Baliqchining ertasi bugundan boshlanadi

Baliqchi tumanidagi islohotlar haqida yozish fikri Prezidentimiz Shavkat Mirziyoyevning “Qishloq xo'jaligi xodimlari kuni munosabati bilan soha rivojiga munosib hissa qo'shgan yurtdoshlarimizdan bir guruhini mukofotlash to'g'risida”gi Farmoni e'lon qilinganida tug'ilgan edi. Mamlakat qishloq xo'jaligi tizimidagi ko'p yillik fidokorona mehnati, soha rivojini yangi bosqichga ko'tarish, intensiv agrotexnik usullarni qo'llash orqali yuqori hosildorlikka erishish, el-yurt farovonligini yuksaltirishga qo'shgan munosib hissasi, ilg'or innovatsion texnologiyalar va zamonaviy ilm-fan yutuqlarini amaliyotga keng joriy etish, yer va suv resurslaridan oqilona foydalanish, mahsulotlarni sifatli qayta ishlash, eksport salohiyatini oshirish yo'lidagi samarali faoliyati hamda ijtimoiy hayotdagi faol ishtiroki uchun “Do'stlik” ordeni bilan mukofotlanganlar orasida Baliqchi tumani xokimi Jasurbek Odilovich Abduraimov ham bor edi. Bu nom tanish ko'rindi. Darrov Jasurbek Abduraimov mamlakatimiz qishloq xo'jaligi rivojida katta xizmatlar qilib o'tgan qadrdonimiz, rahmatli Odiljon aka Abduraimovning farzandi bo'lsa kerak, degan o'y xayolimdan o'tdi. Ko'ngilga kelgan yaxshi gumonimiz rost bo'lib chiqdi. Yaqinda Baliqchida bo'lganimizda tuman rahbari bilan ko'rishdik.

U bilan tumandagi “Sokin savdo servis” mas'uliyati cheklangan jamiyati parrandachilik korxonasi tomonidan bunyod etilayotgan parranda mahsulotlarini qayta ishlash va qadoqlash kompleksi hududida uchrashdik.

Hokim dadasi, rahmatli Odiljon aka Abduraimovni qishloq xo'jaligi fidoyisi sifatida yaxshi bilishim, uning faoliyati haqida maqolalar yozganligimni eshitib, xursand bo'ldi.

— Qush uyasida ko'rganini qilar ekan, — dedi u. — Qishloq xo'jaligi sohasiga mehr dadamizdan bizga meros qolgan. Agrar soha sir-asrorlarini ham undan o'rganganman.

O'tgan insonlarning yaxshi xislatlarini xotirlash ham tiriklarga mukofot berish bilan baravar, deb hisoblayman. Nazarimda, Odiljon aka haqidagi xotiralarimni o'g'liga aytganlarim ham bir savob ishdek tuyuldi…

— Bu hududda katta qurilishlar ketayotganga o'xshaydi, — deya uni suhbatga chorladim.

— Ha, ushbu kompleks qurilishiga uch million dollar sarflanadi, — dedi Jasurbek Abduraimov. — Loyihaning dastlabki bosqichi ishga tushgach 200 ta yangi ish o'rni yaratiladi.

Tumanda zamonaviy to'qimachilik korxonalari soni yil sayin ortib bormoqda. Masalan, Sarnovul mahallasida “Tetratex” mas'uliyati cheklangan jamiyati tomonidan to'qimachilik korxonasi barpo etilib, unga ip yigiruv dastgohlari o'rnatilmoqda. Loyihaning birinchi bosqichi ishga tushirilgach, bir yarim mingta ish o'rni yaratiladi. Natijada korxonada mahalliy xomashyo chuqur qayta ishlanib, yuqori qo'shimcha qiymatga ega mahsulotlar ishlab chiqarish yo'lga qo'yiladi. Loyiha to'liq quvvat bilan ishga tushirilgach, 6 mingga yaqin yangi ish o'rni yaratiladi.

“Sarnovul” mahalla fuqarolar yig'ini hududi sanoat zonasiga aylanayotir. Ushbu hududda “Chinobod real biznes” mas'uliyati cheklangan jamiyatida tuxum yo'nalishidagi parranda boqish majmuasida ayni paytda 53 nafar ishchi mehnat qilayotir. Korxona tomonidan yangi loyiha asosida intensiv usulda baliq yetishtirishga mo'ljallangan suv havzalari tashkil etilmoqda. Mazkur loyiha shu kunlarda ishga tushgach, 20 ta yangi ish o'rni yaratiladi.

Hokimning taklifi bilan Xalq deputatlari tuman kengashi raisi Shoyad Sattorov, hokimning matbuot kotibi Muzaffar Karimov hamrohligida Chinobod mahallasida faoliyat yuritayotgan “Xolid Sayfulloh tekstil” mas'uliyati cheklangan jamiyati faoliyati bilan ham tanishdik. Ushbu korxonada trikotaj mahsulotlari ishlab chiqarish yo'lga qo'yilgan bo'lib, ayni paytda 60 kishi mehnat qilmoqda. Korxona mas'ullari bergan ma'lumotga ko'ra, yana qo'shimcha 40 ta ishchi o'rni yaratiladi.

