Har bir jurnalist e'tiborda
Mamlakatimizda jamiyatning ko'zgusi sanalgan jurnalistika sohasini tubdan takomillashtirishga, soha xodimlarini har tomonlama qo'llab-quvvatlashga katta e'tibor qaratilmoqda. Bu esa Yangi O'zbekistonning yangilanayotgan ommaviy axborot vositalarida faoliyat yuritayotgan hamkasblarimizdan zamonga hamohang ravishda uyg'oq qalb, teran tafakkur bilan ishlashini taqozo etmoqda.
O'zbekiston Jurnalistlar uyushmasi Surxondaryo viloyati bo'limi tomonidan o'tgan 2021-2025 yillar davomida uyushma a'zolari va jurnalistlarni qo'llab-quvvatlash borasida samarali ishlar amalga oshirildi. Bugungi kunda viloyatimizdagi mavjud 34 ta gazeta-jurnal, 3 ta televidenie va radio hamda 4 ta internet sayti faoliyat yuritmoqda. Oliy Majlis huzuridagi nodavlat-notijorat tashkilotlarini va fuqarolik jamiyatining boshqa institutlarini qo'llab-quvvatlash jamoat fondi (hozirgi Oliy Majlis huzuridagi Fuqarolik jamiyati institutlarini qo'llab-quvvatlash jamoat fondi) tomonidan e'lon qilingan respublika va uning hududiy grant tanlovlarida o'tgan 5 yilda “Xalq yo'li”, “Tibbiyot va hayot”, “Janub quyoshi”, “Surxon ovozi”, “Davr mezoni”, “Oltin voha” kabi gazetalar, “Muallim” jurnali, “Diyor-24uz” internet sayti taqdim etgan ijtimoiy loyihalari asosida 30 mln so'mdan 60 mln so'mgacha bo'lgan miqdordagi grant mablag'larini yutib, o'z oldiga qo'ygan targ'ibot-tashviqot vazifalarini muvaffaqiyatli uddalashdi.
O'zbekiston Jurnalistlar uyushmasi viloyat bo'limi ham o'tgan sarhisob davrida “OAVlarda millatlararo bag'rikenglik va do'stlikni, tinchlik va barqarorlikni keng targ'ib etish” mavzusidagi “Milliy va umuminsoniy qadriyatlarni yoshlar ongiga singdirishga, etnik madaniy an'analarni asrab-avaylashga, xalq ijodiyotini qo'llab-quvvatlashga ko'maklashish” yo'nalishida “Surxondaryo — qadriyatlar beshigi” loyihasi bilan g'olib bo'ldi. Loyiha doirasida “Surxondaryo — qadriyatlar beshigi” nomli kitob chop etilib, viloyatimizdagi axborot-resurs markazlariga tarqatildi. Bundan tashqari, Termiz shahridagi “Murch bobo” jome masjidi mas'ullari bilan birgalikda xayriya tadbiri tashkil qilinib, loyiha doirasida 10 nafar imkoniyati cheklangan va kam ta'minlangan oila vakillariga yordam mablag'lari berildi. Shuningdek, grant loyihasi asosida viloyat OAVlarida faoliyat yuritayotgan fotojurnalistlar va havaskor suratkashlar o'rtasida tashkil etilgan tanlov g'oliblariga maxsus diplom hamda esdalik sovg'alari topshirildi.
Shuningdek, Uyushmaning hududiy bo'limi Jamoat fondi tomonidan e'lon qilingan grant tanlovida “Mediamakon va shaxs” nomli loyihasi bilan g'olib bo'ldi. Grant asosida Uyushma tomonidan jurnalistlar uchun “Mediamakon va shaxs” tanlovi o'tkazilib, ushbu nomdagi qo'llanma chop etildi. Viloyatda jurnalistika janrlari va internet jurnalistikasi, mediasavodxonlikni o'zida umumlashtirgan ushbu qo'llanma viloyatimizdagi bir necha maktablardagi kutubxonalarga tarqatildi.
Uyushma tomonidan jurnalistlar o'rtasida o'zaro tajriba almashish va hamkorlikni yo'lga qo'yish maqsadida viloyatimiz jurnalistlari uchun Qashqadaryo viloyatiga ijodiy safar uyushtirildi. O'z navbatida bir guruh qashqadaryolik hamkasblarimiz Surxondaryoga tashrif buyurdi.
Uyushma qoshidagi Faxriylar kengashi a'zolari bilan birgalikda turli bayramlar munosabati bilan keksa va nuroniy hamkasblarimiz holidan izchil xabar olib turildi. Faxriylarimiz O'zbekistonda xizmat ko'rsatgan jurnalist Olimjon Usanov, Jumanazar Anorov, Abdulla Xolmirzayev, Nazip Sulaymonov, Mavjuda Nasrullayeva, To'ra Qobilov va Tursunmurod Qo'shoqovlar xonadonida bo'lishdi va diltortar suhbatlar o'tkazildi.
