Shuhrat Oripov O'zbekiston Jurnalistlar Uyushmasi boshqaruvi raisi etib saylandi
Kecha — 25 iyun kuni poytaxtimizdagi “Hyatt Regency Tashkent” mehmonxonasining anjumanlar o'tkaziladigan zalida O'zbekiston Jurnalistlar uyushmasining VII konferensiyasi bo'lib o'tdi. Anjumanga “Ishonch” va “Ishonch-Doverie” gazetalari bosh muharriri, senator Husan Ermatov raislik qildi. Unda kun tartibida ko'zda tutilgan bir qancha masalalar ko'rib chiqildi. Shuningdek, tashkiliy masala ham kun tartibida bo'ldi.
Xususan, Uyushmaning 2021-2025 yillardagi faoliyati yakunlari bo'yicha o'tgan uch yarim yil davomida tashkilotga rahbarlik qilgan Xolmurod Salimovning hisoboti eshitildi. Shuningdek, O'zbekistonda xizmat ko'rsatgan jurnalist, Uyushma taftish komissiyasi raisi Chori Latipovning ma'ruzasi tinglandi. Uyushmaning o'tgan yillardagi faoliyati qoniqarli deb topildi.
Konferensiyada O'zbekiston Jurnalistlar uyushmasining yangilangan boshqaruv a'zolari, taftish komissiyasi tarkibi saylandi. Uyushmaning 2026-2030 yillarga mo'ljallangan rivojlanish konsepsiyasi muhokama etildi.
Jurnalistlar yig'inida Uyushma raisi vazifasini bajaruvchi Shuhrat Oripov Uyushmaning tashkiliy tuzilmasi hamda 2026-2030 yillarga mo'ljallangan yangilanish konsepsiyasi xususida so'zga chiqdi.
Konferensiyada tashkiliy masalalar ham ko'rib chiqildi. Delegatlar bir ovozdan Shuhrat Oripovni O'zbekiston Jurnalistlar uyushmasi boshqaruvi raisi etib sayladi. Dilshod Bo'riyev va Shahribonu Imomova Uyushma raisining o'rinbosarlari etib tasdiqlandi.
Ishtirokchilar va unda so'zga chiqqanlar O'zbekiston Jurnalistlar uyushmasining yangi rahbariyati faoliyatiga muvaffaqiyat tiladi. Uyushma haqli ravishda mamlakat jurnalistlarining tayanchi bo'lishiga, Yangi O'zbekistonda amalga oshirilayotgan ulkan islohotlarni yoritish, xalqimizning dardu tashvishlariga doimo sherik bo'lish yo'lida ijod qilayotgan soha vakillari hayotida munosib o'ringa ko'tarilishiga umid bildirishdi.
O'z muxbirimiz.