Turfa gullarda jannatiy ifor
Namangan shahrida Xalqaro gullar festivaliga qizg'in hozirlik ko'rilmoqda
Yarim asrdan ziyod vaqt mobaynida Namangan shahrida “Gullar bayrami” nomi bilan o'tkazib kelingan o'ziga xos ma'naviy-ma'rifiy tadbirning Xalqaro gullar festivali maqomini olganiga ko'p vaqt bo'lgani yo'q. Prezidentimizning tavsiyalariga muvofiq 2017 yildan gulchilikka e'tibor yangicha tus olgan.
Shu o'rinda tarixga qaytamiz. 1961 yil 19-20 avgust kunlari Namangan viloyatida ilk bor Gul bayrami – “Gul ko'rgazmasi” o'tkazilgani haqida gazetalarda e'lonlar chop etilgan, bog' radiouzelida maxsus eshittirishlar efirga uzatilgan.
Bayram tarixida “Gaz-21” avtomashinalarida gullar karvoni uyushtirilgan. Ammo haqiqiy ma'nodagi Gullar festivali 2018 yildan buyon o'tkazib kelinmoqda. Chinakam gul karvonlari ham so'nggi yetti yilda namoyish etildi. Unda yurtimizda ishlab chiqarilgan avtomashinalar, qishloq xo'jaligi va xizmat ko'rsatish texnikalari anvoyi gullar bilan bezatilayotgani ayni muddao bo'lmoqda.
Bugun Namangan Xalqaro 65-gullar festivaliga hozirlik ko'ryapti. Qayoqqa qaramang, tadbirni yuksak saviyada o'tkazish bo'yicha viloyat hokimligi belgilagan reja-tadbirlarga muvofiq ko'cha va yo'l bo'ylariga gulu manzarali daraxt ko'chatlari o'tqazish, obodonlashtirish, ko'kalamzorlashtirish ishlari bilan shug'ullanayotgan gulchilaru ularga madad bo'layotgan turli kasb egalarini jo'shqin ish ustida ko'rasiz.
Yangi Namangan tumanida marosimga tadorik yuksak maromda davom etmoqda. Shaharcha kun sayin go'zal ko'rinish kasb etyapti. Aylanma chorrahalar, yo'l yoqalari, tashkilot va korxonalar hududlaridagi ko'zni quvontiruvchi rango-rang gullar har qanday kishining e'tiborini tortadi. Ayniqsa, viloyat markazidagi Islom Karimov nomli ko'chada bir-biridan betakror gulzorlar tashkil etilayotgani quvonarli. Anjuman munosabati bilan tuman markazida 1,5 million tupdan ortiq mavsumiy gul ko'chatlari o'tqazish rejalashtirilgan.
Gul ekishda issiqqa chidamli, uzoq vaqt ochilib turuvchi nav va ko'chatlar tanlash, har bir maskan oldida sharoitdan kelib chiqib, o'ziga xos dizayn yaratish asosiy e'tiborda.
Mazkur markaziy ko'chaning Yangi Namangan tumanidan o'tgan qismining ikki chetida asosan viloyat tashkilotlari joylashgan. Xususan, moliya va iqtisodiyot, bojxona, maktabgacha va maktab ta'limi, sog'liqni saqlash boshqarmalari, “Agrobank”, “Biznesni rivojlantirish banki” va boshqa muassasalar atrofida shu kunlarda ish qizg'in. Har bir tashkilot o'z hududida gulzorlar barpo etish ishlarini olib bormoqda.
Namangan (O'zbekiston) – Koshalin (Polsha) hamkorligi yo'lga qo'yilmoqda. Koshalin shahri hokimi Tomash Soberay hamda uning o'rinbosari Beata Goreska ishchi tashrif bilan gullar shahriga keldi. Delegatsiyani Namangan viloyati hokimi Shavkatjon Abdurazzoqov qabul qildi. Samimiy va do'stona ruhda o'tgan muloqotda ikki hudud imkoniyatlari haqida ma'lumotlar almashildi.
Mehmonlar Namanganda an'anaviy tarzda o'tkazib kelinayotgan xalqaro “Gullar festivali” haqidagi videorolikdan katta taassurot olishdi. Yubiley festivalga Polshadan ham ko'plab sayyohlar kelishi ta'kidlandi.
Binobarin, “Gullar festivali”ga tashrif buyuruvchi mehmonlar har galgidan ikki hissa ko'proq bo'lishi kutilmoqda. Ayniqsa, xorijdan keluvchilar, eng avvalo, aeroportdan chiqish bilanoq, shu atrofdagi holatga qarab, festivalga, qolaversa, viloyatga baho beradilar. Namangan xalqaro aeroportida olib borilayotgan tadbirlar tahsinga loyiqligi bejiz emas. Bu yerda 140 million AQSh dollari miqdordagi investitsiya hisobiga yangi uch qavatli terminal binosi bunyod etilmoqda. U ishga tushgach, yo'lovchi tashish quvvati 2,5 barobar oshadi. Qulay sharoitlarga ega chegara nazorati, viza bo'limlari, biznes zali, savdo va ovqatlanish shoxobchalari va boshqa qo'shimcha qulayliklar yaratiladi.
