ijodkorlari bilan Sirdaryo viloyati Ichki ishlar bosh boshqarmasi shaxsiy tarkibining uchrashuvi, muloqoti jurnalist ahlini ichki ishlar idorasidagilar bilan hamfikr, hamqadam bo'lib ijod qilishga chorlaydi. Qolaversa, shunday xayrli, dilkash tadbirlarning o'tkazilishi ma'naviyatimiz yuksalishiga xizmat qiladi. Jaloliddin Rumiy “Haqning asari qudratlarini basirat ko'zi ila, nazari ibrati ila tomosha qilinsa, ko'p hikmatlar ko'rurlar”, deb bejizga aytmagan ekan, degan fikr ko'nglimizni xuddi chaqmoqdek yoritdi. Osoyishtalik posbonlarining ko'zidagi tabassum, mamnuniyat ifodasi uchrashuv davomida yaqqol sezilib turdi.

Ayonki, bugungi kunda jahon miqyosida beshafqat raqobat, qarama-qarshilik va ziddiyatlar, axborot xurujlari tobora kuchayib borayotgan hozirgi murakkab davrda “Hurriyat” gazetasi ijodkorlari hayotga chuqurroq kirib borib, jamiyatimizdagi ijtimoiy-siyosiy jarayonlarning tub mohiyati va ahamiyatini to'laqonli, ro'yirost ochib berishga, taraqqiyotimiz yo'lida to'siq bo'lib turgan muammolarni dadil ko'tarib chiqishga, ayni vaqtda joylarda, eng quyi bo'g'inda xalqning quvonch va tashvishlariga malham bo'lishga harakat qilmoqdalar.

Shu asnoda ro'znoma bugungi kunda ijtimoiy-iqtisodiy, ma'naviy-ma'rifiy, ekologiya, atrof-muhit, tabiat mavzulari bilan bir qatorda, siyosat, huquq-tartibot idoralari faoliyatini ham keng miqyosda yoritib kelyapti.

…Ona Vatan, ona zamin, ona qishloq… Biz uchun muqaddas hisoblangan barcha go'shalar onaga qiyoslanadi, onaga mengzaladi. Ona mehridek jonbaxsh tuyg'ularning yagona nomi mavjud:  mo''tabar, jondek aziz. Darhaqiqat, kindik qoning to'kilgan zamin mehri, har nigohidan o'zgacha, senga faqat sog'inch ulashadigan yaqinlar tafti… Bunday damlarda hayratdan nafas olasan, beg'uborlikdan lazzatlanasan. Nazarimda, bu noyob tuyg'udan ichki ishlar idoralarida o'z xizmat burchini o'tayotgan xodimlar ham benasib emasday.

Bitiklar yakunida, avvalo, ichki ishlar xodimlarini Vatan oldidagi muqaddas qasamyodlariga sodiq qolib, yurtimiz tinchligi va xalqimiz farovonligi yo'lida o'z zimmalaridagi g'oyat muhim vazifalarni yuksak mas'uliyat bilan ado etishlariga tilakdoshmiz. Zero, iste'dodli shoira Xosiyat Bobomurodova Vatanimizni madh etganidek:

Vatan deb Vatandan ketganlar aytsin,

Sog'inch yoqasidan tutganlar aytsin,

Pushaymonlik zahrin yutganlar aytsin,

Vatan yagonadir, Vatan bittadir.

Mening Temur bobom, Sohibqironim,

Asrlarni yengib yelgan bo'ronim,

Qonidan qo'shilgan bir qatra qonim,

Vatan yagonadir, Vatan bittadir.

Ulug'bek JUMAYEV,

O'zbekiston Yozuvchilar

uyushmasi a'zosi.