Chinoboddagi sport anjomlari ishlab chiqariladigan “LB Sport” mas'uliyati cheklangan jamiyatidamiz. U yerda oltmish nafar ishchi mehnat qilmoqda. Jamiyat tomonidan Sarnovul mahallasida sport buyumlari ishlab chiqarish zavodi qurilmoqda. Qurilish ishlariga oltmish nafar quruvchi jalb etilgan bo'lib, loyiha ishga tushirilishi natijasida qo'shimcha 200 ta ishchi o'rni yaratiladi. Korxona faoliyati bilan tanishar ekanman, bundan o'ttiz uch yil avvalgi voqealar yodimga tushdi.

Baliqchida azal-azaldan sport buyumlari ishlab chiqarishga ixtisoslashgan korxonalar ko'p. Chinoboddagi shunday korxonaga adabiyotni jonu dili deb biladigan rahmatli Ubaydullo aka Toshboyev rahbarlik qilardi. Uni Qo'chqorboy aka ham deb atardik. O'zbekiston xalq shoiri Muhammad Yusuf bilan bir necha marta Qo'chqorboy akaning taklifiga ko'ra Chinobodda bo'lganmiz. U paytlari hamma narsa pul bilan o'lchanmaydigan ajoyib davrlar edi. Taniqli xonandalar Oxunjon Madaliyev, G'iyos Boytoyevlar Muhammad Yusufning taklifi bilan bir necha bor katta o'yingohda beminnat konsert qo'yib berishgandi. Shoir ham qayta-qayta olqishlar qurshovida she'rlar o'qigandi. Hamrohlarimga shu haqdagi xotiralarimni gapirib berdim. Ular ham Baliqchi farzandi Qo'chqorboy akaning insoniylik fazilatlarini bir-bir eslashdi…

Olingan ma'lumotlarga ko'ra, tumandagi Sirmoq mahallasida “Milliy tex” mas'uliyati cheklangan jamiyati tomonidan trikotaj mahsulotlari ishlab chiqarishga mo'ljallangan korxona qurilishi shu kunlarda yakunlanar ekan. Loyiha qiymati uch million dollarlik ushbu korxona to'liq ishga tushgach, 150 ta ish o'rni yaratiladi.

Bunyod etilayotgan sanoat korxonalarining miqyoslari hayratlantiradi. Tuman hokimining aytganlari yodimga tushdi. “2020 yilda tuman yalpi mahsulot ishlab chiqarishda sanoat ulushi 300 milliard so'mni tashkil etgan bo'lsa, 2025 yil yakuniga ko'ra bu ko'rsatkich 4 trillion so'mga yetdi”. Bu o'sish o'n ikki martadan ortiq deganidir. Ushbu raqamlar zamirida minglab ishchi o'rinlar, minglab taqdirlar yotibdi. Albatta, mahalliy aholini uzluksiz ish bilan ta'minlashda sanoat korxonalarining o'rni beqiyos.

Taqdim etilgan ma'lumotlarga qaraganda, Baliqchi tumanining qishloq xo'jaligi mahsulotlari yetishtirishda ham o'z o'rni va mavqei borligiga amin bo'ldik. Keyingi yillarda paxta, g'alla yetishtirishda ilmiy asoslangan holda xorijiy tajribalardan foydalanib, yuqori natijalarga erishilmoqda. O'tgan yili 55,1 ming tonna g'alla hosili olingan bo'lib, bu gektar boshiga 82,1 sentner don deganidir. 38,7 ming tonna paxta yetishtirilgan bo'lib, hosildorlik gektar boshiga 47,8 sentnerga yetdi. Bundan sakkiz yil avval har gektar maydondan 33 sentnerdan paxta hosili olingan bo'lsa, shu davrda gektar boshiga 14 sentnerdan o'sishga erishilgani quvonchli. Tumanda sakkiz yildan buyon g'allachilikda ham, paxtachilikda ham rejalar muntazam ortig'i bilan bajarilib kelinayotir. Go'sht, sut, tuxum, meva, uzum, dukkakli ekinlar, kartoshka, poliz mahsulotlari yetishtirish bo'yicha ham olqishga arzigulik natijalar qayd etilgan. Shu kunlarda g'alla boshoqlari bo'y ko'rsatib, barakali xirmondan darak berib turibdi.

Yil sayin suvdan tejamkorlik bilan foydalanish dolzarb vazifaga aylanib borayotir. O'tgan yili 500 gektar paxta maydonlarida tomchilatib sug'orish, 310 gektar g'alla maydonida yomg'irlatib sug'orish texnologiyalari joriy qilindi. Suvni tejash maqsadida 36,4 kilometr ichki ariqlar, 7,2 kilometr xo'jaliklararo kanallar betonlashtirildi. Yashil energiyaga e'tibor ham kuchaymoqda. Tumandagi 28 ta fermer xo'jaliklarining nasos stansiyalariga quyosh panellari o'rnatildi.

