100 ёшли онахон
Янги йилнинг илк кунлари қувончли хабар билан бошланди: Оҳангарон туманидаги “Қорахитой” маҳалла фуқаролар йиғинида жойлашган “Висол” тўйхонасида уч авлод учрашуви бўлиб ўтди.
Унда Оҳангарондаги сут-товар фермасида узоқ йиллар соғувчи бўлиб ишлаган Хилва ая Жаҳоналиеванинг муборак юз ёшлик юбилейи нишонланди.
Самарали меҳнатлари эвазига Хилва Жаҳоналиева бир қанча орден ва медаллар билан тақдирланган.
Учрашувда Ўзбекистон Қаҳрамони, Олий Мажлис Сенати аъзоси, Республика “Нуроний” жамғармаси бошқаруви раиси Содиқжон Турдиев, “Нуроний” жамғармаси Тошкент вилояти кенгаши раиси Абдусамад Носиров, таниқли тадбиркор Шунқор Умирзоқов ва бошқа ҳамюртларимиз сўзга чиқиб, Хилва Жаҳоналиевани қутлуғ ёши билан муборакбод этди.
Хушовоз хонанда Хуршид Расулов ва бошқа санъаткорлар дилрабо қўшиқлари билан онахонни қутладилар.
Қувончли кунда юз ёшида ҳам тетик, гап-сўзи залворли Хилва Жаҳоналиева ташриф буюрганларга ўз миннатдорчилигини изҳор этди.
Гапнинг рости, инсоннинг бир асрлик юбилейини ҳаётлик даврида нишонлаш катта шарафдир.
Зеро, Ўзбекистон халқ шоири Мақсуд Шайхзода ёзганидек:
Дўстлар, яхшиларни авайлаб асранг,
Салом деган сўзнинг салмоғин оқланг.
Ўлганда юз соат йиғлаб тургандан,
Уни тиригида бир соат йўқланг!
Озод ХУШНАЗАРЗОДА.