Namangan shahridagi “Yangi O'zbekiston bog'i”da shu kunlarda o'tqazilgan noyob daraxt ko'chatlarining parvarishi, hududni xalqaro tadbirga tayyorlash jarayoni avj pallasiga chiqqan. Festivalning ommaviy tadbirlari o'tkaziladigan amfiteatrni tartibga keltirish, atrofiga anvoyi va noyob gullarning ko'chatlarini o'tqazish, yangi nihollarni oziqlantirish, mineral o'g'itlar bilan rivojini tezlatish amaliy choralari ko'rilmoqda.
Yangi Namangan shaharchasida qurilish-montaj jarayonlari qizg'in tus olgan. Xalqaro tadbirlar, biznes-forumlar va ko'rgazmalar o'tkazish uchun mo'ljallangan “Ko'rgazmalar markazi” – “CONGRESS HALL” atrofini obodonlashtirish, festivalga mos tarzda rang-barang gullar va kompozitsiyalar bilan bezatish ishlariga zo'r berilyapti.
Shahar qiyofasini yanada chiroyli va zamonaviy ko'rinishga keltirish, aholi hamda tashrif buyuruvchi mehmonlar uchun qulay va xavfsiz muhit yaratish masalalari ustuvor yo'nalish sifatida belgilangan. Temir yo'l vokzali atrofidagi aylanma harakat markazi festivalning ramziy ma'nosini ko'rsatuvchi asosiy ob'yektdir. Shu bois yaratilayotgan dizayn va kompozitsiyalarga alohida e'tibor qaratilmoqda. Umumiy ko'rinishda milliylik yorqin aks etishi, gullarni naqsh usulida o'tqazish, kompozitsiyalar barpo qilishda Namangan brendlaridan foydalanilyapti.
Festivalning bosh ob'yekti – Zahiriddin Muhammad Bobur nomidagi madaniyat va istirohat bog'i hududida gul kompozitsiyalari, landshaft dizayni yechimlari, tematik bezaklar tashkil etilishi rejalashtirilgan. Har bir mavzuga innovatsion yondashish, rang-barang gul kompozitsiyalarini yaratish, zamonaviy landshaft elementlarini joriy etish hamda tashrif buyuruvchilar uchun qulay va estetik muhit yaratish masalalariga alohida urg'u berilmoqda. Fotohududlar, sayr hududlari va dam olish maskanlarini yanada kengaytirish ustida ish olib borilmoqda. “Uch favvora” xiyoboni ham maftunkor qiyofa kasb etyapti.
Bu yil Namangan “Eng ko'p gul ekilgan festival” maqomi bo'yicha Ginnesning Rekordlar kitobiga kirish uchun astoydil harakat qilmoqda. Barcha sa'y-harakatlar ana shu maqsadni ro'yobga chiqarishda mustahkam zamin bo'ladi.
Namanganning tashrif qog'oziga aylangan Xalqaro gullar festivali doirasida yana bir tarixiy voqea. 20 aprel kuni Namangan shahar hokimligi ma'muriy binosi oldida Ginnesning Rekordlar kitobi (“Guinness World Records”)ga kirish uchun gul ekish marosimiga rasmiy start berildi. 20 mayga qadar 50 million donadan ziyod anvoyi gul ko'chatlari ekish rejalashtirilgan. Unga qadar Buyuk Britaniyaning London va Birlashgan Arab Amirliklarining Dubay shahridagi Bosh ofisi bilan uzviy hamkorlikdagi faoliyat onlayn tarzda davom ettiriladi. Yakunda Bosh ofis vakillari anjumanga tashrif buyurib, maxsus sertifikatni tantanali ravishda topshiradilar.
Bu – nafaqat Namangan, balki Yangi O'zbekiston uchun katta yutuq. Gul shaydolariga esa yubiley tuhfasidir.
Bu yil 24 maydan 12 iyulgacha oltmish beshinchi marta o'tkaziladigan nafosat anjumani gul shaydolarini har qachongidan-da xushnud etishi tabiiy. Gullar bayramiga tashrif buyuruvchi mahalliy hamda xorijiy mehmonlar safi yanada kengayishi aniq. Ertaknamo dekoratsiyalar, rang-barang gullar, bir-birini takrorlamas kompozitsiyalar mehmonlarga unutilmas onlarni tuhfa etishi tayin. Bu yerdan o'rin olgan har bir landshaft ramziy ma'noga ega. Har bir amalga oshirilayotgan loyiha festivalni yuqori saviyada tashkil etish, Namangan shahrining sayyohlik salohiyatini oshirish va uning xalqaro nufuzini yanada mustahkamlashga xizmat qilishi tabiiydir.
Gulchevar bahor Namanganni chiroyga burkaydi. Xalqaro festival sizga yorqin gullar, ajoyib tadbirlar va unutilmas taassurotlar olamini taqdim etadi! Gullarning sehri va bahor nafasi sizni kutmoqda! Festival quvonchini o'tkazib yubormang, azizlar!
Qosimjon AKBAROV,
O'zbekiston Jurnalistlar uyushmasi a'zosi,
“Shuhrat” medali sohibi.