Xalq nidosi
Rustam Musurmon,
O'zbekistonda xizmat ko'rsatgan madaniyat xodimi,
Qoraqalpog'iston xalq shoiri
Dadil-dadil to'pni sur,
Puxta o'ylab, davra qur.
Raqiblarni chalg'itib,
Darvozaga to'pni ur.
Bayrog'ingda oy – hilol,
Shijoating barkamol.
Burgut bo'lib parvoz qil,
Quvlab yetolmas shamol.
Ola koptok xol-xol,
Tezroq to'pni ol-ol!
To'p-to'p o'yna futbol,
Gol ur, gol ur, gol-gol!
Oshir, bo'yingdan oshir,
Himoyachini shoshir.
Bir dunyo muxlislarning
Shashtini seldek toshir!
Omading chopsin o'ngga,
Quyosh ber qaro tunga.
Zoting Turon xoqoni
Afrosiyob – Er To'nga.
Millionga tatir bir bek,
Milliondan zo'r bir o'zbek.
Chingizxonni mayirgan
Sulton Jaloliddindek.
Yigitning zo'ri mag'rur
G'alaba gashtin surur.
Xalq ovozi gur-gur:
“Gol ur, gol ur, ur-ur!”
Yarqirar oltin uzuk,
Markaz aylana chiziq.
Nigohlarni sehrlab,
Aldab o'ynashing qiziq.
Shamol esar huv-huv,
Na'ra yangrar g'uv-g'uv.
Yugur, to'pni olib qo'y,
Raqibingni quv-quv!
Jangovar na'ra – o'ron,
Ur-ho, ur, uddaburon!
Dam bermay, ko'z ochtirmay,
Yog'diraver to'pbo'ron!
Yashil – futbol dalasi,
Darvozali qal'asi.
Birlashib yorib ketar
Bo'zbo'rilar galasi.
Oy-u quyosh aylanar,
O'ylasam, bosh aylanar.
Dunyo ters aylanganda
Ko'zimda yosh aylanar.
Haq so'z kelmasin malol,
Dunyoda yasha halol.
Yer talashib urishma,
Nafsingni jilovlab ol.
Kemalarin qadashgan,
«Kashf etdik» deb atashgan.
Oltin uchun, yer uchun
Insoniyat adashgan.
Ufq ko'zi qontalash,
Qancha yurtlar jon talash.
Aqldan ozgan dunyo
Nafs talash, vijdon talash.
Birlash, odamzod, birlash,
Dardingni aytib sirlash.
Stadionda mardona
Kuchingni sinab, tirlash.
Quyoshdek yonar ro'ying,
Osmonga yetar bo'ying.
Olam – onam deb sevsang,
Baland bo'lar obro'ying.
Yer koptokdek yumalar,
Yana keldi kemalar.
Kim olar yer sharini?
Oltin to'pni kim olar?
Haq – adolat joyida,
Buzilmaydi qoida.
Ogohdir oliy hakam
Dunyoning saroyida.
Futbol bu – yaxshi niyat,
Haq yo'lga imkoniyat.
Aylana davra qurib,
Birlashar insoniyat.
Dov yechilmas tosh bilan,
Qovoq solgan qosh bilan.
O'ylab o'ynab yutarsan
Aql bilan, bosh bilan.
Ilk o'yin emish “debyut”,
“Rizqim shu, shukr!” – deb yut.
“Jonim, yurtim!” – deb kurash,
“O'zbekistonim!” – deb yut!
Yuragimning porasi,
Ko'zginamning qorasi.
Bir qadam Amerika –
O'zbekiston orasi.
Elu yurt, ota-ona
Boshginangda parvona.
G'olib bo'l, nasib etsin
Shohsupalar shohona.
Ishongan qishloq, kent bor,
O'zbekiston, Toshkent bor!
Orqangda tog'dek tayanch –
Vatan bor, Prezident bor!