Hamrohlarim taklifi bilan “Jasorat” mahalla fuqarolar yig'inidagi H.Ergasheva ko'chasining 86-xonadonida bo'ldik. Xonadon sohibi Mo'ysinjon aka Rasulovning nomi ishbilarmonlik bilan nafaqat tumanda, balki viloyatda ham og'izga tushgan ekan. Mo'ysin Rasulov oliy ma'lumotli quruvchi bo'lsa-da, tomorqa shaydosi ekan. Darvozasidan kirishingiz bilan issiqxonaga ko'zingiz tushadi.

— Besh sotix maydondagi issiqxonada 60 tup “Toshkent meyer” navli limon parvarish qilaman, — dedi Mo'ysinjon aka. — Ellik tup limon orasida bir tup mandarin ekilib parvarish qilinsa, changlatish tufayli limonning rangi chiroyli bo'ladi. Shuning uchun issiqxonamda ikki tup mandarin, ikki tup apelsin ekkanman. O'tgan yil to'rt yarim tonna limon yetishtirdik. Haqiqiy dehqon bir qarich yerdan ham unumli foydalanadi, — deya u suhbatni davom ettirdi. — Tomorqamizda uch turdagi uzumdan yaxshigina daromad olamiz. Ko'chamizdagi ariq bo'yiga Namanganning To'raqo'rg'onidan uzumning danaksiz “Rizamat ota” navli 15 tup ko'chatini olib kelib ekdim. Bu nav hosildorligi yuqori, sovuqqa chidamli ekan. Limon va uzum ko'chatlarini yetishtirib sotamiz. 20 ta yashikda 40 ta oila asalari boqamiz.

— Kelin yangamizning yutuqlari haqida ham gapirib bering, — deya suhbatga qo'r tashladi hamrohim Shoyad Sattorov.

— Turmush o'rtog'im Zarifaxon Tojiboyeva biologiya fanidan o'qituvchilik qilib pensiyaga chiqqan, — dedi Mo'ysinjon aka. — Uch farzandimiz ham oliy ma'lumotli. Uyimiz kitob javonida 300 dan ortiq eng sara adabiyot namunalari bor. Olti nafar nevaramiz bir-biridan o'zaman deydi. Yaqinda “Ibratli oila” ko'rik tanlovi viloyat bosqichi g'olibi bo'ldik. Uyimiz gullar bilan fayzli. Yetti go'zal gulini bilasizmi? — deb Mo'ysinjon aka qator gullarga ishora qildi. — Bir tupi yetti xil ochiladi. Qorning tagida qolsa, keyin gullaydi. Yuz tupdan ortiq atirgulning sara navlarini parvarish qilamiz. Bolgarlarda bir hikmat bor ekan: “Uyingda yigirma tup atirgul bo'lsa, yurak kasaliga yo'liqmaysan”. Hayotimda ko'rdim. Gul ichida o'sgan inson sog'lom va didi baland bo'lar ekan.

To'g'risi, bu fayzli xonadondan qushdek yengil bo'lib chiqdim. Ayniqsa, yuzidan samimiyat balqib turgan bu nuroniyning ushbu hikmatli so'zi yodimda qoldi: “Mehnat ham ibodatdek savobli mashg'ulot”.

Hamrohlarim matbuot xodimlarini e'zozlaydigan, kitobga, gazetaga mehri baland insonlar ekan. Bugungi kunda shunday ziyoli kishilar bilan hamroh bo'lish ham omaddek gap.

Maqolam boshida nomi tilga olgan Odiljon aka Abduraimovni yaqindan biladigan biror nuroniy bilan uchrashtirishni hamrohlarimdan iltimos qildim.

— Alchazor mahallasida Ismonali Hojimatov degan ijodkor bor, qo'ng'iroq qilamiz, — dedi Muzaffar Karimov.

Ishning yurishganini qarang, Ismonali aka shu atrofdagi yonilg'i quyish shoxobchasida ekan. Muddaomizni eshitgach, xursand bo'ldi.

— Odil aka Abduraimov rahmatli ustozim bo'ladi, — deya xotirladi u. — Madaniyatli, har bir ishni o'z vaqtida bajaradigan, kichik ko'ngil, kamtarin inson edi. Doimo birovlarga yaxshilik qilish niyati bilan yurardi. Halol yashashni afzal biladigan inson edi. Saxovatpeshaligi, kamtarligi, har bir ishga talabchanligi, tuman hayotini yaxshi bilishi farzandlariga ham o'tgan.

Meni eng avvalo Baliqchiga o'zidan yaxshi nom qoldirib o'tgan Odiljon aka Abduraimov yodi yetaklab borgan bo'lsa, u go'shadagi ijtimoiy-iqtisodiy o'zgarishlar bilan tanishib, bir olam taassurotlar bilan qaytdim.

Qolaversa, ana shu insonning farzandi Jasurbek Abdiraimov ushbu tuman rahbari ekanligi, undan tuman ahli mamnun bo'lib gapirganlari, bugungi Baliqchida ro'yobga chiqarilayotgan islohotlarning avji baland ekanligi mamnun etdi.

Dilmurod QIRG'IZBOYEV,

O'zbekiston Jurnalistlar

uyushmasi a'zosi.