Jurnalistning qalbi yonib tursin
Respublikamiz matbuoti sohasida uzoq yillar ishlagan, bugungi kunda nafaqada bo'lgan faxriy jurnalistlarni qo'llab-quvvatlash, ularni ijtimoiy himoya qilish O'zbekiston Jurnalistlari ijodiy uyushmasi faoliyatining ustuvor yo'nalishlaridan biri hisoblanadi. Zero, umrning zalvorli dovonini, qalb qo'rini matbuotga baxshida etgan ustozlarimiz hamisha e'zozga loyiqdir.
27 — iyun Matbuot va ommaviy axborot vositalari xodimlari kuni arafasida uzoq yillar davomida matbuot va ommaviy axborot vositalari rivojiga beminnat xizmat qilgan, bugungi kunda hurmat-e'tiborda bo'lib kelayotgan nuroniy-faxriylarimiz holidan xabar olindi.
— Bilasizmi, jurnalistning qalbi yonib turishi kerak. Yonmagan, o'zidan uchqun chiqarmagan qalb bilan yozish qiyin, — deydi 100 yoshni qarshilash arafasida turgan faxriy jurnalist Farida Usmonova.
O'zbekiston Jurnalistlari ijodiy uyushmasining viloyat bo'limlari ham bayram arafasida viloyatda istiqomat qilayotgan, uzoq yillar jurnalistikaga xizmat qilgan faxriylarimiz xonadonlarida bo'lishdi.
— Har gal shogirdlarim kelganida quvonib ketaman. Yoshlarga chindan havasim keladi. Ular ikki-uch, hatto undan ortiq tillarda ravon so'zlasha olishadi. Zamonaviy texnologiyalarni ham bizdan ko'ra yaxshi bilishadi. Ulardagi jo'shqinlik, kasbiga bo'lgan ishtiyoq qo'limga qalam olishga, yana ijod qilishga yetaklaydi, — deydi surxondaryolik faxriy jurnalist Usmonali Normatov.
Shogirdlar kamolini ko'rish, albatta, ustozlar uchun katta baxt. Uyushma qoshida tashkil etilgan Faxriy hamda Yosh jurnalistlar bilan ishlash kengashlari faoliyati bir-biriga bog'liq bo'lib, birgalikda tadbirlar, uchrashuvlar tashkil etilayotgani kelajakda zabardast jurnalistlar yetishib chiqishiga zamin hozirlaydi.
Nabijon Rahimov.