Osmon juda yaqin edi…

Xayrulla Xolto'rayev

O'sha damlar

Tunda ismin so'rar edim hur-malakdan,

Gul raqsini ko'rdim o'shal kapalakdan,

Uyalganday boqar edi oy falakdan,

Osmon juda yaqin edi o'shal damlar.

Yurak bug'uborlik bilan tildosh edi,

Bahor edi, gul-lolalar dildosh edi,

Men ertakka, ertak menga yo'ldosh edi,

Osmon juda yaqin edi o'shal damlar.

Tog'da o'sgan lolalarim chorlar bu kun,

Dilda yongan yulduzlarim porlar bu kun,

Yuragimda erir muzlar, qorlar bu kun,

Osmon juda yaqin edi o'shal damlar.

Xayolimdan ketmas nayning nolishlari,

Bobom chalgan do'mbiraning xonishlari,

Ko'z yoshimga sirdosh edi bolishlarim –

Osmon juda yaqin edi o'shal damlar.

Dupir-dupir ot choptirgan dalalarim,

Ko'kda bahor yuzim yuvgan jolalarim,

Sog'inchlarim, yomg'irlarim, nolalarim,

Osmon juda yaqin edi o'shal damlar.

Yoz tugadi, qushday uchib ketdi umr,

Navbahordan kuzga ko'chib ketdi umr,

Hayotda bir sirni ochib ketdi umr,

Osmon juda yaqin edi o'shal damlar.

Yomg'irdek ko'z yoshim to'kdim xazonlarga,

Yaproqdek sovurdim umrim to'zonlarga,

Yurakni tobladim shamol-mezonlarga,

Oyday to'lin osmon edi o'shal damlar,

Osmon juda yaqin edi o'shal damlar…

* * *

Olis-olis tomonlarga yo'l ketdi,

Ezgu orzu-havaslarga dil ketdi.

O'tdi mensiz necha-necha bahorlar,

Safarlarga chiqdi laylu nahorlar.

Tuproq edim, tuproq kechdi tovonim,

Yuragimni sharh ayladi zabonim.

Ko'nglimda ay sog'inch to'la diyorlar,

Dimog'imda qoldi xushbo'y iforlar.

Qirda maysa, boychechaklar ko'kardi,

Sog'inch nomli gulchechaklar ko'kardi.

Dil og'rig'i bosilmaydi kechalar,

Qadamimdan bezor bo'ldi ko'chalar.

Ey gulijon, visolingga mushtoqman,

Oydek husni jamolingga mushtoqman.

Qushlar oshiyon qurdi uyim shiftiga,

Maktublarim olib uchdi kiftiga.

Har bahorda sevgimizni yod etgin,

Rahm aylagin, g'aribingni shod etgin.

Qalbim qushdek uchib borar qoshingga,

Sevgim izhor aylar qo'nib boshingga.

Ana uchib keldi deysan baxt qushi,

Va'dalarga vafo qushi – ahd qushi.

Olis-olis tomonlarga yo'l ketdi,

Ezgu orzu-havaslarga dil ketdi.

* * *

Otashsan, olovsan, yonduradursan,

Qanday shijoatsan, sen qanday tilsim?

Hattoki jondan ham tondiradursan.

Vaslingni ato et,

Diling och, sim-sim.

Zehnimda, ko'nglimda mehring ilinji,

Sharorim tilimda, parvona dilim.

Dudog'ing bol-kavsar, tishing dur,

Vaslingni ato et,

Diling och, sim-sim.

Poyingga maysalar titrab bosh urgay,

Ko'ngilga o't qo'yib, ko'zga yosh urgay.

Boshim hech yorilmas, ag'yor tosh urgay,

Hijroni haqdursan,

Visoli tilsim.

Tegirmon toshida yanchilgay,

Yer qattiq, osmonga yetmaydi qo'lim.

Dilimda loladay alvon armonlar,

Vaslingni ato et,

Ko'ngling och, sim-sim.

Ishq yo'li to'liqdir jabru jafoga,

Oshiqning hayoti dard bilan so'lim.

So'zimni shivirlab aytdim saboga,

Vaslingni ato et,

Diling och, sim-sim.

* * *

Zuvalam pishgan tuprog'im,

Jismimdagi jondir vatan.

Onajonim, otajonim,

Tomirimda qondir vatan.

Momolarim qurgan o'choq,

Onam yopgan nondir vatan.

Bobolarim ekkan urug',

Dalamdagi dondir vatan.

Tonglarimni nafasi qutlug',

Quyoshli osmondir vatan.

Hamma vatan ila baxtli,

Kimgadir armondir vatan.

Bobolarim bosgan qadam,

Ajdodlarim o'tgan dovon.

Yovga bo'y bermagan qo'rg'on,

G'olib qahramondir vatan.

Allomalar, avliyolar,

Buyuklarga kondir vatan.

Ajdodlarim yotgan tuproq,

Muqaddas makondir vatan.

Ilk sevgim, ilk muhabbatim,

Va ilk hayajondir vatan.

Yuragimdagi Ollohim,

Qalbimda imondir vatan.

* * *

Xayol karvonlari manzili uzoq,

Ayovsiz yuragim ezadi firoq.

Odamlar holimga boqar xayrona,

Oh dili devona, dili devona.

O'tli tug'yonlarning nola-ohidan,

Xazonlar to'kilgay daraxt shoxidan.

Yuragim ichida bir qushcha yig'lar,

Hijron azoblari bag'rimni tig'lar.

Men-ku azob bilan yashadim birga,

Olib ketolmadim ko'nglimni qirga.

Ena shamollarni sog'indim netay,

Hamma ishni tashlab qishloqqa ketay.

Sensiz yashamoqlik naqadar og'ir,

Hajringda o'rtanib kuyadi bag'ir.

Ko'p bora izladim qalbimga ziyo,

Nurga chulg'anmoqda hikmatli dunyo.

Men yurib boryapman, chopib boryapman,

Entikib, ichikib, shoshib boryapman.

To'fonday to'zg'ib, daryoday jo'shib,

Onajon yoningga shoshib boryapman.

Qishloqqa tog'lardan oshib boryapman…

To'rtliklar

Ey voh, paymonasi to'lganlar qancha,

Dunyoda devona bo'lganlar qancha.

Qancha nomlar yashar o'tgan bo'lsa ham,

Umrida tiriklay o'lganlar qancha.

* * *

Armonlarning cho'kib yotgan norlari bor,

Boysun tog'ning cho'qqisida qorlari bor.

Sog'inchlarim sarg'aytirmish o'ylarimni,

Qulog'imda onajonim zorlari bor.

* * *

Oy boqadi, oyday to'lin dilim qani?

Sir aytarga dildoshim tilim qani?

Ko'p urindim bolalikka qaytayin deb,

Lekin ortga qaytadigan yo'lim qani?

* * *

Boq atrofga, turfa rang to'zon,

Ko'zlarimga sochar chang to'zon.

Cho'lni ko'rsa qutirar quyun,

Gulni ko'rsa xangu-mang to'zon.

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

3 × 5 =