Mahalla — obodlik va birdamlik manzili
O'zbekiston Jurnalistlar uyushmasi hamda O'zbekiston Mahallalari uyushmasi o'rtasida imzolangan hamkorlik memorandumi doirasida Surxondaryo viloyatida “Yangi O'zbekiston mahallalari — obodlik va birdamlik manzili” shiori ostida ommaviy axborot vositalari vakillari uchun mediatur tashkil etildi.
Tadbirdan asosiy maqsad mahallalarda amalga oshirilayotgan keng ko'lamli islohotlar, aholi turmush darajasini yaxshilash, bandlikni ta'minlash va infratuzilmani rivojlantirish borasidagi amaliy natijalarni keng jamoatchilikka yetkazishdan iborat bo'ldi. Mediatur davomida jurnalistlar viloyatda mahalla tizimida amalga oshirilayotgan islohotlar bilan yaqindan tanishdi. Bugungi kunda Surxondaryo viloyatida 723 ta mahalla mavjud bo'lib, shundan 48 tasi chegara va olis hududlarda joylashgan. Viloyatda 3 milliondan ortiq aholi istiqomat qiladi.
2026 yilning birinchi choragida “Kambag'al oilalar reestri”ga kiritilgan 9 mingdan ziyod oilaga barqaror bandlik xizmatlari ko'rsatildi. Minglab fuqarolar ish bilan ta'minlanib, tadbirkorlik faoliyatiga jalb etildi, kredit va subsidiyalar ajratildi. Aholi murojaatlarini mahallaning o'zida hal etish tizimi yo'lga qo'yilgani natijasida murojaatlarning aksariyati ijobiy yechim topmoqda. Viloyatda mahalla binolarini qurish va ta'mirlash ishlari ham izchil davom ettirilmoqda. 14 ta mahallaga yangi binolar qurib berilgan, qator mahalla binolari rekonstruksiya qilinib, zamonaviy ko'rinishga keltirilgan.
Mediatur ishtirokchilari dastlab Termiz tumanidagi “Qahramon” mahallasida bo'lib, bu yerda yo'lga qo'yilgan issiqxonachilik, gulchilik va ko'chatchilik faoliyati bilan tanishdilar. Ayniqsa, mahallaning tajribali tomorqachisi Boboyor Xolboyevning faoliyati katta taassurot qoldirdi. U 52 sotix yer maydonida tashkil etgan dehqon xo'jaligida pomidor, bodring, bulg'or qalampiri, karam mahsulotlari bilan bir qatorda o'nlab turdagi gul ko'chatlarini yetishtirmoqda. Ushbu xo'jalik orqali 12 nafar fuqaro doimiy ish bilan ta'minlangan bo'lib, ularning aksariyatini “Ayollar daftari”dagi xotin-qizlar hamda mehnat migratsiyasidan qaytgan fuqarolar tashkil etadi. Boboyor Xolboyevning tashabbuskorligi va mehnatsevarligi davlat tomonidan munosib qadrlanib, u “Namunali tomorqachi” ko'krak nishoni, “O'zbekiston Konstitutsiyasining 30 yilligi” esdalik nishoni hamda “Do'stlik” ordeni bilan taqdirlangan.
Jurnalistlar Termiz tumanidagi “Ayritom” mahallasida davlat granti asosida barpo etilgan sport maydonchasini ko'zdan kechirdilar. Mazkur maskan yoshlarni sportga keng jalb qilish, ularning bo'sh vaqtini mazmunli tashkil etish hamda sog'lom turmush tarzini targ'ib etishda muhim ahamiyat kasb etmoqda.
Mediatur davomida Termiz shahridagi “Kokildor ota” mahallasiga ham borib, hududda amalga oshirilayotgan bunyodkorlik ishlari bilan tanishildi. Bugungi kunda ushbu mahalla iqtisodiy va ijtimoiy jihatdan tez rivojlanayotgan hududlardan biriga aylangan. Bu yerda asosiy iqtisodiy yo'nalish issiqxonachilik bo'lib, yuzlab xonadonlarda pomidor, bodring, qalampir va qulupnay yetishtirilmoqda. Mahallada yaqinda zamonaviy mahalla binosi foydalanishga topshirilgan bo'lib, tadbirkor Abdulvahob ota Abdusattorov tashabbusi bilan bunyod etilgan ushbu binoda “mahalla yettiligi” uchun barcha qulayliklar yaratilgan. Jurnalistlar tomorqadan unumli foydalanayotgan xonadonlar hamda hashar yo'li bilan bunyod etilayotgan piyodalar yo'lakchalarini ham ko'zdan kechirdilar.
Mediaturning e'tiborli manzillaridan biri Jarqo'rg'on tumanidagi “Yangi O'zbekiston” mahallasi bo'ldi. Cho'l hududini o'zlashtirish hisobiga bunyod etilayotgan ushbu massivda qisqa muddat ichida ko'p qavatli uylar, maktab, bog'cha va mahalla binolari qad rostlagan. Minglab aholi yangi xonadonlarga ko'chib kirgan. Hududda axborot texnologiyalari va ingliz tiliga ixtisoslashgan o'quv markazlari, mikromarkazlar hamda savdo ob'yektlari faoliyat yuritmoqda. Ichimlik suvi, gaz, elektr va issiqlik tarmoqlari tortilib, keng ko'lamli ko'kalamzorlashtirish ishlari amalga oshirilgan. Jurnalistlar bu yerda yaratilgan zamonaviy infratuzilma va aholi uchun yaratilgan qulayliklarni yuqori baholadilar.
Shuningdek, mediatur davomida Jarqo'rg'on tumanidagi “Guliston” mahallasida yo'lga qo'yilgan kartoshkachilik faoliyati bilan ham tanishildi. Bu yerda aholi tomorqadan samarali foydalanib, nafaqat o'z daromadini oshirayotgani, balki ichki bozorni qishloq xo'jaligi mahsulotlari bilan ta'minlashga ham munosib hissa qo'shayotgani qayd etildi.
Surxondaryo viloyatida tashkil etilgan mazkur mediatur mahallalarda amalga oshirilayotgan islohotlarning amaliy natijalarini namoyon etish, ilg'or tajribalarni ommalashtirish hamda davlat va jamoatchilik o'rtasidagi ochiq muloqotni mustahkamlashga xizmat qildi. Jurnalistlar mahalla tizimi inson manfaatlarini ta'minlash, aholi turmush darajasini yaxshilash va jamiyatda tinch hamda farovon muhitni shakllantirishda muhim kuchga aylanib borayotganiga yana bir bor amin bo'ldilar.
Zanjiloy ABDUSALOMOVA,
O'zbekiston Jurnalistlar uyushmasi
Axborot xizmati xodimi.