Keksa jurnalistlar va sohada faoliyat yuritayotgan xodimlarning yubiley sanalari o'tkazildi. Ustoz jurnalistlar Nazip Sulaymonov va Narzulla So'fiyevning 80, Norquvvat To'rayevning 70, Xurram Rayimovning 75, “Surxon tongi” gazetasi muxbiri Xolmuhammad Tog'aymurodovning 50 yosh yubileyi nishonlandi. “Denov ovozi” gazetasi tashkil etilganining 10 yillik yubileyi qizg'in o'tkazildi.
Publitsist va ijodkor-jurnalistlar kitoblari taqdimoti tashkil etildi.
Hukumatimiz tomonidan barcha soha vakillari qatori hamkasblarimizning kamtarona mehnatlari ham munosib baholanmoqda. Prezidentimiz Farmoniga binoan o'tgan besh yil mobaynida vohamizdan O'zbekiston Jurnalistlar uyushmasi a'zolari Chori Alimov va Dilfuza Jo'rayevalar “Do'stlik” ordeni, Xolmo'min Mamatrayimov va Usmonali Normatovlar “Shuhrat” medallari bilan taqdirlanishdi. O'tkir so'zi va qalami bilan nafaqat viloyatimizda, balki respublikamizda o'z o'rniga ega jurnalistlar Chori Alimov, Ilhom Rahmatov, Safar Omonqulovlar xalqaro “Oltin qalam” Milliy mukofoti, Abdumannon Saidmalikov, Erkin Mahmadaliyevlar “Yilning eng faol jurnalisti” tanlovi g'olibi va sovrindorlari bo'lishdi. Shuningdek, Surxondaryo teleradiokompaniyasi qoshidagi “Yangi asr” radiosi jamoasi ham “Oltin qalam” Milliy mukofoti g'olibi bo'lishdi. “Atirgul” tanlovida viloyatda faoliyat olib borayotgan jurnalist Feruza Rahmonqulova “Harbiy-vatanparvarlik mavzusi eng yaxshi yoritilgan materiallari uchun” nominatsiyasida g'olib deb topildi.
Shu o'rinda ta'kidlash kerakki, Uyushmaga kelib tushayotgan murojaatlarni ijobiy hal etish borasida ham samarali ishlar amalga oshirildi va oshirilmoqda. Birgina 2022 yilda Uyushmaning hududiy bo'limi tavsiyasi asosida T.Qobilov, I.Shomirov, S.Norqobilov, M.Jabborov, M.To'rayev kabi o'ndan ortiq matbuot va OAV vakillariga arzonlashtirilgan narxlarda, imtiyozli kredit asosida Termiz shahridagi “Guliston” mahallasida bunyod etilgan ko'p qavatli uylardan yangi xonadonlar berildi.
Uyushma a'zolari soni ham yildan-yilga ortib bormoqda. 2020 yilda uyushma a'zolari soni 69 nafarni tashkil etgan bo'lsa, hozirgi kunda a'zolarimiz soni 100 nafarga yaqinlashdi.
Ustoz jurnalistlarga munosib shogirdlar tayyorlash maqsadida Uyushma qoshida “Yosh jurnalistlar” to'garagi tashkil qilingan bo'lib, mazkur to'garakda yuzlab talabalar, uyushmagan yoshlar, jurnalistikaga qiziquvchi yoshlar bilim va tajribalarini oshirishdi. E'tiborlisi, ishtirokchilar orasidan hozirda ommaviy axborot vositalarida samarali faoliyat olib borayotgan ko'plab mutaxassis kadrlar yetishib chiqdi.
Yosh jurnalistlar va sohada faoliyat olib borayotgan ommaviy axborot vositalari xodimlari ham o'z bilim va tajribalarini yanada oshirish maqsadida chet davlatlarida malaka oshirib qaytishmoqda. Uyushmaning viloyat bo'limi mutaxassisi Mastura Hamroyeva Yevropaning Latviya davlatiga YuNESKOning Toshkentdagi vakolatxonasi va Baltika jurnalistik tadqiqot markazi loyihasi doirasida mediaturda ishtirok etdi. Unda Riga shahridagi “STOCKHOLM” biznes maktabida malaka oshirib, xorijiy internet nashrlari, televidenie va radiosi tajribalarini o'rganib qaytdi.
Quvonchlisi, uzoq yillik orzularimiz ijobati o'laroq 2024 yilda Termiz davlat universitetida jurnalistika yo'nalishi ochildi. Bu esa hududda OAV sohasida bilimli kadrlar ko'payishida o'ziga xos poydevor vazifasini o'taydi.
Asosiysi, sohamizni zamonga xos va mos tarzda rivojlantirish hamda tizim xodimlarini qo'llab-quvvatlashni o'z oldimizga ustuvor maqsad qilib belgilab olganmiz.
Chori JUMAQULOV,
O'zbekiston Jurnalistlar
uyushmasi
Surxondaryo
viloyati bo'limi raisi.